ރައްޔިތުންގެ މަޖިލީހަކީ ގޮއްވައިލަން ޖެހޭ ތަނެއްކަމަށް ބުނެ ފެސްބުކް ލައިވްއަކަށް ކޮމެންޓު ކުރި މީހާ ހައްޔަރުގައި ހުންނަތާ ގާތްގަނޑަކަށް މަސް ދުވަހަށްފަހު ދޫކޮށްލައިފި އެވެ.
މިދިޔަ މެއި މަހުގެ 17 ވަނަ ދުވަހު ރައްޔިތުންގެ މަޖިލީހުގެ ޖަލްސާއެއް ޓީވީއަކުން ފޭސްބުކް މެދުވެރިކޮށް ލައިވް ކުރަމުން ދަނިކޮށް މަޖިލީހަކީ ގޮއްވައިލަން ޖެހޭ ތަނެއްކަމަށް ބުނެ ކޮމެންޓު ކުރި މީހެއްގެ މައްސަލަ ފުލުހުންނަށް ހުށަހެޅީ މަޖިލިސް އިދާރާއިންނެވެ.
މިމައްސަލައިގައި ފުލުހުން ހައްޔަރު ކުރީ އުމުރުން 28 އަހަރުގެ ދިވެހި ފިރިހެނެކެވެ. ފުލުހުން ބުނި ގޮތުގައި އެމީހާ ބަންދުން ދޫކޮށްލީ މިދިޔަ ޖޫން މަހުގެ 24 ވަނަ ދުވަހު އެވެ.
ބަންދުން ދޫކޮށްލީ ތަހުގީގު ނިމި އެކަން ޕީޖީއާވެސް ހިއްސާކުރުމަށްފަހު އެވެ. ފުލުހުން ބުނި ގޮތުގައި މައްސަލައިގައި ބަލަންޖެހޭ ހުރިހާ ކަމެއް ވަނީ ބަލައިފަ އެވެ.
2019 ވަނަ އަހަރު ގާނޫނު އަސާސީއަށް ގެނައި އިސްލާހާއިއެކު މީހުން މެރުމާއި ގެއްލުން ދިނުމަށް އިންޒާރު ދިނުމަކީ ބޮޑު ކުށެކެވެ. ފުލުހުން ބުނި ގޮތުގައި މިފަދަ މައްސަލަތައް ވަރަށް ސީރިއަސްކޮށް ތަހުގީގު ކުރާނެ އެވެ.
