ރައީސް ނަޝީދު ވިދާޅުވަނީ ރޮޒައިނާއަކީ ގަމާރެއް ކަމަށް!

ރޮޒައިނާއަކީ ގަމާރެއް ކަމަށާއި މާލެ ތެރޭގައި އެފަދަ ކިތަންމެ ބަޔަކާއި ޒުވާބު ނުކުރާކަމަށް ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެ އެވެ.

ނަޝީދު މިފަދައިން ވިދާޅުވީ އެމްޑީޕީގެ ވަޓްސްއެޕް ގްރޫޕަށް މިއަދު ފޮނުއްވި މެސެޖެއްގަ އެވެ. ރައީސް ނަޝީދަށް އަމާޒުކޮށް ދިން ބޮމުގެ ހަމަލާގެ ތަހުގީގުގެ އެންމެ ފަހުގެ މައުލޫމާތު އާންމު ކުރުމަށް އިއްޔެ ފުލުހުން ބޭއްވި ނޫސްވެރިންގެ ބައްދަލުވުމަށްފަހު ރޮޒައިނާ ވަނީ އެކި ފަހަރުމަތިން ރައީސް އިބްރާހިމް މުހައްމަދު ސޯލިހަށާއި ސަރުކާރަށް ތައުރީފުކޮށް ވާހަކަ ދައްކަވައިފަ އެވެ. އެގޮތުން ރައީސް ސޯލިހުގެ ސަރުކާރުން ހަރުކަށި ފިކުރަށާއި ޓެރަރިޒަމަށް ފުރުސަތު ނުދޭނެކަން ހާމަވެއްޖެކަމަށް ބުނެ ރޮޒެއިނާ ގެންދަވަނީ ވާހަކަ ދައްކަވަމުންނެވެ.

ނަޝީދު ދެކިލައްވާ ގޮތުގައި ހަމަލާގެ ތަހުގީގަށް ހޯދުނު ކަންކަމާއިމެދު ސަރުކާރުން އެންމެ އެކަށީގެންވާ ފިޔަވަޅު އަޅާފައެއް ނުވެ އެވެ. އެގޮތުން ވަޓްސްއެޕް ގްރޫޕުގައި އެމަނިކުފާނު ވަނީ ހޯމް މިނިސްޓްރީ ރައީސްގެ ބެއްލެވުމުގެ ދަށަށް ގެންދަވައި ރާއްޖޭގައި ކުއްލި ނުރައްކަލުގެ ހާލަތު އިއުލާން ކުރަންވެސް ގޮވާލައިފަ އެވެ. އަދި ހަރުކަށި ފިކުރުގެ މީހުން ހައްޔަރު ކުރަންވެސް ނަޝީދު ގޮވާލެއްވި އެވެ.

އޭގެ ފަހުން ރޮޒައިނާއަށް ބަހުގެ ހަމަލާތަކެއް ފޮނުއްވަމުން ނަޝީދު ވިދާޅުވީ ރޮޒައިނާ ފަދަ ގަމާރުންނާއި ޒުވާބު ނުކުރުމަށެވެ. ރައްޔިތުންގެ މަޖިލީހުގެ ނައިބުރައީސް އީވާ އަބްދުﷲ އާއި މުހާތަބު ކުރައްވަމުން ނަޝީދު މިފަދައިން ވިދާޅުވުމަށްފަހު މާލެ ތެރޭގައި ކިތަންމެ ބަޔަކާއި ބޭކާރު ޒުވާބު ނުކުރާ ކަމަށްވެސް ވިދާޅުވި އެވެ.

ނަޝީދު ވިދާޅުވީ ތަހުގީގަށްފަހު މާލެ ތެރޭގައި އުޅޭ ޓެރަރިސްޓުންގެ އެކްޓިވް މީހުން ފުލުހުންނަށް މިހާރު ފާހަގަވާނެ އެވެ. އެހެންނަމަވެސް ގާނޫނުތައް ހުންނަ ގޮތުން އެމީހުން ނަގަން އުނދަގޫ ވާނެ ކަމަށާއި އެހެންކަމުން އެމަނިކުފާނަށް ފެނިވަޑައިގަންނަވަނީ ދެމަހެއްހާ ދުވަހުގެ ކުއްލި ނުރައްކަލުގެ ހާލަތަށް ފުލުހުން ދިޔުމަށް ކަމަށް ވިދާޅުވި އެވެ.

ފުލުހުންގެ ތަހުގީގުތަކުން އެނގުނު ގޮތުގައި ރައީސް ނަޝީދު އަވަހާރަކޮށްލަން 2019 ވަނަ އަހަރުން ފެށިގެން ވަނީ މަސައްކަތް ފަށައިފަ އެވެ. މިދިޔަ ތިން އަހަރު ދުވަހުގެ ތެރޭގައި ތިން ފަހަރެއްގެ މަތިން ނަޝީދަށް ހަމަލާ ދިނުމަށް ރޭވިކަމަށްވެސް ތަހުގީގަށް ވަނީ އެނގިފަ އެވެ. ފުލުހުން ބުނާ ގޮތުގައި ހަމަލާއަށް ބަޔަކު ނުވަތަ މީހަކު ފަންޑުކުރި ކަމަކަށް ނުބެލެވެ އެވެ. އެހެންނަމަވެސް ފިކުރީ ގޮތުން ގަބޫލުކުރާ ގަބޫލުކުރުންތަކެއްގެ މައްޗަށް ބިނާކޮށް އަމިއްލައަށް ސައިކަލު ގަނެ ބޮން ހަދަން އެޕާޓްމެންޓު ފަދަ ތަންތަން ނެގިކަމަށް ބެލެވޭކަމަށް ފުލުހުން ބުންޏެވެ.

ނަޝީދަށް ދިން ހަމަލާގައި އިސްކޮށް އުޅުނު މީހުން ހައްޔަރުކޮށްފައިވާއިރު އެކަމުގައި އަމަލީ ގޮތުން އުޅުނު މީހުންނަށް ދައުވާ ކޮށްދިނުމަށް ޕީޖީގައި މިހާރު ވަނީ އެދިފަ އެވެ. ޖުމްލަ 10 މީހުން ވަނީ މިމައްސަލައާއި ގުޅިގެން ހައްޔަރުކޮށްފަ އެވެ.