މެލޭޝިޔާގައި ކޮވިޑް-19 ގެ ހާލަތު ގޯސްވެ ލޮކްޑައުން އިއުލާންކޮށްފައި އޮންނަތާ މަހެއްހާ ދުވަސްފަހުން އެގައުމުގެ ގާނޫނު ހަދާ މަޖިލީހުގެ ބައްދަލުވުމެއް ބާއްވަން ނިންމައިފި އެވެ.
މަޖިލީހުގެ ހާއްސަ ބައްދަލުވުމެއް މިއަދު ބާއްވަން ތާވަލު ކުރިއިރު އޭގެ މައިގަނޑު ބޭނުމަކީ ކޮވިޑުގެ ހާލަތާއި ގުޅުންހުރި ކަންކަމާއިމެދު މަޝްވަރާ ކުރުމާއި ނިންމުންތައް ނިންމުމެވެ. ވޭތުވެދިޔަ މަހެއްހާ ދުވަހުގެ ތެރޭގައި މަޖިލިސް ވެސް އޮތީ މެދުކެނޑުމެއްގަ އެވެ.
ކޮވިޑުގެ ހާލަތު ގޯސްވެ މެލޭޝިޔާގައި މަސައްކަތް ކުރާ ސިއްހީ ދާއިރާގެ މުވައްޒަފުންތަކެއް ވަނީ ވަޒީފާއިންވެސް ވަކިވެފަ އެވެ. އަދި މުސާރައާއި އިނާޔަތްތައް ކުޑަވުމާއި ގިނަ ވަގުތު މަސައްކަތް ކުރަން ޖެހުމާއި ގުޅިގެން ސިއްހީ ދާއިރާގެ މުވައްޒަފުން މުޒާހަރާވެސް ކުރި އެވެ.
މިކަމުގެ ސަބަބުން ބޮޑުވަޒީރު މުހްޔިއްދީން ޔާސިންގެ ސަރުކާރަށް ވަނީ ޕްރެޝަރުތަކަކާއި ކުރިމަތިލާން ޖެހިފަ އެވެ. އެގައުމުގައި ކުއްލި ނުރައްކަލުގެ ހާލަތު އިއުލާން ކުރީ މިއަހަރު ޖެނުއަރީގަ އެވެ.
އިއްޔެ އެކަނިވެސް މެލޭޝިޔާއިން 17،045 ކޮވިޑު ކޭސް ވަނީ ފެނިފަ އެވެ. އަދި 92 މީހުން ބަލީގައި މަރުވި އެވެ. ބަލި ޖެހުނު މީހުންގެ 62 އިންސައްތަ އަކީ ކްލަންގް ވާލީ ސަރަހައްދުން ޕޮޒިޓިވްވި މީހުންނެވެ. އެސަރަހައްދަކީ ވެރިރަށް ކުއަލަ ލަމްޕޫރާއި ސެލަންގޯރް ފަދަ ބޮޑެތި ސްޓޭޓުތައް ހިމެނޭ ސަރަހައްދެވެ. މިއާއެކު އެތައް ހޮސްޕިޓަލުތަކެއްގެ އިތުރުން ކާރުހާނާތަކެއް ވަނީ ބަންދުކުރަން ޖެހިފަ އެވެ.
އެސަރަހައްދުގެ ގިނަ ހޮސްޕިޓަލްތަކުގައި މިހާރު ފަރުވާ ދެނީ ހަމައެކަނި ކޮވިޑުގެ ބަލިމީހުންނަށެވެ. ދައުރުވަމުންދާ ބައެއް ވީޑިއޯތަކުން ފެންނަ ގޮތުގައި ހޮސްޕިޓަލުތަކުގައި ވަސީލަތް މަދުވެ ބައެއް ބަލި މީހުންނަށް ގޮނޑީގައި ބައިތިއްބައިގެންވެސް އަންނަނީ ފަރުވާ ދެމުންނެވެ. އަދި ބެލްކަނީގައިވެސް މީހުން ބައިތިއްބަންޖެހޭ ހާލަތަށް ހޮސްޕިޓަލުތައް ގޮސްފައިވެ އެވެ.
އަންނަ އޯގަސްޓު މަހުގެ އެއްވަނަ ދުވަހު މެލޭޝިޔާގެ ގާނޫނު ހަދާ މަޖިލީހަށް ސަރުކާރުގެ ވެރިން ހާޒިރު ކުރަން ވަނީ ނިންމައިފަ އެވެ. އެއީ ކޮވިޑުގެ ހާލަތައި ގުޅިގެން ސުވާލު ކުރުމަށެވެ.
ލޮކްޑައުންގެ ހާލަތު ދިގުދެމިގެންދާތީ މެލޭޝިޔާގެ އިގްތިސޯދަށް ދަނީ ނޭދެވޭ އަސަރުތަކެއް ކުރަމުންނެވެ. އެގައުމުގެ ބޯޑަރުތައްވެސް ވަނީ ބަންދުކޮށްފަ އެވެ. މިސަރަަހައްދުގައި މިހާރު ހާލަތު އެންމެ ގޯސްވަމުން އަންނަ އެއް ގައުމަކީ މެލޭޝިޔާ އެވެ.
