އާންމު އުސޫލެއްގެ ގޮތުން ޕޮލިސް ރެކޯޑު ދޫކުރާ މުއްދަތު ފަސް އަހަރަށް އޮތް އޮތުން، ތިން އަހަރަށް ކުޑަކޮށް ގަވާއިދު ބަދަލު ކޮށްފި އެވެ.
މިދިޔަ ހޮނިހިރު ދުވަހު އާންމުކުރި އާ ގަވާއިދުގައި ބުނަނީ ކުށުގެ ރެކޯޑު ފުލުހުން ދެން ދޫކުރާއިރު ބަލާނީ ތިން އަހަރު ދުވަހަށް ކަމަށެވެ. އެހެންނަމަވެސް އެއަށްވުރެއް ދިގު މުއްދަތަކަށް ކުށުގެ ރެކޯޑު ސާފުކުރަންވެސް އެދެވިދާނެ އެވެ.
މީގެ ކުރިން ކުށުގެ ރެކޯޑު ސާފު ކުރާއިރު ބަލަނީ ފަސް އަހަރުގެ މުއްދަތަކަށެވެ.
އާ ގަވާއިދު އެކުލަވާލާފައިވަނީ ރެކޯޑުތައް ޑިޖިޓަލައިޒްކޮށް ބެލެހެއްޓޭނެ ނިޒާމެއް ގާއިމްކުރަންޖެހޭ ގޮތަށެވެ. އެ ނިޒާމު ގާއިމް ކުރާއިރު މަރުކަޒީކޮށާއި އަދި ލާމަރުކަޒީކޮށްވެސް ލިޔުން ބަަލަހައްޓަން އިންތިޒާމުތައް ހަމަޖައްސަން ޖެހޭނެ އެވެ.
ފުލުހުންނަށް ހުށަހެޅުނު ޖިނާއީ މައްސަލައަކާ ގުޅިގެން އެމީހެއްގެ މައްޗަށް ތުހުމަތެއްކޮށް ތަހުގީގުކުރަމުންދާނަމަ ނުވަތަ ދައުވާކޮށްދިނުމަށް އެދި ޕީޖީ އޮފީހަށް ފޮނުވާފައިވާ މައްސަލައެއްގައި ތުހުމަތު ކުރެވިފައިވާނަމަ އެކަން ފުލުހުން ދޫކުރާ ކުށުގެ ރެކޯޑުގައި އޮންނާނެ އެވެ.
އެހެންނަމަވެސް މައްސަލައިގެ ޝަރީއަތް ނިމި، ހުކުމް ތަންފީޒުކޮށް ނިމިފައިވާކަން ބަޔާންކޮށް ހުކުމް ތަންފީޒުކުރުމުގެ ޒިންމާ ހަވާލުކުރެވިފައިވާ އިދާރާއަކުން ދޫކޮށްފައިވާ ރަސްމީ ލިޔުމެއް ރިކޯޑު ހޯދުމަށް އެދޭ ފަރާތުން ހުށަހަޅައިފިނަމަ ނުވަތަ އެކަން ދިވެހި ފުލުހުންގެ ހިދުމަތަށް އެ އިދާރާއަކުން އަންގައިފި ނަމަ އެ މައްސަލައެއްގެ މައުލޫމާތު ރެކޯޑުގައި ހިމަނައިގެން ނުވާނެ އެވެ.
ވަޒީފާގެ ބޭނުމަށް ކުށުގެ ރެކޯޑު ދޫކުރާއިރު ހިމަނަން ޖެހޭނީ އެ މީހެއްގެ މައްޗަށް ޖިނާއީ އިޖުރާއަތުގެ ޤާނޫނުގައި ބުނާ ޖިނާއީ ބޮޑު ކުށުގެ ތެރެއިން ކުށެއްގެ ތަހުގީގު ހިންގާނަމަ ނުވަތަ ދައުވާކުރަން ފޮނުވާފައިވާނަމަ އެކަމެކެވެ. ނަމަވެސް، އެ މީހަކީ ތިން އަހަރު ތެރޭގައި ގިނަ ކުށްތަކެއް ކޮށްފައިވާ މީހެއް ނަމަ ވަޒީފާގެ ބޭނުމަށް ވެސް އޭނާގެ ރެކޯޑު ބަލާނީ އާއްމު މިންގަނޑުންނެވެ.
ޤަވައިދުގައިވާގޮތުން ތުހުމަތު ކުރެވުނު ފަރާތެއްގެ މައްޗަށް ދައުވާ ނުކުރުމަށް ޕީޖީ އޮފީހުން ނިންމައިފައިވާ މައްސަލަތަކާއި ފައިލްކޮށްފައިވާ މައްސަލަތަކުގެ މައުލޫމާތުގެ ރެކޯޑުވެސް ދޫކުރުމަށް ފުލުހުންނަށް ނިންމިދާނެ އެވެ.
ހޯދަން އެދޭ ރެކޯޑުގެ ސަބަބުން ގައުމީ ސަލާމަތަށް ނުރައްކާވެދާނެކަމަށް ބެލެވޭނަމަ ފުލުހުންނަށް އެކަން ނުކޮށް ހިފެހެއްޓިދާނެ އެވެ. އެގޮތަށް ހިފެހެއްޓޭނީ ވަކި މުއްދަތަކަށެވެ. މުއްދަތު ކަނޑައަޅާނީ ކޮމިޝަނާ އޮފް ޕޮލިސް ނުވަތަ އޭނާ ކަނޑައަޅާ މުވައްޒަފެކެވެ.
