ކޮވިޑް-19 ގެ ހާލަތު ގޯސްވުމުގެ ސަބަބުން ހޮސްޕިޓަލަށް ގޮސް އާންމު ބަލިތަކަށް ފަރުވާ ހޯދުން މެދުކަނޑާލާފައި އޮތުމަށްފަހު މާދަމާއިން ފެށިގެން އަނެއްކާވެސް ހިދުމަތް ދޭން އިންދިރާ ގާންދީ މެމޯރިއަލް ހޮސްޕިޓަލުން ނިންމައިފި އެވެ.
އެ ހޮސްޕިޓަލުން މިއަދު ނެރުނު ނޫސްބަޔާނެއްގައި ބުނީ ހޮސްޕިޓަލަށް ގޮސް ޑޮކްޓަރަށް ދެއްކޭ ގޮތަށް ހަމަޖައްސަން ނިންމީ ކޮވިޑު ފިޔަވަޅުތަކަށް ލުއިދޭން ސަރުކާރުން ނިންމުމުން ކަމަށެވެ.
މިއާއެކު މާދަމާއިން ފެށިގެން އޯޕީޑީގެ އިތުރުން ފިޒިއޮތެރަޕީ އާއި އޮކިއުޕޭޝަނަލްތެރަޕީ ސެޝަންތައް ވެސް އައިޖީއެމްއެޗުގައި ފަށާނެ އެވެ. އަދި ކުރިން އޮންލައިންކޮށް ދެމުން އައި ނަފުސާނީ ފަރުވާގެ ހިދުމަތްތައް ވެސް ހޮސްޕިޓަލަށް މީހުން ގެންގޮސްގެން ދޭނެ އެވެ. މީގެ އިތުރުން ރޭޑިއޯލޮޖީ ޑިޕާޓްމަންޓާއި ލެބޯރެޓަރީގެ ހިދުމަތް ވެސް އަލުން ފަށާނެ އެވެ.
އައިޖީއެމްއެޗުން ބުނީ ކޮވިޑާއި ގުޅިގެން މެދުކަނޑައިލި ޓީއެމް.ޓީ، އެންޑްސްކޯޕީ، ކޮލޮނޮސްކޯޕީ އަދި ބްރޮންކޮސްކޯޕީ ހިދުމަތާއި ދުރާލައި ރާވައިގެން ކުރާ އޮޕަރޭޝަންތައް ވެސް މަދާމާ ފަށާނެ ކަމަށެވެ.
ސްޕީޗް ތެރަޕީ ފިޔަވައި ހުރިހާ ހިދުމަތެއް ހެނދުނު 8 އިން ހަވީރު 4 އަށް ދޭއިރު، ސްޕީޗް ތެރެޕީ ސެޝަންތައް ނަގައިދެނީ ހެނދުނު 8 އިން މެންދުރު ފަހު 2 ޖެހުމާ ހަމައަށެވެ. އަދި ހުކުރު ދުވަސް ފިޔަވައި ކޮންމެ ދުވަހެއްގެ މިވަގުތުތަކުގައި ހިދުމަތް ދެމުން ދާނެކަމަށްވެސް ހޮސްޕިޓަލުން ބުންޏެވެ.
ހޮސްޕިޓަލަށް ގޮސް ހިދުމަތް ހޯދުމަށް ހުޅުވައިލި ނަމަވެސް، އޮންލައިންކޮށް މިހާރު ވެސް ދެމުން އަންނަ ހިދުމަތްތައް މެދުކަނޑައެއް ނުލާނެ އެވެ.
