މިދިޔަ މެއި މަހުގެ ހަ ވަނަ ދުވަހު ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ދިން ޓެރަރިސްޓު ހަމަލާގެ ތަހުގީގާއި ގުޅޭ ޕްރޮސެކިއުޝަން މަސައްކަތްތަކުގައި އިތުރު ނިންމުންތަކެއް ނިންމާފައިވާކަމަށް ޕްރޮސެކިއުޓާ ޖެނެރަލް ހުސައިން ޝަމީމް ވިދާޅުވެއްޖެ އެވެ.
ޕީޖީން މީގެ ކުރިން ވަނީ ރައީސް ނަޝީދަށް ދިން ހަމަލާއާއި ގުޅިގެން އެކަމުގައި ބައިވެރިވި ފަސް މީހެއްގެ މައްޗަށް ދައުވާ ކުރަން ޕީޖީއަށް ފޮނުވައިފަ އެވެ. އެ ހަމަލާ އިސްކޮށް ރޭވި ކަމަށް ތުހުމަތު ކުރެވޭ އަލީ ހައިޝަމް އާއި ބޮން ހަރުކުރުމާއި ގޮއްވައިލުމުގައި އަމަލީ ގޮތުން ހަރަކާތްތެރިވި މުޖާޒު އަހުމަދާއި، ތަހުމީން އަހުމަދާއި، އަހުމަދު ފާތިހުގެ އިތުރުން އަދުހަމް އަހުމަދުގެ މައްޗަށް ދައުވާ ކުރުމާއި ގުޅޭގޮތުން މިހަފްތާގައި ގޮތެއް ނިންމާނެ ކަމަށް ޕީޖީން މީގެ ކުރިން ވަނީ ބުނެފަ އެވެ.
ޕީޖީ ޝަމީމް މިއަދު ވިދާޅުވީ ހަމަލާގެ ތަހުގީގާއި ގުޅޭ އިތުރު ނިންމުންތަކެއް ޕީޖީން މިހާރު ނިންމާފައިވާކަމަށާއި ތަފްސީލު މާދަމާ ދެއްވާނެ ކަމަށެވެ. ޕީޖީގެ ނިންމުންތައް މީޑިއާއަށް ހާމަކުރަން މާދަމާ މެންދުރުފަހު 2:00 ގައި ނޫސްވެރިންގެ ބައްދަލުވުމެއް ބާއްވަން ވަނީ ތާވަލުކޮށްފަ އެވެ.
ފަސް މީހެއްގެ މައްޗަށް ދައުވާ ކޮށްދިނުމަށް އެދި ޕީޖީއަށް ފޮނުވާފައިވާއިރު ބޮން ގޮއްވި މައްސަލައިގައި އިތުރު ފަސް މީހަކުވެސް ވަނީ ހައްޔަރު ކޮށްފަ އެވެ. އެއީ ކ. މާލެ މާފަންނު ކުދެހިގެ އިސްހާގު އާއި ގއ. ވިލިގިލި ހުދުރުވާގެ ފަހުމީ އަލީ އާއި އއ. މާޅޮސް އަސަރީގެ މުހައްމަދު ނާޒިމް އާއި ހއ. މޮޅަދޫ ބަހާރުގޭ އަބްދުﷲ އަލިމަނިކު އަދި ހއ. ހޯރަފުށީ އަލަނާސިގޭ މުހައްމަދު ތަސްމީން އެވެ. މި މީހުންގެ މައްޗަށް ދައުވާ ކޮށްދޭން އަދި ޕީޖީއަށް ނުފޮނުވަ އެވެ.
ހައްޔަރު ކުރި 10 މީހުންނާއި ހަމައިން ތަހުގީގު ނިންމައި ނުލާކަމަށް ފުލުހުން އެންމެ ފަހުން ބޭއްވި ނޫސްވެރިންގެ ބައްދަލުވުމުގައި ވަނީ ބުނެފަ އެވެ. އެހެންނަމަވެސް ހަމަލާއަށް ބަޔަކު ނުވަތަ މީހަކު ފަންޑުކޮށް އިނާމެއް ހުށަހެޅިކަމަށް ނުބެލެވޭކަމަށްވެސް ފުލުހުން ބުންޏެވެ.
ރައީސް ނަޝީދު އަވަހާރަކޮށްލަން ހަމަލާ ރޭވިކަމަށް ބެލެވެނީ ފިކުރީ ތަފާތުތަކެއް ހުރުމުން ކަމަށް ބެލެވޭއިރު އެހަމަލާއަށް ބައެއް ހަރަދުތައް ކޮށްފައިވަނީ އަމިއްލަ އިންތިޒާމުތަކެއްގެ ދަށުންކަމަށް ބެލެވޭ ކަމަށްވެސް ފުލުހުން ވަނީ ބުނެފަ އެވެ.
