ޤައުމީ ފުޓްސަލް ޓީމުގެ ކާމިޔާބީ ފާހަގަކުރުމަށް މިރޭ މާލޭގައި ހަވާ އަރުވަން ނިންމައިފިއެވެ.
އެމްއެންޑީއެފުން ބުނީ "ސާފް ފުޓްސަލް ޗެމްޕިއަންޝިޕް 2026''ގައި ގައުމީ ފުޓްސަލް ޓީމު ހޯދި ފަޚުރުވެރި ކާމިޔާބީ ފާހަގަކުރުމުގެ ގޮތުން މިރޭ 22:15 އާއި 22:45 އާ ދެމެދުގެ ވަގުތެއްގައި އާޓިފިޝަލް ބީޗާ ދިމާ ބޭރުން ހަވާ އެރުވުމަށް ހަމަޖެހިފައިވާ ކަމަށެވެ.
އަދި ހަވާ އެރުވުން ކުރިއަށްދާނީ ގާތްގަނޑަކަށް 3 މިނެޓެއް ހާއިރަށް ކަމަށްވެސް އެމްއެންޑީއެފުން ބުންޏެވެ.
ސާފް ފުޓްސަލް ޗެމްޕިއަންޝިޕްގެ ޓްރޮފީ ރާއްޖެއިން ހޯދީ ފައިނަލްގައި ތައިލޭންޑުގެ ބެންކޮކްގެ ނޮންތަބުރި ސްޓޭޑިއަމްގައި ބޫޓާނާ ދެކޮޅަށް ކުޅުނު މެޗުގައި 3-1 ގެ ނަތީޖާއަކުންނެވެ. އެއާއެކު މުބާރާތުގެ ޗެމްޕިއަންކަން ރާއްޖެއިން ހޯދީ ފަސް މެޗުން ހޯދި 15 ޕޮއިންޓާއެކު އެވެ. މިއީ ފުޓްސަލްގެ ތާރީހުގައި ރާއްޖޭގެ ޓީމް ހޯދި ފުރަތަމަ ބައިނަލްއަޤްވާމީ ޓްރޮފީއެވެ.
