ރައީސް ޑރ. މުހައްމަދު މުއިއްޒުގެ ކުރިފުޅުމަތީގައި ސަރުކާރުގެ ސިޔާސީ ފަރާތްތަކަކީ ޓޮއިލެޓް ޕޭޕަރުތަކެއްކަމަށް ކުރީގެ ނައިބު ރައީސް ޑރ.މުހައްމަދު ޖަމީލު އަހުމަދު ވިދާޅުވެއްޖެ އެވެ.
މަޖިލީހުގެ ރައީސް އަބްދުއްރަހީމްގެ ދަރިކަލުން އިބްރާހީމް ފައިސަލް ޓޫރިޒަމް މިނިސްޓަރުކަމުން މިއަދު ވަކިކޮށްފައިވާތީ އެކަމާ ގުޅުވައި ޖަމީލު ވިދާޅުވީ "މިއަދު އަދުރޭ ވިޔަސް މެމްބަރުން ވިޔަސް މުއިއްޒު ކުރިމަތީ ތިޔައީ ހަމަ ޓޮއިލެޓް ޓިޝޫ ޕޭޕަރުތަކެއް." ކަމަށެވެ.
"ޕީޕީއެމް ނެތިކޮށް ރައްޔިތުންގެ މަޖްލިސް މުއިއްޒު މުށުތެރެއަށްލީ އެމީހުން ލައްވާ. ފައިސަލަ ށްފަހު، މިއަދު ޢައްސާން، ޝިޔާމް، ސައީދު އެންމެންގެ ސަވައިވަލް އޮތީ މުއިއްޒުގެ ބޫޓްގައި ދޫލައިގެންމިއަދު ޕާޓީ އޮތީ މުއިއްޒު އަތުގައި. މަޖިލިސް މެމްބަރުންނަކީ މުއިއްޒުގެ އަޅުން." ޖަމީލު ވިދާޅުވި އެވެ.
ފައިސަލް މަގާމުން ވަކިކޮށްފައި ވަނީ ރާއްޖެ އިން ބޭރަށް ރަސްމީ ދަތުރުތައްކުރެއްވުން ހުއްޓަވާލައްވަން ވެސް މިދިޔަ ހަފުތާގެ ތެރޭގައި ރައީސް އޮފީހުން އަންގާފައި ވަނިކޮށެވެ. މިނިސްޓަރުކަމުން ވަކިކުރުމާއި ގުޅިގެން ފައިސަލް މީޑިއާއަކަށް ވިދާޅުވެފައިވަނީ އޭނާ މިސަރުކާރަށް ކުރައްވަމުން ގެންދެވި ތާއީދު އަނބުރާ ގެންދަވާފައިވާ ކަމަށެވެ.
އެކަމާއި ގުޅިގެން އަބްދުއްރަހީމް ވިދާޅުވީ ފައިސަލް މަގާމުގެ މަސްއޫލިއްޔަތުތައް އަދާ ކުރެއްވީ އިހުލާސްތެރިކަމާއެކުގައި ކަމަށާއި އެކަމަށްޓަކައި ފަހުރުވެރިވެވަޑައިގަންނަވާ ކަމަށެވެ.
