އީ-މޯބިލިޓީ މޮނިޓަރިންގ، ރިޕޯޓިންގ އަދި ވެރިފިކޭޝަން (އެމްއާރުވީ) އާ ގުޅޭ ޤައުމީ ފެންވަރުގެ މަސައްކަތު ބައްދަލުވުމެއް ފަށައިފިއެވެ.
ފަތުރުވެރިކަމާއި ތިމާވެށްޓާ ބެހޭ ވުޒާރާއިން ހާމަކުރާ ގޮތުގައި ދެ ދުވަހުގެ މުއްދަތަށް ކުރިއަށްގެންދާ މި ބައްދަލުވުމަކީ ދެމެހެއްޓެނިވި ގޮތެއްގައި ދަތުރުފަތުރުގެ ނިޒާމު ބައްޓަންކުރުމަށް ބޭނުންވާ އިލްމާއި ހުނަރު، ކަމާބެހޭ ފަރާތްތަކަށް ފޯރުކޮށްދިނުމަށް ބާއްވާ ބައްދަލުވުމެކެވެ.
މި މަސައްކަތު ބައްދަލުވުން އިފްތިތާހުކޮށްދެއްވުމުގެ ގޮތުން ވާހަކަފުޅު ދައްކަވަމުން، ފަތުރުވެރިކަމާއި ތިމާވެށްޓާ ބެހޭ ވުޒާރާގެ ސްޓޭޓް މިނިސްޓަރު ފާއިޒް ވިދާޅުވީ، ރާއްޖެއިން މިހާރު މިސްރާބު ޖަހާފައިވަނީ ތިމާވެށްޓާ ރައްޓެހި، ސާފު އަދި ހަރުދަނާ ދަތުރުފަތުރުގެ ނިޒާމަކަށް ކަމަށެވެ. އެގޮތުން މާލެ، ހުޅުމާލެ އަދި ވެލާނާ އިންޓަނޭޝަނަލް އެއާޕޯޓަށް ތައާރަފުކުރެވޭ އިލެކްޓްރިކް ޓެކްސީތަކުގެ މައްޗަށް ފާއިޒް އަލިއަޅުއްވާލެއްވިއެވެ.
ސްޓޭޓް މިނިސްޓަރުގެ ވާހަކަފުޅުގައި، ޖައްވަށް ބޭރުކުރާ ވިހަ ގޭސްތައް މަދުކުރެވޭ މިންވަރު ދެނެގަތުމަށާއި، މި ދާއިރާއިން ކުރެވޭ އިންވެސްޓްމަންޓްތަކަށް މަގުދެއްކުމަށްޓަކައި ހަރުދަނާ އެމްއާރުވީ ނިޒާމެއްގެ މުހިންމުކަން ފާހަގަކުރެއްވިއެވެ. އަދި މިއީ މޫސުމަށް އަންނަ ބަދަލުތަކާ ގުޅޭ ސިޔާސަތުތައް އެކުލަވާލުމަށް ލިބޭ ބޮޑު ބާރެއް ކަމަށްވެސް އޭނާ ވިދާޅުވިއެވެ.
މި ތަމްރީނު ޕްރޮގްރާމަކީ ޖީ.އީ.އެފްގެ އެހީގައި ކުރިއަށްދާ "އިންޓަގްރޭޓެޑް، ސަސްޓެއިނަބަލް އެންޑް ލޯ އިމިޝަން ޓްރާންސްޕޯޓް ޕްރޮޖެކްޓް" ގެ ދަށުން އިންތިޒާމުކޮށްފައިވާ ބައްދަލުވުމެކެވެ. މި ބައްދަލުވުން ކުރިއަށް ގެންދަނީ ޔޫ.އެން.އީ.ޕީ (UNEP) އާއި އޭޝިއަން އިންސްޓިޓިއުޓް އޮފް ޓެކްނޮލޮޖީ (AIT) ގެ އެހީތެރިކަމާ އެކުގައެވެ.
ފަތުރުވެރިކަމާއި ތިމާވެށްޓާ ބެހޭ ވުޒާރާއިން ބުނީ މި މަސައްކަތު ބައްދަލުވުމުގައި ދުނިޔޭގެ އަދި ސަރަހައްދީ ފެންވަރުގައި އީ-މޯބިލިޓީގެ އޮއިވަރު ހުރި ގޮތާއި، އިލެކްޓްރިކް އުޅަނދުތަކަށް ބަދަލުވުމަށް ބޭނުންވާ ސިޔާސީ އޮނިގަނޑުތަކާއި، އެމް.އާރް.ވީ އަށް ބޭނުންވާ މައުލޫމާތު އެއްކުރުމާ ގުޅޭގޮތުން ސެޝަންތައް ކުރިއަށްދާނެ ކަމަށާއި، ބައިވެރިންގެ މެދުގައި މަޝްވަރާ ބައްދަލުވުންތައް ވެސް ބޭއްވުމަށް ހަމަޖެހިފައިވާ ކަމަށެވެ.
