ކޮވިޑް-19 އަށް ޓެސްޓުކުރަން ޕީސީއާރު ޓެސްޓު ހަދަމުންދާ މީހުން ގިނަވެ ސާމްޕަލްތައް ބޮޑުތަނުން އިތުރުވެފައިވާތީ ނަތީޖާ ލިބުން ލަސްވުން އެކަށީގެންވާކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ބުނެފި އެވެ.
މި ދުވަސްވަރަކީ ކޮވިޑް-19 އަށް ބޮޑެތި ލުއިތަކެއްދީ ރާއްޖޭގެ ގިނަ ރަށްތަކަަކަށް ދަތުރުކުރުމުގެ ހުއްދަ ދީފައިވާ ދުވަސްވަރެއްކަމުން ދަތުރު ކުރުމަށް ގިނަ ބަޔަކު ދަނީ ޕީސީއާރު ޓެސްޓު ހަދަމުންނެވެ. ހާއްސަކޮށް ކޮވިޑް-19 ދިފާއު ވެކްސިން ފުރިހަމަކޮށްފައިވާ ފަރާތްތަކަށް ކަރަންޓީނު ވުމަކާއި ނުލައި މޮނިޓަރިން ހާލަތުގައި ނެތް ރަށްރަށަށް ދަތުރު ކުރުމުގެ ހުއްދަ ދީފައި އޮތުމުން މާލެ ސަރަހައްދުގައި ދިރިއުޅޭ ގިނަ ބަޔަކު ދަނީ ރަށްތަކަށް ދަތުރު ކުރަމުންނެވެ.
މިކަމާއި ގުޅިގެން އެޗްޕީއޭއިން ބުނީ ސާމްޕަލްތައް ބޮޑު ތަނުން އިތުރުވެފައިވާތީ ނަތީޖާ ލިބުން ލަސްވުން އެކަށީގެންވާ ކަމަށެވެ.
"އަދި ޓެސްޓު ކުރުމުގައި ކޮވިޑުގެ އަލާމާތެއް ހުރެގެން ނަގާ ސާމްޕަލްތަކާއި ޑައިރެކްޓު ކޮންޓެކްޓުންގެ ސާމްޕަލްތައް ޓެސްޓު ކުރުމަށް އިސްކަންދެވޭނެކަމުގައި ދެންނެވީމެވެ."
- އެޗްޕީއޭ
މާދަމާއަށްފަހު މި ފެށެނީ މި އަހަރުގެ ބޮޑު އީދާއި، މިނިވަން ދުވަހުގެ މުނާސަބަތާއި ގުޅިގެން އަންނަ 16 ދުވަހުގެ ދިގު ޗުއްޓީ އެކެވެ. މިއާއެކު ގިނަ ބަޔަކު އަންނަނީ ރަށްރަށަށް ދަތުރު ކުރަމުންނެވެ.
މިހާރު ކޮވިޑު ވެކްސިން ފުރިހަމަ ކޮށްފައިވާ ފަރާތްތަކަށް 48 ގަޑިއިރު ހަމަނުވާ ޕީސީއާރު ޓެސްޓުގެ ނެގެޓިވް ނަތީޖާއަކާއިއެކު ކަރަންޓީނަކާއި ނުލައި ރަށްރަށަށް ދަތުރު ކުރެވެ އެވެ.
