އުމުރުން 13 އަހަރުގެ ކުއްޖަކު ރަހީނުކޮށް މަރައިލި މައްސަލައިގައި އެކުއްޖާއާ ގުޅުވައި ބައެއް މައުލޫމާތުތައް މީޑިއާގައި އާންމު ކުރުމުން ތިން މީޑިއާއަކަށް ނަސޭހަތް ދީ އެއް މީޑިއާއެއް ޖޫރިމަނާ ކުރުމުން އެކަމަށް ބޮޑެތި ފާޑުކިޔުންތަކެއް އަމާޒުވެފައިވަނިކޮށް ޕްރޮސެކިއުޓާ ޖެނެރަލް ހުސައިން ޝަމީމް، އެއީ ކުރެވިދާނެ ކަމެއް ކަމަށް ވިދާޅުވެއްޖެ އެވެ.
މިދިޔަ ހަފްތާގެ ތެރޭގައި ކުޑަކުއްޖަކު މަރައިލުމާއި ގުޅިގެން ގެނައި ބައެއް މައުލުމާތު ތަކުގެ ސަބަބުން އެކުއްޖާގެ ކަރާމާތަށް އުނިކަން ލިބޭކަމަށް ޖެންޑާ މިނިސްޓްރީން ވަނީ ބުނެފަ އެވެ. ބައެއް މީޑިއާތަކުން ވަނީ އެހާދިސާ ރިޕޯޓު ކުރިއިރު ކުއްޖާގެ ވަނަވަރާއި، އާއިލީ މައްސަލަތަކުގެ އިތުރުން ކުއްޖާ މަރާލާފައި އޮތްއިރު ހަށިގަނޑަށް ކޮށްފައިވާ އަނިޔާގެ ތަފްސީލުވެސް ގެނަސްދީފަ އެވެ. އަދި ކުއްޖާއާއި މަސްތުވާތަކެތީގެ މައްސަަލަތަކާއި ގުޅުވައިވެސް މީޑިއާތަކުން ރިޕޯޓު ކުރި އެވެ.
މިމައްސަލައިގައި ޖެންޑާއިން ނަސޭހަތް ދިނީ "ވަގުތު"، "ވަންއޮންލައިން" ގެ އިތުރުން "އަދަދު" އޮންލައިންއަށެވެ. މީގެ އިތުރުން "އަވަސް" އޮންލައިން ވަނީ 2،000 ރުފިޔާއިން ޖޫރިމަނާވެސް ކޮށްފަ އެވެ.
މިކަމާއި ގުޅިގެން މޯލްޑިވްސް މީޑިއާ ކައުންސިލް (އެމްއެމްސީ) އިން ބުނެފައިވަނީ ސަރުކާރުގެ މުއައްސަސާއަކުން މީޑިއާތަކަށް ފިޔަވަޅު ނޭޅޭނެ ކަމަށެވެ. އެއީ މީޑިއާތައް ރެގިއުލޭޓު ކުރުމަށް ބްރޯޑްކޮމް އާއި އެމްއެމްސީ ހަދާފައި އޮތްއިރު ވަކި ވަކި މުއައްސަސާތަކުން މީޑިއާތައް ޖޫރިމަނާ ކުރުމަކީ ނުބައި ސަގާފަތެއްކަމަށްވެސް ބުުންޏެވެ. އެކި މީޑިއާތަކުންވެސް ވަނީ މިމައްސަލައިގައި ކަންބޮޑުވުން ފާޅުކޮށްފަ އެވެ.
އެހެން ނަމަވެސް އެކަން ދިފާއު ކުރައްވައި ޕީޖީ ޝަމީމް އޭނާގެ އަމިއްލަ ބްލޮގުގައި މިއަދު ވަނީ އޯޑިއޯއެއް ޝާއިއުކޮށްފަ އެވެ. އެ އޯޑިއޯގައި ވިދާޅުވީ ކުޑަކުދިންގެ މައުލޫމާތު ޝާއިއު ކުރާއިރު އެކަންކަމަށް ފިޔަވަޅު ނޭޅެނީ އެކަމަށް ހާއްސަ ގާނޫނެއް ނޯންނާތީ ކަމަށެވެ. އެހެންނަމަވެސް މިހާރު އަދުލުގެ ގާނޫނާއި ކުޑަކުދިންގެ ހައްގުތައް ރައްކާތެރި ކުރުމުގެ ގާނޫނަށް އަމަލުކުރަމުން ދާކަމަށް އޭނާ ވިދާޅުވި އެވެ.
އެގޮތުން އެ ގާނޫނުގެ 15 ވަނަ މާއްދާގައި ކުޑަކުދިންގެ ޚަބަރު ޝާއިރު ކުރާއިރު، ކުއްޖާގެ މަސްލަހަތަށް އިސްކަންދީ ކުއްޖާގެ މަސްލަހަތު ހިމާޔަތް ކުރަން ވާނެކަން ބަޔާޏް ކޮށްފައިވާ ކަމަށެވެ. އެކުއްޖާއަކީ ގާނޫނާއި ހިލާފުވާ ކުއްޖެއް ކަމަށް ވިޔަސްމެ އެވެ.
މީގެ އިތުރުން ކުޑަކުދިންގެ ކަރާމާތަށް އުނިކަން އަންނަ ގޮތަށް އެކުދިންގެ މައުލޫމާތު އާންމު ކުރުމަކީ ކުޑަކުދިންގެ ހައްގުތައް ރައްކާތެރި ކުރުމުގެ ގާނޫނުގެ 33 ވަނަ މާއްދާގެ ދަށުން މަނާ ކަމެއްކަމަށް ޝަމީމް ވިދާޅުވި އެވެ. ކުށުގެ ތުހުމަތުގައިވާ ކުދިންނާއި ކުށުގެ ޝިކާރައަކަށް ވެފައިވާ ކުދިންގެ މައުލޫމާތު ހާމަކުރާއިރު އެއްވެސް މީޑިއާއަކުން އެ ކުދިންގެ ވަނަވަރު އެނގޭނެ ގޮތަށް އެއްވެސް މައުލޫމާތެއް ނުވަތަ ތަސްވީރެއް ޝާއިއުކޮށްގެން ނުވާނެ ކަމަށް ބަޔާންކޮށްފައި އޮންނަކަން ވެސް ޝަމީމް ފާހަގަކުރެއްވި އެވެ.
މީގެ އިތުރުން އެމްއެމްސީގެ ގަވާއިދުގައިވެސް އެކަން ބަޔާންކޮށްފައި އޮންނަކަމަށް އޭނާ ވިދާޅުވި އެވެ.
ޝަމީމް ވިދާޅުވީ ދެކިލައްވާ ގޮތުގައި ޖެންޑާ މިނިސްޓްރީން އަމަލުކުރަންޖެހޭ ހާއްސަ ގާނޫނެއްގެ ސަބަބުން އެމިނިސްޓްރީއަށް ވަކިވަކި މީޑިއާތަކަށް ފިޔަވަޅު އެޅިދާނެ ކަމަށެވެ. ޖޫރިމަނާކޮށް ފިޔަވަޅު އެޅުމުގެ ބަދަލުގައި ހޭލުންތެރިކަން އިތުރު ކުރުން އެދެވިގެން ވާކަމަށް ޝަމީމް ވިދާޅުވި އެެވެ. ހައްލު ކުރެވޭނީ ނޫސްވެރިންވެސް އިތުރަށް ސަމާލުކަން ދީގެންކަމަށް އޭނާ ވަނީ ވިދާޅުވެފަ އެވެ.
ކުޑަކުދިންގެ މައްސަލަތަކުގައި ކުދިންގެ ކަރާމާތަށް އުނިކަން ލިބޭފަދަ ކަންކަން މީގެ ކުރިންވެސް ދިމާވެފައި ހުރުމުން ޗައިލްޑް އެންޑް ފެމިލީ ޕްރޮޓެކްޝަން އެޖެންސީން ބަޔާން ނެރުނުކަން ޝަމީމް ފާހަގަކުރެއްވި އެވެ. އެގޮތުން މިއަހަރު އެކަނިވެސް ފަސް ބަޔާނެއް ނެރުނުކަމަށް ވިދާޅުވި އެވެ.
