ހަރުކަށި ފިކުރުގެ އޮޕަރޭޝަން އެހާ ބޮޑަށް ފުޅާ ކޮށްލެވުނީ ރައީސް މުހައްމަދު ނަޝީދުގެ ސަރުކާރުގައި ދޫ ދިން ވަރުން ކަމަށް އައްޑޫ މީދޫ ދާއިރާގެ މެމްބަރު ރޮޒެއިނާ އާދަމް ވިދާޅުވެއްޖެ އެވެ.
އެމްޑީޕީ ގައުމީ މަޖިލީހުގެ ވަޓްސްއެޕް ގުރޫޕުގައި ރޮޒެއިނާ ވިދާޅުވީ ހަރުކަށި ފިކުރުގެ އޮޕަރޭޝަން އެހާ ބޮޑަށް ފުޅާ ކޮށްލެވުނީ ނަޝީދުގެ ސަރުކާރުގައި ދޫ ދިނުމުން ކަމަށާއި އެވާހަކަ ޖެނެރަލް އިބްރާހިމް ދީދީ ވިދާޅުވުމުން އެކަމަށް އޭނާ އެއްބަސްވި ކަމަށެވެ. އެއީ އޭނާ ވެސް ގަބޫލު ކުރާގޮތް ކަމަށް ރޮޒެއިނާ ވިދާޅުވެ އެވެ. އަދި ރައީސް ނަޝީދު ވިދާޅުވެލައްވާ ހުރިހާ ވާހަކަތަކަށް އެއްބަސް ނުލެއްވޭތީ މާފަށް އެދިލައްވާކަމަށް ވެސް ވިދާޅުވެ އެވެ.
ރޮޒެއިނާ ވިދާޅުވީ ހަރުކަށި ފިކުރާ ދެކޮޅަށް ރައީސް ނަޝީދު ވިދާޅުވެލައްވާ "ސްޓްރެޓަޖީ" ރަނގަޅު ނޫންކަމަށް ގަބޫލު ކުރެއްވޭ ކަމަށެވެ. އެކަމުގެ ސަބަބުން ނަޝީދުގެ ހަށިކޮޅަށް ލިބިދާނެ ގެއްލުމަކަށް ކަންބޮޑުވެލައްވާ ކަމަށް ވެސް ވިދާޅުވި އެވެ.
ނަޝީދާއި ރޮޒެއިނާގެ ޒުވާބު އެމްޑީޕީގެ ގައުމީ މަޖިލީހުގެ ވަޓްއެޕް ގުރޫޕް ހޫނުވެފައި މި ވަނީ ނަޝީދު އަވާރަކޮށްލަން ބަޔަކު ޓެރަރިސްޓް ހަމަލާދިނީ، ނަޝީދަކީ މުރުތައްދު ވެފައިވާ އަދި އިސްލާމްދީނަށާއި ރަސޫލާ އަށް ފުރައްސާރަކުރާ ބޭފުޅެއް ކަމަށް ގަބޫލުކޮށް ކަމަށް ފުލުހުން ރޭ ވަނީ ބުނެފައި ވަނިކޮށް ރޮޒެއިނާ ރޭ ކުރެއްވި ޓްވީޓަކާއި ގުޅިގެންނެނެވެ.
ރޮޒެއިނާ ރޭ ކުރެއްވި ޓްވީޓުގައި ވިދާޅުވެފައިވަނީ ރޭ ފުލުހުންގެ ޕްރެސްއިން އެނގިލެއްވި ގޮތުގައި ކުރިން ގައުމުގައި ހިނގާފައި ހުރި ކަންކަމާއި ޚިލާފަށް[ޑރ. އަފްރާޝީމާއި، ރިލްވާނާއި، ޔާމީން ރަޝީދުގެ މައްސަލަ] ރައީސް ނަޝީދުގެ މައްސަލަ އިންޓަނޭޝަނަލް ޕްރޮފެޝަނަލް މީހުންންގެ އެހީތެރިކަމާއެކު ވަގުތުން ބެލެމުންދާ ކަން ކަމަށެވެ.
ރާއްޖޭގައި ދީނީގޮތުން ހަރުކަށި ފިކުރާ ދެކޮޅަށް މަސައްކަތް ކުރުމަށް ހޯމް މިނިސްޓްރީ ރައީސް އިބްރާހިމް މުހައްމަދު ސޯލިހުގެ ބެއްލެވުމުގެ ދަށަށް ގެންގޮސް ކުއްލި ނުރައްކަލުގެ ހާލަތު އިއުލާނުކުރުމަށް އެމްޑީޕީގެ ގައުމީ މަޖިލީހުގެ ވަޓްސްއެޕް ގްރޫޕަށް ފޮނުއްވި މެސެޖުތަކެއްގައި ވަނީ މިއަދު ވިދާޅުވެފަ އެވެ.
