އޭސީސީގެ ތަހުގީގުތައް އަވަސްކުރަން ޕީޖީ އަމުރުކޮށްފި

އެ ކޮމިޝަނުން ހިނގާ ޖިނާއީ ތަހުގީގުތައް އެކަށީގެންވާ އަވަސް މިނެއްގައި ހިނގަމުން ނުދާކަމުގެ ޝަކުވާތަކެއް ލިބިފައިވާ ކަމަށް ޕީޖީ އޮފީހުން މިއަދު ބުންޏެވެ. އަދި އެކަން ޕްރޮސިކިއުޓަ ޖެނެރަލް އައްބާސް ޝަރޫފު ބެއްލެވިއިރު، ދައުލަތާއި އާންމު ރައްޔިތުންގެ މަސްލަހަތު މަތީ މިންވަރަކަށް ހިމެނޭ މައްސަލަތަކުގެ ތަހުގީގު ހިމެނޭ ގޮތުން، އޭސީސީ އިން ހިންގާ ޖިނާއީ ތަހުގީގުތައް ލަސްވެ، ކޮރަޕްޝަނާއި ހިޔާނާތުގެ މައްސަލަތަކުގައި ދައުލަތަށް ގެއްލޭ ފައިސާ އަނބުރާ ހޯދުމުގަ އާއި، އެފަދަ މައްސަލަތަކުގައި ދައުލަތާއި އާންމު ރައްޔިތުންގެ މަސްލަހަތުތަކަށް އުނިކަން އަންނަމުންދާކަން ސަމާލުކަމަށް އައިސްފައިވާ ކަމަށް ޕީޖީ އޮފީހުން ބުންޏެވެ.

އެހެންވެ ޤާނޫނުއަސާސީގެ 223 ވަނަ މާއްދާގެ ޅ) އާއި، އެ މާއްދާގެ ފ) ގެ ދަށުން ޕީޖީ އަށް ލިބިދޭ ބާރުގެ ދަށުން، އޭސީސީ އިން ތަހުގީގުކުރަމުން އަންނަ ހުރިހާ ޖިނާއީ މައްސަލަތައް ޕީޖީ ގެ އޮފީހަށް ހުށަހެޅުމުގައި އަމަލުކުރާނެ ގޮތުގެ އިރުޝާދެއް އެކުލަވާލައި، އެ އިރުޝާދަށް މިއަދުން ފެށިގެން އަމަލުކުރުމަށް އަމުރުކޮށްފައިވެ އެވެ.

އެ އަމުރުގައި އެމްއެމްޕީއާރުސީގެ މައްސަލަ އާއި، ކޮވިޑް-19 އާ ގުޅިގެން ދައުލަތުގެ މުދަލާއި ފައިސާ ނަހަމަ ގޮތުގައި ބޭނުންކުރުމުގެ މައްސަލަތަކާއި، ސަރުކާރު ހިއްސާވާ ކުންފުނިތަކާއި، ބިންވެރިޔާ އާއި ގެދޮރުވެރިޔާ ސްކީމްއާ ގުޅުންހުރި މައްސަލަތައް ފަދަ ދައުލަތުގެ މާލިއްޔަތާއި އާންމު ފަރުދުންގެ މަސްލަހަތާ ގުޅުންހުރި ހިޔާނާތުގެ ބޮޑެތި މައްސަލަތަކުގެ ތަހުގީގު، ހާއްސަ ސަމާލުކަމެއް ދީގެން އަވަސްކޮށް، ޕީޖީ ދެއްވާފައިވާ އިރުޝާދާ އެއްގޮތަށް އެ އޮފީހަށް ހުށަހެޅުމަށް އަމުރު ކުރައްވާފައިވެ އެވެ.