ރައްޔިތުންގެ މަޖިލީހުގެ އުނގޫފާރު ދާއިރާގެ މެމްބަރު މުހައްމަދު ވަހީދު (ވައްޑޭ) މަރައިލުމަށް ސޯޝަލް މީޑިއާގައި ގޮވައިލި ސްކޫލު ޓީޗަރު ވަޒީފާއިން ވަކިކޮށްފި އެވެ.
ނ. ކުޑަފަރިއަށް ނިސްބަތްވާ މުހައްމަދު އަޝްރަފް ނަމަކަށް ކިޔާ އެ ޓީޗަރު ވަޒީފާއިން ވަކިކުރީ އިއްޔެ އެވެ.
ވައްޑޭ މަރައިލުމަށް އަޝްރަފު ސޯޝަލް މީޑިއާގައި ގޮވައިލީ އޭޕްރީލް މަހުގެ 16 ގަ އެވެ. އެއީ ވައްޑޭ މީގެ ކުރިން ދެއްކެވި ވާހަކައަކާއި ގުޅިގެންނެވެ. އަޝްރަފުގެ އެ ޕޯސްޓުގައި ބުނެފައިވަނީ އިސްލާމް ދީނަކީ ކުޅޭކުޅޭ އެއްޗަކަށް ހަދާތަން ބަލަން ރައްޔިތުން ތިބެގެން ނުވާނެ ކަމަށެވެ. އަދި މެމްބަރު ވައްޑޭ ތައުބާ ވުމަށް ގޮވާލާ ކަމަށާއި ނޫންނަމަ މަރައިލަންޖެހޭ ކަމަށް އަޝްރަފު ވަނީ ބުނެފަ އެވެ.
އަޝްރަފުގެ އެ ޕޯސްޓުގެ މައްސަލަ ހޫނުވުމާއި ގުޅިގެން އޭނާ ވަނީ އެތައް ފަހަރެއްގެ މަތިން އެ އެޑިޓުވެސް ކޮށްފަ އެވެ. އޭގެ ފަހުން އެ ޕޯސްޓު އޭނާ ޑިލީޓު ކޮށްލި އެވެ.
އަޝްރަފުގެ އެޕޯސްޓާއި ގުޅިގެން އޭނާ ވަޒީފާއިން ސަސްޕެންޑު ކުރީ މިދިޔަ މެއި މަހުގެ 9 ވަނަ ދުވަހު އެވެ. އެޑިއުކޭޝަން މިނިސްޓްރީން ވަނީ މި މައްސަލަ ސީރިއަސް މައްސަލައެއްގެ ގޮތުގައި ބަލަން ނިންމައި ތަހުގީގު ނިންމަން ހާއްސަ އިސްކަމެއް ދީފަ އެވެ. މައްސަލަ ބެލުމަށްފަހު މިނިސްޓްރީން ނިންމީ އަޝްރަފު ވަޒީފާއިން ވަކި ކުރާށެވެ.
