ހއ. ހޯރަފުށި އެއާޕޯޓް އިންޓަނޭޝަނަލް ކޮށްދިނުމަށް އެ ރަށު ކައުންސިލުން، ރައީސް ޑރ. މުހައްމަދު މުއިއްޒުގެ އަރިހުން އެދިވަޑައިގެންފި އެވެ.
ހޯރަފުށީ ކައުންސިލް އިދާރާގައި ރޭ ބޭއްވި ބައްދަލުވުމުގައި ހޯރަފުށި ކައުންސިލުން ވަނީ، ހޮސްޕިޓަލްގެ މަސައްކަތް އަވަސްކޮށްދެއްވުމަށާއި ރަށުގެ ކުނީގެ މައްސަލައަށް ހައްލެއް ހޯދައިދެއްވުމަށް އެދިފަ އެވެ. އަދި ބޯހިޔާވަހިކަމުގެ މައްސަލައަށް ހައްލެއް ހޯދުމަށްޓަކައި އެ ރަށުގެ ބިން ހިއްކައިދިނުމަށް ވެސް އެދިފަ އެވެ.
ހޯރަފުށީ ބަނދަރުގެ ޖާގައިގެ ދަތިކަން ހައްލުކޮށްދިނުމަށާއި، ހޯރަފުށީ އެއާޕޯޓް ބައިނަލްއަޤްވާމީ ކުރުމާއި، އިސްލާމިކް ސެންޓަރެއް ގާއިމުކޮށްދިނުމަށް ވެސް ކައުންސިލުން ވަނީ އެދިފަ އެވެ. މީގެ އިތުރުން ރަށުގެ އިޚުތިޞާޞްގައި ހުވަންދޫ ހިމަނައިދިނުމަށް ވެސް އެދިފައިވެ އެވެ.
މި ބައްދަލުވުމުގައި ވާހަކަދައްކަމުން ރައީސް މުއިއްޒު ވިދާޅުވީ ކައުންސިލް މެންބަރުން ފާހަގަކުރެއްވި ކަންކަމަށް ހައްލު ހޯއްދަވައިދެއްވުމަށް މަސައްކަތްކޮށްދެއްވާނެ ކަމަށެވެ. އަދި އެ މަނިކުފާނުގެ އަރިހުގައި މި ބައްދަލުކުރެއްވުމުގައި ބައިވެރިވެވަޑައިގެންނެވި ވަޒީރުން ވަނީ މި ބައްދަލުވުމުގައި ކައުންސިލާއި އަންހެނުންގެ ތަރައްގީ އަށް މަސައްކަތް ކުރާ ކޮމިޓީއާއި މުއައްސަސާތަކުގެ އިސްވެރިން ފާޅުކުރެއްވި ކަންބޮޑުވުންތަކާގުޅޭ އެންމެ ފަހުގެ މަޢުލޫމާތުތައް ޙިއްޞާކުރައްވާފަ އެވެ.
