ދުނިޔޭގެ މަޝްހޫރު ޓެކްނޮލޮޖީ ކުންފުނި ގޫގްލްގެ މުވައްޒަފުންނަށް އޮފީހަށް ނިކުމެވޭނީ ކޮވިޑް-19 ދިފާއު ވެކްސިން ފުރިހަަމަކޮށްގެންކަމަށް އެކުންފުނިން ކަނޑައަޅައިފި އެވެ.
ގޫގުލްއިން މި ގަވާއިދު ކަނޑައަޅައި ކުރިއަށް އޮތް މަދު ހަފްތާތަކުގައި އެއަށް އަމަލު ކުރަން ފަށާނެ އެވެ. މިގަވާއިދަށް އަމަލުކުރަން ދުނިޔޭގެ އެކި ކަންކޮޅުތަކުގައި މަސައްކަތް ކުރާ އެކުންފުނީގެ 144،000 މުވައްޒަފުންނަށް މިހާރު ވަނީ އަންގައިފަ އެވެ.
އިނގިރޭސިވިލާތުގައި މަސައްކަތް ކުރާ ގޫގުލްގެ މުވައްޒަފުންނަށް މިދިޔަ ޖޫން މަހުން ފެށިގެން މި ގަވާއިދު ވަނީ ކަނޑައަޅައިފަ އެވެ. ގޫގުލްގެ ޗީފް އެގްޒެކެޓިވް ސުންދަރް ޕިޗާއީ ވިދާޅުވީ އެ ކުންފުނީގެ އޮފީސްތަކަށް ނިކުންނަ ކޮންމެ މުވައްޒަފަކަށްވެސް ކޮވިޑް ދިފާއު ވެކްސިން ޖަހަން މަޖުބޫރު ވާނެ ކަމަށެވެ.
ގޫގުލްގެ ގިނަ އޮފީސްތައް މިހާރު ހުރީ ބަންދުކޮށްފަ އެވެ. އެހެންނަމަވެސް އަންނަ ސެޕްޓެމްބަރު މަހުގެ 1 ވަނަ ދުވަހުން ފެށިގެން އަނެއްކާވެސް އޮފީސްތައް ހުޅުވަން ފަށާނެ އެވެ. ހުރިހާ ކެމްޕަސްތަކެއްގެ މަސައްކަތް އަލުން ފެށޭނީ އޮކްޓޯބަރު މަހުގެ 18 ވަނަ ދުވަހުގެ ކުރިން ކަަމަށް ބެލެވެ އެވެ. އެހެންނަމަވެސް ގަބޫލުކުރެވޭ ސަބަބަކާއިހުރެ ގޭގައި މަސައްކަތް ކުރުމުގެ ފުރުސަތު މިއަހަރުގެ ނިޔަލަށް އޮންނާނެ ކަމަށް ވަނީ ނިންމައިފަ އެވެ.
ގޫގުލްއިން އެކުލަވައިލި އާ އުސޫލުގައި ވާގޮތުން ކޮންމެ އޮފީހެއްގެވެސް 60 އިންސައްތަ މުވައްޒަފުން އޮފީހަށް ނިކުންނަން ޖެހޭނެ އެވެ. އެހެންނަމަވެސް އޮފީހަށް ނެރޭނީ ވަކި ވަގުތުތަކެއްގައި ހަފްތާގެ މަދު ދުވަސްތަކަކަށް ބަހާލައިގެންނެވެ. މުވައްޒަފުންގެ ފަސްބައިކުޅަ އެއްބައި ގޭގައި މަސައްކަތް ކުރުމުގެ ފުރުސަތު ދެވިދާނެ ކަމަށްވެސް އެކުންފުނިން ވަނީ ކަނޑައަޅައިފަ އވެެ.
