+1
+1
+1
+1
+1
+1
ސްޓޭޓް ޓްރޭޑިންގ އޮގަނައިޒޭޝަން (އެސްޓީއޯ) އިން ޕެޓްރޯލްގެ އަގު ހެޔޮކޮށްފިއެވެ. މިގޮތުން އެސްޓީއޯގެ ސަބްސިޑިއަރީ ކުންފުނި، ފިއުލް ސަޕްލައި މޯލްޑިވްސް (އެފްއެސްއެމް) ގެ ޝެޑްތަކުން މިހާރު ޕެޓްރޯލް ލީޓަރެއް ވިއްކަމުންދަނީ 13 ރުފިޔާ 50 ލާރިއަށެވެ.
ކުރިން ޕެޓްރޯލް ލީޓަރެއް ވިއްކަމުން ގޮސްފައިވަނީ 13 ރުފިޔާ 98 ލާރިއަށެވެ. އެހެންކަމުން، މިހާރު ޕެޓްރޯލް ލީޓަރެއްގެ އަގު 48 ލާރި ހެޔޮވެފައިވެއެވެ.
ޕެޓްރޯލްގެ އަގު ހެޔޮކުރި ނަމަވެސް، ޑީސަލްގެ އަގަށް އެއްވެސް ބަދަލެއް ނާންނާނެކަމަށް އެސްޓީއޯއިން މަޢުލޫމާތު ދެއެވެ. ޑީސަލް ލީޓަރެއް މިހާރުވެސް ވިއްކަމުންދަނީ 13 ރުފިޔާ 92 ލާރިއަށެވެ.
ތެލުގެ އަގަށް އެންމެ ފަހުން ބަދަލު ގެނެސްފައިވަނީ މިދިޔަ އަހަރުގެ މެއި މަހުއެވެ. 2020 އިން ފެށިގެން ތެލުގެ އަގަށް ގިނަގުނަ ބަދަލުތަކެއް އައިސްފައިވެއެވެ. 2020 ގެ މާޗް މަހު ޕެޓްރޯލް ލީޓަރެއް 8 ރުފިޔާ 7 ލާރިއަށް ހުރި އަގު، 2022 ގެ ޖޫން މަހު 16 ރުފިޔާ 55 ލާރިއަށް އަރާފައިވެއެވެ. އޭގެފަހުން މިހާތަނަށް ޕެޓްރޯލްގެ އަގު ދަށަށް ދަމުން ގޮސް، މިހާރު ވަނީ 13 ރުފިޔާ 50 ލާރިއަށް ތިރިވެފައެވެ.
ޕެޓްރޯލްގެ އަގު ހެޔޮވުމުން ދަތުރުފަތުރު ކުރުމަށާއި އެހެނިހެން ޚިދުމަތްތަކަށް ހެޔޮ ބަދަލުތަކެއް އަންނާނެކަމަށް ބެލެވެއެވެ.