ރައްޔިތުންގެ މަޖިލީހުގެ ވިލިމާލެ ދާއިރާގެ މެމްބަރު އަހުމަދު އުޝާމަށް ސިޔާސީ ޕާޓިއެއް އުފެއްދުމުގެ މަސައްކަތް ކުރިއަށް ގެންދިޔުމުގެ ހުއްދަ އިލެކްޝަންސް ކޮމިޝަނުން ދީފި އެވެ.
"މޯލްޑިވްސް ނެޝަނަލް ޕާޓީ" ގެ ނަމުގައި ޕާޓީއެއް އުފެއްދުމުގެ ހުއްދަ އުޝާމަށް ދީފައިވާކަން އިލެކްޝަނުން މިއަދު ވަނީ ހާމަކޮށްފަ އެވެ.
މިކަމާއި ގުޅިގެން އުޝާމް ވިދާޅުވީ ސިޔާސީ ޕާޓީއެއް އުފެއްދުމަށް އޭނާ އަށް އިލެކްޝަންސް ކޮމިޝަނުން ހުއްދަ ދިން ނަމަވެސް އެ މަސައްކަތުގައި ރައްޔިތުންގެ މަޖިލީހުގެ އިތުރު ހަތަރު މެންބަރަކު ވެސް ބައިވެރިވެވަޑައިގަންނަވާ ކަމަށެވެ. އެގޮތުން ދަނގެތި ދާއިރާގެ މެންބަރު އަދި ކުރީގެ ޑިފެންސް މިނިސްޓަރު މުހައްމަދު ނާޒިމާއި، ތިމަރަފުށި ދާއިރާގެ މެންބަރު އަބްދުﷲ ރިޔާޒުއާއި، ނިލަންދޫ ދާއިރާގެ މެންބަރު އަބްދުލްމުހުސިން އަބްދުލްހަމީދުގެ އިތުރުން ނޮޅިވަރަމް ދާއިރާގެ މެންބަރު މުހައްމަދު ނަޝީދު (މޮސްޓާ) އޭގެ ތެރޭގައި ހިމެނިވަޑައިގަންނަވަ އެވެ.
ނެޝަނަލް ޕާޓީ އުފެއްދުމަށް އިލެކްޝަނަށް ހުށަހެޅީ 3،000 މީހުންގެ ސޮޔާއިއެކު އެވެ. އުޝާމް ވިދާޅުވީ އުއްމީދަކީ މާ ލަސްތަކެއް ނުވެ ޕާޓީ ރަޖިސްޓްރީ ކުރުމަށް ކުރަންޖެހޭ ކަންކަން ކޮށް ނިންމައިލުން ކަަމަށެވެ.
މި ޕާޓީގެ މަސައްކަތް ކުރުމަށްޓަކައި އެކަމުގައި އެންމެ އިސްކޮށް އުޅުއްވާ ނާޒިމާއި ރިޔާޒު ވަނީ ޖުމްހޫރީ ޕާޓީން ވަކިވެވަޑައިގެންފަ އެވެ.
މަޖިލިސް މެމްބަރުންތަކެއް ގުޅިގެން އާ ސިޔާސީ ޕާޓިއެއް އުފައްދާއިރު ކުރީގެ މިނިސްޓަރު އަބްދުﷲ ކަމާލުއްދީން އިސްވެ ހުންނަވައިވެސް ޕާޓިއެއް އުފެއްދުމުގެ މަސައްކަތް ވަނީ ފަށައިފަ އެވެ. އެކަމަށް ހުއްދަ ނުދީ އިއްޔެ ފޯމު ބާތިލް ކުރީ ކަމާލުއްދީން އެހެން ޕާޓީއެއްގައި އޮތުމުންކަމަށް އިލެކްޝަނުން ވަނީ ބުނެފަ އެވެ.
