ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދުގެ ފުރާނަފުޅު ދުއްވައިލަން ދިން ޓެރަރިސްޓު ހަަމަލާގައި ފުލުހުންގެ ތަހުގީގަށް ހޯދުނު ހޯދުންތަކާއި ގުޅިގެން ސަރުކާރުން އަމަލު ކުރަންވީ ގޮތް ނިންމަން އެމްޑީޕީ ގައުމީ މަޖިލީހުގެ ބައްދަލުވުމެއް މިރޭ ބާއްވަން ތާވަލުކޮށްފި އެވެ.
އެމްޑީޕީ ގައުމީ މަޖިލީހުގެ މެމްބަރުންނަށް މިއަދު މެންދުރުފަހު ވަނީ ބައްދަލުވުން އޮންނާނެކަމަށް ބުނެ މެސެޖެއް ފޮނުވައިފަ އެވެ. އެގޮތުން ބައްދަލުބުން އޮންނާނީ މިރޭ 9:00 ގައި ޒޫމް މެދުވެރިކޮށް ކަމަށް މެސެޖުގައި ވަނީ ބުނެފަ އެވެ.
މިރޭގެ ބައްދަލުވުމުގެ އެޖެންޑާގައި ވަނީ ދިވެހި ފުލުހުންގެ ހިދުމަތުންނާއިި، ޕްރޮސިކިއުޓަރ ޖެނެރަލްގެ އޮފީސް (ޕީޖީ) އިން ރޭ ބޭއްވި ނޫސްވެރިންގެ ބައްދަލުވުމުގައި ހާމަކުރި މައުލޫމާތުގެ މައްޗަށް، ސަރުކާރުން އަމަލުކުރަންވީގޮތްކަމަށް އެމްޑީޕީން ދެކޭގޮތް ހާމަކުރުން ތާވަލުކޮށްފަ އެވެ. އިތުރު ކަމެއް އެޖެންޑާ ކޮށްފައެއް ނުވެ އެވެ.
ގައުމީ މަޖިލީހުގެ ބައްދަލުވުންތަކަށް ކަންކަން އެޖެންޑާ ކުރަނީ ދެގޮތަކަށެވެ. އެއީ ޕާޓީގެ އޮފީހުން އިސްނަގައިގެން އެޖެންޑާ ކުރާ މައްސަލަތަކާއި ވަކި މީހަކު ނުވަތަ ބަޔަކު ހުށަހަޅާ މައްސަލަތަކެވެ. މިރޭ އެޖެންޑާގައި ސަރުކާރުން ކަންކުރަންވީގޮތް ނިންމަން އެޖެންޑާ ކުރީ ކޮން ގޮތަކަށްކަން ތަފްސީލުކޮށްދީފައެއް ނުވެ އެވެ.
މިދިޔަ މެއި މަހުގެ 6 ވަނަ ދުވަހު ރައީސް ނަޝީދަށް ދިން ޓެރަރިސްޓު ހަމަލާއަށްފަހު އެމްޑީޕީގެ އެންމެ މުހިންމު މަސައްކަތެއްގެ ގޮތުގައި އޮތީ އެ ހަމަލާއާއި ގުޅުންހުރި އެކި މަސައްކަތްތައް ކުރުމެވެ. އެގޮތުން ހަމަލާ ދިނުމުގައި އިސްކޮށް ތިބި ހަރުކަށި ފިކުރުގެ މީހުންނާއި ދެކޮޅަށް އެމްޑީޕީން ވަނީ މަސައްކަތް ފަށައިފަ އެވެ.
މުސްލިމުން ކާފަރުކޮށް، "ލާދީނީ" އަށް ގޮވުން ހުއްޓުވުމަށް ރައްޔިތުންގެ މަޖިލީހަށް ބިލެއްވެސް އެމްޑީޕީން ހުށަހެޅި އެވެ. އެބިލު ސަރުކާރުން ސްޕޮންސާ ކުރިނަމަވެސް ފަހުން ސަރުކާރުން ވަނީ ބިލަށް ތާއީދު ނުކުރަން ނިންމައިފަ އެވެ. މިކަމާއި ގުޅިގެން ރައީސް ނަޝީދުގެ ބަހުގެ ހަމަލާތަކެއް ރައީސް އިބްރާހިމް މުހައްމަދު ސޯލިހަށް އަމާޒުވި އެވެ.
އެމްޑީޕީގެ ވަޓްސްއެޕް ގްރޫޕުގައި މިހާރުވެސް ދަނީ ބަހުގެ ހަަމަލާތައް ރައްދު ކުރަމުންނެވެ. އެގޮތުން ފުލުހުން އާންމުކުރި މައުލޫމާތުތަކާއި ގުޅިގެން ބައެއް މަޖިލިސް މެމްބަރުން ރައީސް ސޯލިހަށް ތައުރީފުކުރުމުން އެކަމާއި ރައީސް ނަޝީދާއި އެމަނިކުފާނުގެ ފެކްޝަންގެ ބޭފުޅުން އަންނަނީ ކަންބޮޑުވުން ފާޅު ކުރައްވަމުންނެވެ. މި ބަހުގެ ހަމަލާތަކުގައި، މީދޫ ދާއިރާގެ މެމްބަރު ރޮޒައިނާ އާދަމް އަކީ ގަމާރެއް ކަމަށާއި، އެއީ މުހިންމު މީހެއް ނޫންކަމަށްވެސް ރައީސް ނަޝީދު ވަނީ ވިދާޅުވެފަ އެވެ.
އެމްޑީޕީގެ އެތެރޭގައި އުފެދިފައިވާ ބައިބައިވުންތަކާއި ގުޅިގެން މަޖިލިސް މެމްބަރުންވެސް ވަނީ ދެބަޔަކަށް ބެހިފަ އެވެ. ސަރުކާރުގެ ތެރޭގައި ރައީސް ނަޝީދު ފެކްޝަންގެ ބޭފުޅުން މަދުއިރު، މެމްބަރުންގެ ތެރޭގައިވެސް ގިނައީ ރައީސް ސޯލިހު ފެކްޝަންގެ ބޭފުޅުންނެވެ. ނަޝީދު ވިދާޅުވާ ގޮތުން ސަރުކާރުން ނިންމާ ނިންމުންތަކަށް މިހާރު ނުފޫޒު ފޯރުވަނީ ކޯލިޝަންގައި އޮތް އަދާލަތު ޕާޓީންނެވެ.
