އިންސާނެއްގެ ދަތް ހުރި މަހެއް ފެނިއްޖެ

އިންސާނުންގެ ދަތްޕިލަ ފަދަ ދަތްތަކެއް ހުރި މަހެއް އެމެރިކާއިން ފެނިއްޖެ އެވެ.

މިއީ މަދުން ނޫނީ ނުފެންނަ ބާވަތުގެ މަހެކެވެ. މި މަސް ފެނުނީ އެމެރިކާގެ އުތުރު ކެރޮލީނާގެ މަސްވެރިކަން ކުރާ ސަރަހައްދަކުންނެވެ. މަހުގެ ފޮޓޯ ސޯޝަލް މީޑިއާގައި ހިއްސާ ކުރީ ޖެނެޓްސް ޕިއާ އިންނެވެ.

މި މަހުގެ އަނގަމަތި ކަންބަޅި ބަކަރިއާއި ވައްތަރުކަމުން އެ މަހަށް ނަންދިނީ "ޝީޕްސް ހެޑް ފިޝް" ގެ ނަމުންނެވެ. މި މަސް ބޭނީ ނަތަން މާޓިން ނަމަކަށް ކިޔާ މީހެކެވެ.

މާޓިން ބުނީ އޭނާއަށް މި މަސް ބޭނުމުން އެންމެ ފުރަތަމަވެސް ފާހަގަވީ އޭގެ ދަތްތައް ކަމަށެވެ. އިންސާނެއްގެ ދަތްތަކާއި ވަރަށް ވައްތަރު ކަމަށް މާޓިން ބުންޏެވެ. މިމަހަކީ ވަރަށް ރަހަ މީރު މަހެއް ކަމަށްވެސް މާޓިން ބުންޏެވެ.