ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން ބޭނުންވާ ބަޔަކު އަދިވެސް އެބަ އުޅޭކަމަށް އެމަނިކުފާނު ވިދާޅުވެއްޖެ އެވެ.
ސޯޝަލް މީޑިއާ ޕްލެޓްފޯމު، ކްލަބް ހައުސް ގައި "ވޮއިސް އޮފް އައްޑޫ" ގެ ނަމުގައި އޮންނަ ކްލަބެއްގެ މިއަދުގެ ސެޝަންގައި ބައިވެރިވެވަޑައިގެން ރައީސް ނަޝީދު ވިދާޅުވީ އެމަނިކުފާނު އަވަހާރަކޮށްލަން ކުރާ މަސައްކަތް ހުއްޓައިލިކަން ދެކެން އުނދަގޫ ކަމަށެވެ.
މިއަހަރުގެ މެއި މަހުގެ 6 ވަނަ ދުވަހު ރައީސް ނަޝީދު އަވަހާރަކޮށްލަން އައިއީޑީއެއް ގޮއްވައިލީ އެމަނިކުފާނު ދިރިއުޅުއްވާ ގ. ކެނެރީގެއިން ނިކުމެވަޑައިގެން ކާރަށް އަރާވަޑައިގަންނަވަން އުޅުއްވަނިކޮށެވެ. މިމައްސަލައިގައި މިހާތަނަށް 10 މީހުން ފުލުހުން ވަނީ ހައްޔަރުކޮށްފަ އެވެ. އޭގެ ތެރެއިން ހަތަރު މީހެއްގެ މައްޗަށް ދައުވާ އުފުލާފައިވާއިރު އެކެއްގެ މައްޗަށް ދައުވާ އުފުލުމާއިމެދު އަދި ވަކި ގޮތެއް ނުނިންމަ އެވެ.
ހަމަލާގެ ތަހުގީގަށް އިޝާރާތް ކުރައްވައި ރައީސް ނަޝީދު ވިދާޅުވީ 10 މީހުންނާއި ހިސާބުން މައްސަލަ ނިމޭކަމަށް ދެކެވަޑައިނުގަންނަވާ ކަމަށެވެ. އަދި އެކަމަކީ އެއަށްވުރެއް ފުޅާކޮށް ހިންގާފައިވާ ކަމެއް ކަމަށްވެސް ވިދާޅުވި އެވެ.
ހަމަލާ ދިންއިރު ރައީސް ނަޝީދަށް ގެންދެވީ އެމްއެންޑީއެފްގެ އެންމެ މަތީ ސެކިއުރިޓީ ދެމުންނެވެ. ސެކިއުރިޓީ ފޫއަޅުވާލައި ބޮމެއް ގޮއްވައިލިއިރު، އެކަމާއި ގުޅޭ ހާއްސަ އިންކުއަރީއެއް ރައްޔިތުންގެ މަޖިލީހުން ކުރިއަށް ގެންގޮސްފައިވާއިރު އެ އިންކުއަރީގެ ރިޕޯޓުގައި ވަނީ ގިނަ ކަންކަން އިސްލާހު ކުރަން އެދިފަ އެވެ. ރައީސް ނަޝީދު ވިދާޅުވީ އެކަންކަން ތަންފީޒު ކުރުން އަވަސްކުރަން ޖެހޭ ކަމަށެވެ.
މަޖިލީހުގެ އިންކުއަރީ ރިޕޯޓު ވަނީ ދައުލަތުގެ ތިން ބާރުގެ ވެރިންނަށް އަރުވައިފަ އެވެ. ރައީސް އިބްރާހިމް މުހައްމަދު ސޯލިހަށް އެ ރިޕޯޓު އެރުވުމުން ވިދާޅުވީ ރިޕޯޓުގައި ފާހަގަކުރި ކަންކަން އިސްލާހު ކުރައްވާނެ ކަމަށެވެ.
ނަޝީދަށް ދިން ހަމަލާ ގުޅެނީ ދީނީ ހަރުކަށި ފިކުރުގެ މީހުންނާ އެވެ. ހައްޔަރު ކުރި ބައެއް މީހުން ތަހުގީގުގައި ވަނީ ރައީސް ނަޝީދަކީ ކުފުރުވެފައިވާ ބޭފުޅެއް ކަމަށާއި އެމަނިކުފާނު ދުނިޔޭގައި އުޅުއްވަން ޖެހޭކަމަށް ގަބޫލު ނުކުރެވޭކަމަށްވެސް ބުނެފަ އެވެ. ފުލުހުން ބުނީ ނަޝީދަށް ދިން ހަމަލާއަކީ ފިކުރީގޮތުން ހުރި ތަފާތުތަކެއްގެ ސަބަބުން ދިން ހަމަލާއެއް ކަމަށެވެ. އެހެންނަމަވެސް އެކަމަށް ބަޔަކު ފަންޑު ކޮށްފައިވާކަމަށް ތަހުގީގަށް އެނގެން ނެތްކަމަށް ފުލުހުން ބުންޏެވެ.
