ކޮވިޑް-19 އާއި ގުޅިގެން އިނގިރޭސިވިލާތުގައި އަޅާފައިވާ ރައްކާތެރިކަމުގެ ފިޔަވަޅުތައް އުވާލައި، މާސްކު އެޅުމާއި ގައިދުރުކުރަން މަޖުބޫރުކޮށްފައި އޮތް އޮތުންވެސް ހުއްޓުމަކަށް ގެނަސްފި އެވެ.
އިނގިރޭސިވިލާތުން މިގޮތަށް ނިންމިނަމަވެސް ސައިންސްވެރިން ވަނީ މިހާރު އުފެދެމުންދާ ކޮވިޑުގެ އާ ވޭރިއެންޓުތަކުގެ ސަބަބުން ރައްކާތެރިކަމުގެ ފިޔަވަޅުތައް މުޅިން ދޫކޮށްލުން އެންމެ ރަނގަޅު ނޫންކަމަށް ލަފާ އަރުވައިފަ އެވެ.
ފިޔަވަޅުތައް އުވައިލީ ރޭ 11 ޖެހިއިރު އެވެ. މިއާއެކު ނައިޓު ކްލަބުތަކާއި ބާތައް ހުޅުވުމުގެ ހުއްދަވެސް ލިބިގެންދާނެ އެވެ. އިނގިރޭސިވިލާތުގައި އެތަންތަން ބަންދުކޮށްފައި އޮންނަތާ އަހަރަކަށްވުރެއް ގިނަ ދުވަސް ވެއްޖެ އެވެ.
ރައްކާތެރިކަމުގެ ފިޔަވަޅުތައް އުވައިލުމުގެ ކުރިން ބޮޑުވަޒީރު ބޮރިސް ޖޯންސަން ވިދާޅުވީ ރައްޔިތުން ސަމާލުވެ ތިބުމަށް އިލްތިމާސް ކުރާ ކަމަށެވެ. އަދި ވެކްސިން ދިނުން ބާރުމިނުގައި ކުރިއަށް ގެންދާއިރު ވީއެންމެ އަވަހަކަށް ހުރިހާ ފަރާތްތަކުންވެސް ވެކްސިން ޖެހުމަށް އިލްތިމާސް ކުރާ ކަމަށް ބޮރިސް ވިދާޅުވި އެވެ. އޭނާ މިވަގުތު ހުންނެވީ އެގައުމުގެ ހެލްތު މިނިސްޓަރު ސާޖިދު ޖާވިދު ކޮވިޑަށް ޕޮޒިޓިވްވުމާއި ގުޅިގެން އެކަހެރި ކުރެވިފަ އެވެ.
"ފިޔަވަޅުތައް އުވައިލި ނަމަވެސް ސަމާލުވެ ތިއްބަވާ. އަބަދުވެސް ހަނދާނުގަ ބަހައްޓަންވާނެ އަދިވެސް ވައިރަސް އަހަރުމެންގެ ތެރޭގައި އެބަ އުޅޭކަން"
- ބޮޑުވަޒީރު ބޮރިސް ޖޯންސަން
ބައެއް ފަރާތްތަކުން ސިފަކުރާ ގޮތުގައި މިއަދަކީ އިނގިރޭސިވިލާތުގެ މިނިވަން ދުވަހެވެ. އަހަރަކަށްވުރެއް ގިނަ ދުވަސް ފަހުން މިނިވަންކަމާއިއެކު ބޭރުތެރޭގައި އުޅެން ފުރުސަތު ލިބުމަކީ ގިނަ ބަޔަކަށް އުފާވެރިކަން ގެނުވި ކަމެއްގެ ގޮތުގައި ސިފަކުރެވެ އެވެ.
އިނގިރޭސިވިލާތުގައި މިހާރުވެސް ދުވާލެއްގެ މައްޗަށް އެވަރޭޖުކޮށް ބައިލައްކައެއްހާ މީހުން އަންނަނީ ޕޮޒިޓިވް ވަމުންނެވެ. އެހެންނަމަވެސް މަރުވާ މީހުންގެ އަދަދު ވަނީ ވަރަށް ބޮޑަށް ދަށަަށް ގޮސްފަ އެވެ. މިހާރު ބަލި ޖެހިގެން ހޮސްޕިޓަލުގައި ފަރުވާ ދެމުން ދަނީ 4،000 މީހުންނަށެވެ.
އިނގިރޭސިވިލާތުގެ އާބާދީގެ 87 އިންސައްތަ މީހުންނަށް ވަނީ ކޮވިޑް ވެކްސިންގެ ފުރަތަމަ ޑޯޒް ދީފަ އެވެ. ދެވަނަ ޑޯޒް ފުރިހަމަ ކުރީ 68 އިންސައްތަ މީހުންނެވެ. ކުރިއަށް އޮތް މަދު ދުވަސްތަކެއްގެ ތެރޭގައި އެގައުމުގައި 12 އަހަރާ 18 އަހަރާ ދެމެދުގެ ކުދިންނަށްވެސް ވެކްސިން ދޭން ފަށާނެ އެވެ.
