މިދިޔަ ޖެނުއަރީ މަހު ރާއްޖެއިން ގިނަ އަދަދެއްގެ މިޔަރު އުރަހަތަކެއް ބޭރުކުރަން އުޅުނު ދެމީހެއްގެ މައްޗަށް ޕްރޮސެކިއުޓާ ޖެނެރަލް އޮފީހުން ދައުވާ ކޮށްފި އެވެ.
ޕީޖީ އޮފީހުން މިއަދު ބުނީ މި މައްސަލާގައި ދައުވާ އުފުލާފައި ވަނީ މ. ސެންޓްރޯސެމާ، އައްބާސް އަބްދުﷲ އާއި ހދ. ކުޅުދުއްފުށި ކިރުދޫނިގެ، އަހުމަދު މުހައްމަދުގެ މައްޗަށް ކަމަށެވެ.
މި ދެމީހުންގެ މައްޗަށް އުފުލާފައި ވަނީ ދިވެހިރާއްޖެއިން ސިއްރުން މުދާ ބޭރުކުރަން އުޅުނު ކުށުގެ ދައުވާ އާއި އޮޅުވާލުމުގެ އަމަލެއް ހިންގުމުގެ ދައުވާގެ އިތުރުން ރަސްމީ އިދާރާއަކަށް ދޮގު މައުލޫމާތު ދިނުމުގެ ކުށުގެ ދައުވާ އެވެ.
އެމައްސަލައިގައި ވަނީ 21 ފޮށި ގަނޑުގައި ބަންދުކޮށްފައި ހުރި 429 ކިލޯގެ މިޔަރު އުރަހަ އަތުލައިގެންފަ އެވެ. އޭގެ ތެރޭގައި ލޮނު ލާފައި ހުރި މިޔަރު މަސްވެސް ހިމެނެ އެވެ.
ރާއްޖޭގައި މިޔަރަކީ ހިމާޔަތް ކޮށްފައިވާ އެއްޗެކެވެ. އެހެންކަމުން އޭގެ މަހުގެ އެއްވެސް ބާވަތެއް ވިއްކުމާއި އެކްސްޕޯޓު ކުރުމަކީވެސް މަނާ ކަމެކެވެ.
