ވިލިމާލޭގައި ލޯކަލް މާރުކޭޓަކާއި މަސް މާރުކޭޓެއް އެޅުމުގެ މަސައްކަތް މާލެ ސިޓީ ކައުންސިލުން ފަށައިފި އެވެ.
ވިލިމާލެ ދާއިރާގެ ކައުންސިލް މެމްބަރު ނަހުލާ އަލީ ވިދާޅުވީ މިދިޔަ ޖޫން މަހުގެ 4 ވަނަ ދުވަހު ބޭއްވި ވިލިމާލެ ކޮމިޓީ ބައްދަލުވުމުގައި ނަހުލާ ހުށަހަޅުއްވައި މަސް މާރުކޭޓަކާއި ލޯކަލް މާރުކޭޓެއް އެޅުމަށް ފާސްކޮށްފައިވާ ކަމަށެވެ. އަދި އިއްޔެ ވަނީ ލޯކަލް މާރުކޭޓެއް ވިލިމާލޭގައި އިމާރާތް ކޮށްދޭނެ ފަރާތެއް ހޯދަން އިއުލާންވެސް ކޮށްފައިކަމަށް ނަހުލާ ވިދާޅުވި އެވެ.
"ދާއިރާއަށްޓަކައި ރައްޔިތުން އެދޭ ކަންތައްތައް ފުރިހަމަ ކުރުމަށް ސާބިތުކަމާއިއެކު އަޅުގަނޑު އަބަދުވެސް މަސައްކަތް ކުރާނަން"
- ވިލިމާލެ ދާއިރާގެ ކައުންސިލް މެމްބަރު ނަހުލާ އަލީ
ވިލިމާލޭގައި ލޯކަލް މާރުކޭޓެއް އަޅާނެ ފަރާތެއް ހޯދުމަށް ހުޅުވާލައި މައުލޫމާތު ސާފުކުރުމަށް ބާއްވާ ބައްދަލުވުން އަންނަ އޯގަސްޓު މަހުގެ 18 ވަނަ ދުވަހަށް ވަނީ ތާވަލުކޮށްފަ އެވެ. އެދުވަހުގެ 11 ޖަހާއިރު އެ ސެޝަން އޮންނާނީ މާލެ ސިޓީ ކައުންސިލްގެ ޕްރޮކިއުމެންޓް ސެކްޝަންގަ އެވެ. އަގު ހުށަހަޅަން ޖެހެނީ އޯގަސްޓު މަހުގެ 25 ގެ ހެނދުނު 10 ޖެހުމުގެ ކުރިންނެވެ.
މީގެ އިތުރުން ވިލިމާލޭގައި ޒަމާނީ ފެންވަރުގެ ކުޑަކުދިންގެ ޕާކެއް ތަރައްގީ ކުރާނެ ބަޔަކު ހޯދަންވެސް ސިޓީ ކައުންސިލުން ވަނީ ހުޅުވާލައިފަ އެވެ. އެކަމުގެ ތަފްސީލުވެސް މިހާރު ގެޒެޓުގައި ވަނީ ޝާއިއުކޮށްފަ އެވެ.
