ރާއްޖެއިން ހަރުކަށި ފިކުރާ ދެކޮޅަށް ކުރާ މަސައްކަތުގައި ހޯމް މިނިސްޓްރީއާއި، ފުލުހުންގެ މުއައްސަސާ، ސިފައިން އަދި އެޑިއުކޭޝަން މިނިސްޓްރީ ފަދަ ތަންތަން ރިފޯމް ކުރަން ޖެހޭކަމަށް ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ނަޝީދު މިފަދައިން ވިދާޅުވީ އިންޑިއާގެ "ވިއޯން ނިއުސް" އަށް ދިން ވީޑިއޯ އިންޓަވިއުއެއްގަ އެވެ. އެމަނިކުފާނުގެ ފުރާނަކޮޅު ދުއްވައިލަން ދިން ޓެރަރިސްޓު ހަމަލާގެ ތުހުމަތު ކުރެވެނީ ދީނީ ހަރުކަށި ފިކުރުގެ މީހުންނަށްކަން ފާހަގަކުރައްވައި ނަޝީދު ވަނީ އެފިކުރު ނައްތައިލަން ގިނަ މަސައްކަތްތަކެއް ކުރަންޖެހޭކަމަށް ވިދާޅުވެފަ އެވެ.
އެގޮތުން އެންމެ ފުރަތަމަ ކަމަކަށް ސިޔާސީ ހުރިހާ ފިކުރެއްގެ ހުރިހާ ޕާޓީއެއްގެ މީހުން އެކަތިގަނޑަކަށްވެ މި މައްސަލައާއި ދެކޮޅަށް މަސައްކަތް ކުރަންޖެހޭ ކަމަށާއި އެއަށްފަހު ބައެއް މުއައްސަސާތަކުގެ ތެރޭގައި ފެތުރިފައި އޮތް ހަރުކަށި ފިކުރު ނައްތައިލަން ޖެހޭކަމަށް ނަޝީދު ވިދާޅުވި އެވެ.
"މި މަސައްކަތާއިގެން ކުރިއަކަށް ނުދެވޭނެ ހޯމް މިނިސްޓްރީ، ފުލުހުންގެ އިދާރާ، ސިފައިން ނުވަތަ ކަސްޓަމްސް އާއި އެޑިއުކޭޝަން މިނިސްޓްރީ ތެރޭގައި ފިކުރު އޮއްވާ. އެންމެ ފުރަތަމަ ޖެހޭނީ މި މުއައްސަސާތައް ރީފޯމް ކުރަން އަދި އަނދިރި ދައުލަތެއް ސަރުކާރުގެ ތެރޭގައި ނެތްކަން ޔަގީންކުރަން"
- މަޖިލިސް ރައީސް މުހައްމަދު ނަޝީދު
ނަޝީދު ވިދާޅުވީ އެމަނިކުފާނަށް ދިން ހަމަލާގެ ފަހަތުގައި ތިބީ އައިސިސް ފިކުރުގެ މީހުން ކަމަށެވެ. އަދި މީގެ ކުރިން ރާއްޖެއިން ތިން މީހަކު އެއްކަހަލަ ކަންތައްތަކެއް ހިމެނޭ ގޮތަށް މަރާލާފައިވާކަން ފާހަގަކުރެވިފައިވާކަމަށް ނަޝީދު ވިދާޅުވި އެވެ. އެމަނިކުފާނު މި އިޝާރާތް ކުރެއްވީ ޑރ. އަފްރާޝީމް އަލީ އާއި، ނޫސްވެރިޔާ ރިލްވާންގެ އިތުރުން ބްލޮގާ ޔާމީން ރަޝީދުގެ މަރުގެ ހާދިސާއަށެވެ.
އިތުރަށް ރައީސް ނަޝީދު ވިދާޅުވީ ރާއްޖޭގެ މެޖޯރިޓީ ރައްޔިތުންނަކީ މިނިވަން ނުވަތަ ދީނީ މެދު ވިސްނުމުގެ މީހުން ކަމަށެވެ. މިހާތަނަށް އައިއިރު އެއްވެސް އިންތިހާބެއްގައި ހަރުކަށި ފިކުރުގެ މީހުންނަށް ކާމިޔާބު ލިބިފައި ނުވާކަމަށާއި އެެހެންނަމަވެސް އިންތިހާބުތަކުގައި ކާމިޔާބު ހޯދަނީ ހަރުކަށި ފިކުރުގެ މީހުންގެވެސް ތާއީދާއި އެކުކަމަށް ނަޝީދު ވިދާޅުވި އެވެ.
2008 ވަނަ އަހަރުގެ، 2013 ވަނަ އަހަރުގެ އަދި 2018 ވަނަ އަހަރުގެ ރިޔާސީ އިންތިހާބު ކާމިޔާބު ކުރީވެސް ކޯލިޝަންގައި ހަރުކަށި ފިކުރުގެ މީހުން ހިމެނިގެންކަމަށް ނަޝީދު ވިދާޅުވި އެވެ. މިއިން ކޮންމެ އިންތިހާބެއްގައިވެސް ކާމިޔާބު ލިބޭ ކޯލިޝަންގައި އަދާލަތު ޕާޓީ އޮވެ އެވެ. ސީދާ ނަން ވިދާޅު ނުވި ނަމަވެސް ނަޝީދު މި އިޝާރާތް ކުރެއްވީ އަދާލަތު ޕާޓީއަށް ކަމަށް ބެލެވެ އެވެ. މީގެ ކުރިން ނަޝީދު ވަނީ އަދާލަތު ޕާޓީން ސަރުކާރުގެ ނިންމުންތަކަށް ނުފޫޒު ފޯރުވާކަމަށްބުނެ ފާޑު ވިދާޅުވެފަ އެވެ.
ނަޝީދު ވަނީ އިދިކޮޅު ޕީޕީއެމް ހިމެނޭހެން ހުރިހާ ސިޔާސީ ލީޑަރުން އެކައްޗެއް ކިޔައި ހަރުކަށި ފިކުރާއި ދެކޮޅަށް މަސައްކަތް ކުރަންޖެހޭކަމަށް ވިދާޅުވެ ދައްކަވާ ވާހަކަފުޅު ތަކުރާރުކޮށްފަ އެވެ.
