އީދު ބަންދަށް މާލެ ސަރަހައްދުގައި ވެކްސިން ޖެހުން މެދުކަނޑައިލުމަށްފަހު މާދަމާ އަނެއްކާވެސް ވެކްސިން ޖަހަން ފަށާނެކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ބުނެފި އެވެ.
އެޗްޕީއޭއިން ބުނީ ސިނޯފާމް ވެކްސިންގެ ފުރަތަމަ ޑޯޒް ޖަހާފައިވާ ފަރާތްތަކަށް މާދަމާ ހެނދުނު 9:00 އާއި 11:00 އާއި ދެމެދު ވެކްސިން ދޭނެ ކަމަށެވެ. ވެކްސިން ދޭނީ ސެނެހިޔާގައި ހުންނަ ވެކްސިން ސެންޓަރުގަ އެވެ.
ސިނޯފާމް ވެކްސިންގެ ދެވަނަ ޑޯޒް ޖަހަނީ ފުރަތަމަ ޑޯޒަށް ތިން ހަފްތާ ހަމަވުމުންނެވެ. މާލެ ސަރަހައްދުގައި ސިނޯފާމް ވެކްސިން މީގެ ކުރިން ދެމުން ގެންދިޔައީ ހުޅުމާލޭގައި ހުންނަ ޓްރީޓޮޕް ހޮސްޕިޓަލުންނެވެ. އެހެންނަމަވެސް މާދަމާއިން ފެށިގެން ސެނެހިޔާއިންވެސް މި ވެކްސިން ދޭނެ އެވެ.
ރާއްޖޭގައި މިވަގުތު ދެމުން އަންނަނީ ތިން ވެކްސިނެކެވެ. އެއީ ސިނޯފާމްގެ އިތުރުން ކޮވިޝީލްޑް ވެކްސިނާއި ފައިޒާ ވެކްސިނެވެ. ފައިޒާ ވެކްސިން ދެނީ އެކަމަށްޓަކައި ހާއްސަ އެޕޮއިންޓްމެންޓެއް ހައްދައިގެންނެވެ.
އީދު ބަންދަށް މެދުކަނޑައިލިއިރު ކޮވިޝީލްޑް ވެކްސިންގެ ދެވަނަ ޑޯޒް ޖަހަން ފެށި އެވެ. އެހެންނަމަވެސް ފުރަތަމަ ޑޯޒް ޖެހި އެންމެންނަށް ދެވަނަ ޑޯޒް އަދި ނުދެވެ އެވެ.
އިއްޔެ ރައީސް އިބްރާހިމް މުހައްމަދު ސޯލިހު ވިދާޅުވީ ރާއްޖޭގެ މުޅި އާބާދީއަށް ބޭނުންވާ ވަރަށް ވެކްސިން މިހާރު ލިބިފައިވާ ކަމަށެވެ. އަދި އަމާޒަކީ އޮގަސްޓު ނިމުމުގެ ކުރިން އާބާދީގެ 90 އިންސައްތައަށް ވެކްސިން ދީ ނިންމުން ކަމަށް ރައީސް ވިދާޅުވި އެވެ.
