ކުރީގެ ރައީސް އަބްދުﷲ ޔާމީން ތާއީދު ކުރައްވާނީ ރައްޔިތުން ނިންމާފައިވާ ރިޔާސީ ނިޒާމަށް ކަމަށް އިދިކޮޅު ޕީއެންސީގެ ރައީސް އަބްދުއްރަހީމް އަބްދުﷲ (އަދުރޭ) ވިދާޅުވެއްޖެ އެވެ.
މިވަގުތު އިދިކޮޅު ކޯލިޝަން ހިންގެވުމާއި ހަވާލުވެވަޑައިގެން ހުންނެވި އަދުރޭ މިފަދައިން ވިދާޅުވީ ރާއްޖޭގެ ވެރިކަން ހިންގުމުގެ ނިޒާމު ބަރުލަމާނީ ނިޒާމަކަށް "ފުރޮޅައިލައްވާނެ" ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ރޭ ވިދާޅުވުމާއި ގުޅިގެންނެވެ. ނަޝީދު ވިދާޅުވީ ބަރުލަމާނީ ނިޒާމަށް ބަދަލު ކުރައްވާނީ ރައީސް ޔާމީންގެވެސް ބައިވެރިވެވަޑައިގެންނެވުމާއިއެކު ކަމަށެވެ.
"އަޅުގަނޑު ދެކޭ ގޮތުގައި ގާނޫނު އަސާސީއަށް އެ ބަދަލު (ބަރުލަމާނީ ނިޒާމަކަށް ބަދަލު) ގެނެވޭނެ. އަޅުގަނޑު ދެކޭގޮތުގައި ޕީޕީއެމުންވެސް ބަރުލަމާނީ ނިޒާމަކަށް ތާއީދު ކުރައްވާނެ"
- ރައީސް ނަޝީދު
ނަޝީދުގެ ވާހަކަތަކަށް ރައްދު ދެއްވަމުން އަދުރޭ ވިދާޅުވީ ވެރިކަމުގެ ނިޒާމަކީ ރިޔާސީ ނިޒާމުކަމަށް ރައްޔިތުން ވަނީ ނިންމާފައި ކަމަށެވެ. އަދި އެނިންމެވުމަށް ރައީސް ޔާމީން ތާއީދު ކުރައްވާނެ ކަމަށާއި އެމަނިކުފާނު ތާއީދު ކުރައްވާ ނިޒާމު ރައީސް ނަޝީދަށް އެނގިވަޑައި ނުގަންނަވާނެ ކަމަށް އަދުރޭ ވިދާޅުވި އވެެ.
އަދުރޭ ވިދާޅުވީ ރިޔާސީ އިންތިހާބުގައި ރައީސް ޔާމީނަށް ވާދަކުރެއްވެން ޖެހޭނެކަމަށް ދެކެވަޑައިގަންނަވާ ކަމަށެވެ. އެއީ ގައުމު ބޭނުންވާ ގޮތްކަމަށްވެސް އޭނާ ވިދާޅުވި އެވެ.
ރޭގެ "އާސްކް ސްޕީކާ" ޕްރޮގުރާމުގައި ރައީސް ނަޝީދު ވިދާޅުވީ 2023 ވަނަ އަހަރު ރިޔާސީ އިންތިހާބެއް ބާއްވާނަމަ އެމްޑީޕީގެ ކެނޑިޑޭޓަކީ އެމަނިކުފާނު ކަމަށެވެ. އެހެންނަމަވެސް ބަރުލަމާނީ ނިޒާމަކަށް ނިޒާމު ފުރޮޅައިލައްވާނެ ކަމަށާއި އެކަން ކުރުމަށް ގާނޫނު އަސާސީވެސް ބަދަލު ކުރައްވާނެ ކަމަށް ނަޝީދު ވިދާޅުވި އެވެ. ނަޝީދު ވިދާޅުވި ގޮތުން ރައީސް ސޯލިހަކީ ބަރުލަމާނީ ނިޒާމު ގެނައުމަށް އޮތް ހުރަހެއް ނޫން ކަމަށެވެ. ރައީސް ސޯލިހަށް އެންމެ އިހުލާސްތެރި މީހަކީވެސް ނަޝީދު ކަމަށް އެމަނިކުފާނު ވިދާޅުވި އެވެ.
ރާއްޖޭގެ ވެރިކަން ހިންގުމުގެ ނިޒާމު ބަރުލަމާނީ ނިޒާމަށް ބަދަލުކޮށް ބޮޑުވަޒީރަކަށް ވެވަޑައިގަންނަވަން ބޭނުންފުޅުވާކަމަށް ވިދާޅުވެ ރައީސް ނަޝީދު ވަނީ ރައީސް ސޯލިހަށް ސިޓީއެއްވެސް މީގެ ކުރިން ފޮނުއްވައިފަ އެވެ. އެކަމާއި ގުޅިގެން ރައީސް ސޯލިހު ބޭނުންވެ ވަޑައިގަންނަވަނީ ރައްޔިތުން ނިންމަވާފައިވާ ގޮތްކަމަށް ރައީސް އޮފީހުން ބުންޏެވެ. ބަރުލަމާނީ ނިޒާމާއި ސީދާ ދެކޮޅުކަން ހާމަ ނުކުރެއްވި ނަމަވެސް ރައީސް ނަޝީދުވެ ވާހަކަފުޅުތަކަށް ރައީސް ސޯލިހު މާ ބޮޑަށް ތާއީދު ކުރައްވާކަން ފެނިގެނެއް ނުދެ އެވެ.
ނަޝީދު ބޭނުންވެވަޑައިގަންނަވަނީ 2023 ވަނަ އަހަރު ރިޔާސީ އިންތިހާބު ނުބާއްވައި މަޖިލިސް އިންތިހާބަކަށް ގޮސް މަޖިލިސް ތެރެއިން ސަރުކާރު އެކުލަވައިލާށެވެ. އަދި ރާއްޖޭގެ ފުރަތަމަ ބޮޑުވަޒީރަކަށް އެމަނިކުފާނު ވެވަޑައިގަންނަވާށެވެ.
ރޭގެ ޕްރޮގުރާމުގައި ރައީސް ނަޝީދު ވިދާޅުވީ 2023 ވަނަ އަހަރު ރިޔާސީ އިންތިހާބެއް ބާއްވާނަމަ ރައީސް ޔާމީނަށް ވާދަކުރެއްވެން ޖެހޭނެ ކަމަށް ދެކެވަޑައިގަންނަވާ ކަމަށެވެ. އެހެންނަމަވެސް ރައީސް ޔާމީން މިވަގުތު ހުންނެވީ 5 އަހަރުގެ ޖަލު ހުކުމެއްގަ އެވެ. އެ ހުކުމްގައި ހުކުމުގައި ހުންނަވައި އެމަނިކުފާނަށް ރިޔާސީ އިންތިހާބުގައި ވާދަ ނުކުރެވޭނެ އެވެ.
