މާލޭގައި ހުންނަ އޮލިމްޕަސް ސިނަމާގެ ގޯތި ތެރޭގައި ހުރި ގަސްތަކެއް އިއްޔެ ކަނޑައިލިނަމަވެސް އެގަސްތަކުގެ ބަދަލުގައި އިތުރު ގަސް އިންދާނެ ކަމަށް ނެޝަނަލް ސެންޓަރ ފޮރ ދި އާޓްސް (އެންސީއޭ) އިން ބުނެފި އެވެ.
އޮލިމްޕަސް ކޯތިތެރޭގައި ހުރި ގަސްތަކެއް އިއްޔެ ކަނޑައިލީ އެ ގަސްތަކުގެ މޫތަކުގެ ސަބަބުން އެ އިމާރާތަށް ބޮޑެތި ގެއްލުންތަކެއް ލިބޭތީކަމަށް އެންސީއޭއިން ބުންޏެވެ. އަދި ގަސްތައް ކަނޑައިލުމުގެ ކުރިން އެންވަޔަރަންމެންޓް ޕްރޮޓެކްޝަން އޭޖެންސީ (އީޕީއޭ) ގެ ހުއްދަ ހޯދިކަމަށްވެސް އެންސީއޭއިން ބުންޏެވެ.
"އީޕީއޭގެ ލަފައާއި އެއްގޮތަށް މި ގަސްތަކުގެ ބަދަލުގައި އިތުރު ގަސް އިންދުމަށް ވަނީ ހަަމަޖެހިފައި"
- އެންސީއޭ
އުސްކޮށް ބޯކޮށް ހެދިފައި ހުރި ގަސްތަކެއް އިއްޔެ ކަނޑައިލުމާއި ގުޅިގެން އޭގެ ވީޑިއޯއާއި ފޮޓޯ އިއްޔެ ސޯޝަލް މީޑިއާގައި އާންމު ކުރި އެވެ. އަދި އެންސީއޭއަށާއި ސަރުކާރަށް ވަރަށް ބޮޑަށް ފާޑުކިޔަމުން ގެންދިޔަ އެވެ.
އެންސީއޭއަކީ ގިނަ ދުވަސްވީ އިމާރާތެކެވެ. އެތަނުގެ މަރާމާތެއް އެންމެ ފަހުން ކުރީ ކުރީގެ ރައިސް މުހައްމަދު ވަހީދުގެ ސަރުކާރުގަ އެވެ. ބޮޑެތި ގެއްލުންތަކެއް ލިބި ޒަމާނީ ފެންވަރަށް ތަރައްގީކުރަން ޖެހިފައި ހުރި އޮލިމްޕަސް މަރާމާތު ކުރުމަށް އެންސީއޭއިން މިދިޔަ އަހަރުއްސުރެއް ދަނީ މަސައްކަތް ކުރަމުންނެވެ.
އޮލިމްޕަސްގެ ފެންވަރު ދަށްވެގެން ފިލްމު އުފައްދާ ފަރާތްތަކުން އަންނަނީ އަބަދުވެސް ޝަކުވާ ކުރަމުންނެވެ. ކޮވިޑުގެ ސަބަބުން ސިނަމާ ބަންދުކޮށްފައި ހުންނަތާ ދެ އަހަރެއްހާ ދުވަސް ވީއިރުވެސް އޮލިމްޕަސް މަރާމާތުކޮށްފައެއް ނުވެ އެވެ. ސިނަމާތައް ހުޅުވުމުގެ ހުއްދަ އެޗްޕީއޭއިން މިހާރު ދިންނަމަވެސް އޮލިމްޕަސް އަދިވެސް ހުރީ ބަންދުކޮށްފަ އެވެ. ހުޅުވާނެ ދުވަހެއް އެންސީއޭއިން ހާާމާއެއްވެސް ނުކުރެ އެވެ.
