ރައީސް ޑރ. މުހައްމަދު މުއިއްޒާއި ޕީއެންސީގެ ޕާލިމެންޓްރީ ގުރޫޕްގެ މެންބަރުން ތިއްބަވާ ވަޓްސްއެޕް ގްރޫޕުން ޕީއެންސީގެ ހިތަދޫ މެދު ދާއިރާގެ މެންބަރު އަހްމަދު އަޒާން މަރުޒޫގު މިއަދު ބޭރުކޮށްލައިފި އެވެ.
ސުޕްރީމް ކޯޓުގެ ފަނޑިޔާރުންގެ ބެންޗުގައި ހިމެނޭ ފަނޑިޔާރުންގެ އަދަދު މަދުކޮށްލުމަށް ކޯޓުތަކާ ބެހޭ ގާނޫނަށް ހުށަހަޅާފައިވާ އިސްލާހުގެ ބިލް ރައްޔިތުންގެ މަޖިލީހަށް މިއަދު ބަލައިގެންއިރު ޕީއެންސީގެ ޕާލިމެންޓްރީ ގުރޫޕުން އެ ބިލް ބަލައިގަތުމަށް ތްރީ ލައިން ވިޕް ނެރެފަ އެވެ.
ނަމަވެސް މަޖިލީހުގެ މިއަދުގެ ވޯޓު ގަޑީގައި ޕީއެންސީގެ 11 މެންބަރަކު ވޯޓުގައި ބައިވެރި ނުވެ އެވެ. މީގެތެރެއިން 9 މެންބަރުން މާލޭގައި ނޫޅުއްވަ އެވެ. މިއަދުގެ ޖަލްސާއަށް ވަޑައިގެން ވޯޓުގައި ބައިވެރި ނުވާ ޕީއެންސީގެ ދެ މެންބަރުންގެ ތެރެއިން އެއް ބޭފުޅަކީ އަޒާން އެވެ. އޭނާއަކީ އެ ބިލާ ދެކޮޅަށް ޕީއެންސީގެ ޕީޖީ ގްރޫޕުތަކުގައި ވެސް ވާހަކަ ދެއްކެވި ބޭފުޅެކެވެ.
މި ބިލު މިއަދު ވަނީ ޖުޑީޝަރީ ކޮމިޓީން ވެސް ފާސްކޮށްފައެވެ. ނަމަވެސް، ޖުޑީޝަރީ ކޮމިޓީގައި ހުރާ ދާއިރާގެ މެމްބަރު އަނާރާ ނައީމް މި ބިލަށް ވޯޓު ދެއްވާފައެއް ނުވެއެވެ.
