ސްރީލަންކާއަށް މިހާރު ކުރަމުންދާ ވިއްސާރައާ ގުޅިގެން އެ ގައުމުގައި ތިބި ދިވެހީން ރައްކާތެރި ކަމުގެ ފިޔަވަޅު އެޅުމަށް އެ ގައުމުގައި ހުންނަ ރާއްޖޭގެ ހައި ކޮމިޝަނުން އެދިއްޖެއެވެ.
އެ ގައުމުގައި ހުންނަ ރާއްޖޭގެ ހައި ކޮމިޝަނުން ނެރުނު ބަޔާނެއްގައި ބުނީ ލަންކާގައި ދިރިއުޅޭ، ތައުލީމު ހާސިލުކުރަމުންދާ، ނުވަތަ އެގައުމަށް ދަތުރުކުރާ ހުރިހާ ދިވެހި ރައްޔިތުން އެ ގައުމަށް ކުރިމަތިވެފައިވާ މި ދަނޑިވަޅުގައި ސަމާލުވުމަށް އެދޭ ކަމަށެވެ.
ރާއްޖޭގެ ހައިކޮމިޝަނުން ވަނީ، ލަންކާގައި ތިބި ދިވެހީން ކޮންމެހެން ކުރަންޖެހޭ ދަތުރެއް ނުކުރުމަށާއި، ހާއްސަކޮށް ފެންބޮޑުވާ އަދި ބިންގަނޑު ކަނޑައިގެންދާ ހިސާބުތަކަށް ދަތުރު ނުކުރުމާއި، ބޯކޮށް ވާރޭވެހޭ އަދި ގަދަވަޔާއެކު ވައިޖެހޭ ވަގުތުތަކުގައި ގޭތެރޭގައި ތިބުމަށާއި މޫސުމާބެހޭ ޑިޕާޓްމަންޓް އަދި ޑިޒާސްޓަރ މެނޭޖްމަންޓް ސެންޓަރު (ޑީއެމްސީ) އިން ދޫކުރާ މައުލޫމާތުތަކަށް ސަމާލުވެ ތިބުމަށް އިލްތިމާސް ކޮށްފައެވެ. އަދި ބޭނުންތެރި ތަކެތި ފެން، ބޭސް، ލިޔެކިޔުންތައް، މޯބައިލް ފޯނިތައް ޗާޖުކޮށް ތައްޔާރުކޮށްފައި ބެހެއްޓުމާއި، ޕާސްޕޯޓާއި އައިޑީކާޑު ފަދަ ލިޔެކިޔުންތައް ރައްކާތެރިކޮށް ބޭނުންވާ ވަގުތު ލިބޭނެ ގޮތަށް ބެހެއްޓުމަށް އިލްމާސްކޮށްފައި ވެއެވެ.
އަދި ފެންގަނޑު ބޮޑުވަމުންދާތީ، ކޯރުތަކާއި، ކުޅިތަކާއި، ކަނޑުގެ އައްސޭރިފަށުގެ ސަރަހައްދުތަކުން ރައްކާތެރިވެ ތިރި ހިސާބުތަކުގައި ނުވަތަ ނުރައްކާ ބޮޑު ސަރަހައްދުތަކުގައި ދިރިއުޅޭނަމަ، ރައްކާތެރި ތަންތަނަށް ބަދަލުވުމަށް އެދިފައެވެ.
އަދި އެހީތެރިކަމެއް ބޭޭނުންވާނަމަ ހައިކޮމިޝަން ހޮޓްލައިން: +94 77 722 8800 އަށް ގުޅުމުން ނޫނީ އީމެއިލް: [email protected] އަށް މެއިލް ކުރުމުން ހައިކޮމިޝަނުން މިކަމާ ގުޅޭގޮތުން ހާލަތު ބަލަމުންދާނެ ކަމށާއި ބޭނުންވާ ހާލަތްތަކުގައި އިތުރު މައުލޫމާތު ދޫކުރަމުންދާނެ ކަމަށްވެސް ވަނީ ބުނެފައެވެ.
"ދިތްވާ" ކޮޅިގަނޑު ސްރީލަންކާ ކައިރީގައި އުފެދިފައިވާތީ، ގަދަ ވަޔާއި ކަނޑު ގަދަވެ ނުރައްކާ ވަނީ ވަރަށް ބޮޑުވެފައެވެ. ލަންކާ ސަރުކާރުން ވަނީ މޫސުން ގޯސް ވުމުގެ ސަބަބުން، ހާއްސަ ހިދުމަތްތައް ފިޔަވައި، ހުރިހާ ސަރުކާރުގެ މުއައްސަސާތަކަށް މިއަދަކީ ބަންދު ދުވަހެއްގެ ގޮތުގައިވެސް ކަނޑައަޅައިފައެވެ.
