ރާއްޖެއިން އަނިޔާވެރި ހަރުކަށި ފިކުރު ނައްތައިލަން ޖެހޭކަމަށާއި އެކަން ކުރަން ވާނީ އިލްމުވެރިންގެވެސް ބައިވެރިވުމާއިއެކު ކަމަށް ޔޫތު މިނިސްޓަރު އަހުމަދު މަހުލޫފު ވިދާޅުވެއްޖެ އެވެ.
ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ފުރާނަފުޅު ދުއްވައިލަން މިދިޔަ މެއި މަހުގެ ހަވަނަ ދުވަހު ދިން ޓެރަރިސްޓު ހަމަލާގެ ތަހުގީގާއި ގުޅޭ އެންމެ ފަހުގެ މައުލޫމާތު ހިއްސާ ކުރެއްވުމަށް އިއްޔެ ބޭއްވި ނޫސްވެރިންގެ ބައްދަލުވުމަށް އިޝާރާތް ކުރައްވައި މަހުލޫފު ވިދާޅުވީ އެ ތަހުގީގަކީ ފުލުހުންގެ ވަރަށް ބުރަ އަދި ފުރިހަމަ ތަހުގީގެއް ކަމަށެވެ.
ޔަގީންވާ އެއްކަމަކީ މި ސަރުކާރުން އަދި ރައީސް އިބްރާހިމް މުހައްމަދު ސޯލިހު، މި މައްސަލަ ވަރަށް ސީރިއަސްކޮށް ނެންގެވިކަން ކަމަށް މަހުލޫވު ވިދާޅުވި އެވެ.
"އަނިޔާވެރި ހަރުކަށި ފިކުރު ނައްތާލަން ޖެހޭ. އެކަން ކުރަންވާނީ ސިޔާސީ ޕާޓީތަކާއި، ދީނީ އިލްމުވެރިންނާއި، ރައްޔިތުންގެ ބައިވެރިވުމާއިއެކު"
- މިނިސްޓަރު އަހުމަދު މަހުލޫފު
މިވަގުތު ސަސްޕެންޝަންގައި ހުންނެވި މަހުލޫފު މިފަދައިން ވިދާޅުވިއިރު ހަރުކަށި ފިކުރާއި ދެކޮޅަށް މަސައްކަތް ކުރުމަށް އިދިކޮޅު ޕީޕީއެމްއާއިއެކު އެމްޑީޕީން އެއްގަލަކަށް އަރަން ޖެހޭ ކަމަށް އެމްޑީޕީގެ ރައީސް މުހައްމަދު ނަޝީދު ގެންދަވަނީ ވިދާޅުވަމުންނެވެ. އަދި އެކަމަށްޓަކައި ކުރީގެ ރައީސް އަބްދުﷲ ޔާމީންގެ އެހީތެރިކަން ހޯއްދަވާނެ ކަމަށްވެސް ނަޝީދު ވިދާޅުވެ އެވެ.
ނަޝީދާއި ދެކޮޅު ހައްދަވަނީ ރާއްޖޭގެ ދީނީ އިލްމުވެރިންނެވެ. އެގޮތުން ހަރުކަށި ފިކުރާއި ދެކޮޅަށް މަސައްކަތް ކުރުމުގެ ގޮތުން މުސްލިމުން ކާފަރުކޮށް އާންމު ތަންތަނުގައި ނަފުރަތު ފެތުރުން ހުއްޓުވުމަށް ގާނޫނު އަސާސީން އެކަން މަނާކުރާ ބިލެއް މަޖިލީހަށް ހުށަހެޅުމުން އެކަމާއި އިލްމުވެރިން ވަނީ ދެކޮޅު ހަދައިފަ އެވެ. 101 އިލްމުވެރިންގެ ޕެޓިޝަނެއް ރައީސް ސޯލިހަށް ހުށަހެޅުއްވި އެވެ. ސަރުކާރު ކޯލިޝަންގައި އޮތް އަދާލަތު ޕާޓީންވެސް އެކަމަށް ރައީސް އަރިހުގައި އެދުނެވެ.
ނަފުރަތުގެ ބިލަށް އޮތް ތާއީދު ސަރުކާރުން އަނބުރާ ގެނައުމާއި ގުޅިގެން ނަޝީދުގެ ބޮޑެތި ފާޑުކިޔުންތަކެއް ސަރުކާރަށް ވަނީ އަމާޒުވެފަ އެވެ. އަދި ސަރުކާރަށް ކުރާ ތާއީދު އަނބުރާ ގެންނަވައިފާނެ ކަމުގެ އިޝާރާތެއްވެސް ވަނީ ކުރައްވައިފަ އެވެ.
