ވީނުވީއެއް ނޭނގި ގެއްލުވާލާފައިވާ ނޫސްވެރިޔާ އަހުމަދު ރިލްވާންގެ މައްސަލައިގައި ކުރީގެ ކޮމިޝަނާ އޮފް ޕޮލިސް ހުސައިން ވަހީދު މަރު ކޮމިޝަނަށް ހާޒިރުކޮށްފި އެވެ.
މައުލޫމާތު ލިބިފައިވާ ގޮތުގައި ހުސައިން ވަހީދު މަރު ކޮމިޝަނަށް ހާޒިރުކޮށް ސުވާލުކޮށްފައިވަނީ މިދިޔަ ޖުލައި މަހުގެ ތެރޭގަ އެވެ.
ރިޟްވާނު ގެއްލުވައިލިއިރު ކޮމިޝަނާގެ މަގާމުގައި ހުންނެވީ ހުސައިން ވަހީދު އެވެ. މީގެ ކުރިން މަރު ކޮމިޝަނުން ވަނީ ހުސައިން ވަހީދު ރިލްވާނު މައްސަލައިގެ ތަހުގީގަށް ހުރަސް އެޅިކަމަށް ތުހުމަތުކޮށްފަ އެވެ.
މަރު ކޮމިޝަނުން މިދިޔަ ހަފްތާ ވަނީ ކުރީގެ ރައީސް އަބްދުﷲ ޔާމީންއާވެސް ސުވާލު ކޮށްފަ އެވެ. އެހެންނަމަވެސް މިމައްސަލައިގައި އެމަނިކުފާނު ހަނު ހުންނެވިކަމަށް ކޮމިޝަނުން ބުންޏެވެ.
މަރު ކޮމިޝަންގެ ކުރީގެ ރައީސް ހުސްނު ސުއޫދު ވިދާޅުވެފައިވަނީ ރިލްވާނުގެ މައްސަލައާއި ރައީސް ޔާމީނާއި އެއްވެސް ގުޅުމެއް ނެތްކަަމަށެވެ. އަދި އެމައްސަލައާއި ގުޅުންހުރި އެއްވެސް ކަމެއްގައި ރައީސް ޔާމީންގެ މައްޗަށް ދައުވާ ނުކުރެވޭނެ ކަމަށްވެސް މަރު ކޮމިޝަނުން ބުންޏެވެ.
މީގެ ކުރިން ކޮމިޝަނުން ހޯދި ހޯދުންތަކަށްފަހު ނެރުނު ރިޕޯޓެއްގައި ބުނެފައިވަނީ ރިލްވާނު ގެއްލުވައިލި މީހުން ވަނީ އޭނާ ކަނޑު ފައްތާފައި ކަމަށެވެ. އެހާދިސާ ގުޅެނީ ހަރުކަށި ފިކުރުގެ މީހުންނާއި ކަމަށްވެސް ތުހުމަތު ކުރެވެ އެވެ. މިހާތަނަށް އައިއިރުވެސް ރިލްވާނު މައްސަލައިގެ ތަހުގީގު ނިމިފައި ނުވާއިރު ކުރީގެ ހޯމް މިނިސްޓަރު އުމަރު ނަސީރު ވިދާޅުވީ މަރު ކޮމިޝަނަށް އާ ކަމެއް ހޯދިފައި ނުވާކަމަށާއި އާންމުކުރާ މައުލޫމާތަކީ ކުރީ ސަރުކާރުގައިވެސް ފުލުހުންގެ ތަހުގީގަށް އެނގިފައިވާ މައުލުމާތު ކަމަށެވެ.
