ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރު އަބްދުﷲ ޖާބިރު ގިނިކަންޏާ އިހުތިޖާޖު ކުރެއްވުމަށްފަހު އެސަރަހައްދު ދޫކޮށް ވަޑައިގެންފި އެވެ.
ޖާބިރު ގިނިކަންޏާ އިހުތިޖާޖު ކުރެއްވީ މިއަދު މެންދުރު ރައްޔިތުންގެ މަޖިލީހުގެ އިދާރާ ކުރިމަތީގަ އެވެ. އިހުތިޖާޖުގައި ޖާބިރު ގޮވައިލެއްވީ ރައީސް އިބްރާހިމް މުހައްމަދު ސޯލިހު މަޖިލީހަށް ހާޒިރު ކުރެއްވުމަށެވެ. އަދި ޑިފެންސް މިނިސްޓަރު މާރިޔާ އަހުމަދު ދީދީގެ އިސްތިއުފާއަށް ޖާބިރު ގޮވައިލެއްވި އެވެ.
ޖާބިރު އިހުތިޖާޖު ކުރައްވަމުން ގެންދެވީ އަވިގަނޑު މެދުގަ އެވެ. އެހެންކަމުން ދޭތެރެއަކުން އަތުގައި އޮތް ފެންފުޅިވެސް ބޮލަށް އަޅުއްވަ އެވެ. މަޖިލިސް އިދާރާގެ ގޭޓުގައި ލެނގިލައިގެން އިރުކޮޅަކު އިށީންދެ އިނުމަށްފަހު ޖާބިރު މަގުމަތީގައި އޮށޯންނަވާ މަންޒަރުވެސް ސޯޝަލް މީޑިއާގައި ދައުރުވާ ވީޑިއޯގައި ފެނެ އެވެ.
ޖާބިރު އިހުތިޖާޖު ކުރައްވަމުން ގެންދެވި ވަގުތު އޭނާގެ އަނބިކަނބަލުން ދިޔާނާ ސައީދު އެސަރަހައްދަށް ވަޑައިގެންނެވި އެވެ. އަދި ޖާބިރު އެތަނުން ނަންގަވައި ގެއަށް ގެންދެވޭތޯ މަސައްކަތް ކުރެއްވި އެވެ. އެހެންނަމަވެސް ޖާބިރު ވަޑައިނުގެންނެވުމުން ދިޔާނާ ވަނީ އެސަރަހައްދު ދޫކޮށް ވަޑައިގެންފަ އެވެ.
