ވެލާނާ އިންޓަނޭޝަނަލް އެއާޕޯޓު ތަރައްގީ ކުރުމަށް ކުވައިތު ފަންޑުން އިތުރަށް 769.2 މިލިއަން ރުފިޔާ ދިނުމުގެ ލޯނު އެއްބަސްވުމުގައި މިއަދު ސޮއިކޮށްފި އެވެ.
މިއެއްބަސްވުމުގައި ދިވެހި ސަރުކާރުގެ ފަރާތުން ސޮއިކުރެއްވީ ފިނޭންސް މިނިސްޓަރު އިބްރާހިމް އަމީރު އެވެ. އަދި ކުވައިތު ފަންޑުގެ ފަރާތުން ސޮއިކުރެއްވީ އެފަންޑުގެ އެޑްމިން އެންޑް ފައިނޭންސް އެފެއާޒްގެ ޑެޕިއުޓީ ޑިރެކްޓާ ޖެނެރަލް ނެދާލް އޭ އަލް އޯލަޔާން އެވެ.
މި އެއްބަސްވުމުގެ ދަށުން ކުވައިތު ފަންޑުން ލޯނުގެ ގޮތުގައި ފޯރުކޮށްދޭނީ 15 މިލިއަން ކުވައިތީ ޑައިނާ ކަމަށް ފިނޭންސް މިނިސްޓްރީން ބުންޏެވެ.
ވީއައިއޭ ތަރައްގީކުރަން ކުވައިތު ފަންޑުން ފައިސާ ދިނުމުގެ އެއްބަސްވުމުގައި ސޮއިކުރުން
ވީއައިއޭ ތަރައްގީކުރަން ފެށިނަމަވެސް އެމަސައްކަތް ހުއްޓިފައި އޮންނަތާ ދުވަސްތަކެއް ވެއްޖެ އެވެ. ސަރުކާރުން މީގެ ކުރިން ބުނެފައިވަނީ އަންނަ އަހަރުގެ ތެރޭގައި އެއާޕޯޓު ތަރައްގީކުރުމުގެ މަސައްކަތް މުޅިން ނިންމައިލެވޭނެ ކަމަށެވެ. ސަރުކާރުން ބުނީ އެއާޕޯޓު ތަރައްގީ ކުރުމުގައި ލަސްތަކެއް އައިސްފައިވަނީ ކޮވިޑް-19 ގެ ސަބަބުން ކަމަށެވެ.
އެއާޕޯޓުގެ ސީޕްލޭން ޓާމިނަލް ނިމިފައި އޮންނަތާވެސް ދެ އަހަރު ވެއްޖެ އެވެ. އެހެންނަމަވެސް އެތަން އަދިވެސް ނުހުޅުވަ އެވެ. ހުޅުވޭނެ ދުވަހެއްވެސް ނޭނގެ އެވެ.
ވީއައިއޭގެ މަސައްކަތް އަންނަ އަހަރަށް ނިންމޭނެކަމަށް ސަރުކާރުން ބުނި ނަމަވެސް އެ މަސައްކަތް ތާރީހައް ނިންމޭނެ ކަމަކަށް ނުބެލެވެ އެވެ.
