ކުރީގެ ރައީސް އަބްދުﷲ ޔާމީންގެ ސަރުކާރުގައި ހިންގި އެމްއެމްޕީއާރުސީ ހިޔާނާތާއި ގުޅިގެން ރިޝްވަތު ނެންގެވިކަމުގެ ތުހުމަތު ކުރެވޭ ޔޫތު މިނިސްޓަރު އަހުމަދު މަހުލޫފު، އޭނާގެ މައްޗަށް ދައުވާ ކުރަން ޕްރޮސެކިއުޓާ ޖެނެރަލް އޮފީހުން ފޮނުވިޔަސް އިސްތިއުފާ ނުދެއްވާނެކަމަށް ވިދާޅުވެއްޖެ އެވެ.
އޭނާ މީގެ ކުރިން ތުހުމަތުތައް ދޮގު ކުރައްވައި ވިދާޅުވީ ދައުވާ ކުރަން ފޮނުވާ ހިސާބުން އިސްތިއުފާ ދެއްވާނެ ކަމަށެވެ.
މަހުލޫފަށް ދައުވާ ކުރަން އެންޓި ކޮރަޕްޝަން ކޮމިޝަން (އޭސީސީ) އިން ޕީޖީ އޮފީހަށް ފޮނުވާފައި އޮންނަތާ ދެ މަހެއްހާ ދުވަސް ވަނީ ވެގެން ގޮސްފަ އެވެ. އަދިވެސް ދައުވާ ކުރުމާއިމެދު ޕީޖީ އޮފީހުން ވަކި ގޮތެއް ނިންމާފައެއް ނުވެ އެވެ.
"ކުރިން ނިންމައިގެން ހުރީ ޕީޖީ އޮފީހުން ގޮތެއް ނިންމީމަ އިސްތިއުފާ ދޭން. އެކަމަކު މިހާ ގޯސްކޮށް ޕީޖީ އޮފީސްތެރެއިންވެސް ކަންތައް ދާތީ ދައުވާ ކުރިޔަށް ދެން އަޅުގަނޑު އިސްތިއުފާ ދިނުމާއިމެދު އަޅުގަނޑު ވިސްނާނަން"
- މިނިސްޓަރު މަހުލޫފު
މިކަމާއި ގުޅިގެން މަހުލޫފު ވިދާޅުވީ ގިނަވެގެން ހަ ދުވަސްތެރޭ ދައުވާ ކުރުމާމެދު ގޮތެއް ނިންމާކަމަށް ޕްރޮސެކިއުޓަރު ޖެނެރަލް ހުސައިން ޝަމީމް އެންމެ ފަހުން ބޭއްވެވި ނޫސްވެރިންގެ ބައްދަލްވުމުގައިވެސް ވިދާޅުވެފައިވާ ކަމަށާ ނަމަވެސް އޭނާގެ މައްސަލަ ޕީޖީގައި އޮންނަތާ 60 ދުވަސް ވެއްޖެ ކަމަށެވެ. އަދި އެމްއެމްޕީއާރުސީގެ މައްސަލަތައް ނިންމަން ނަގާފައޮތް ކޮމިޓީ އިން ދައުވާ ނުކުރެވޭނެ ކަމަށް ބުނުމުން އެމީހުންގެ އަތުން މައްސަލަ އަތުލާ އެހެން ބަޔަކާއި ހަވާލުކޮށްފައިވާ ކަމަށެވެ.
މަހުލޫފުގެ މައްސަލަ ދިރާސާ ކުރުމަށް ޕީޖީ އޮފީހުގައި އެކުލަވާލާފައި އޮތް ދައުލަތުގެ ޕްރޮސެކިއުޓަރުންގެ ކޮމެޓީ އިން ބަލަމުން ގެންދިޔަ މައްސަލަ އެ ކޮމިޓީ މެންބަރުންގެ އަތުންނަގާ އަބްދުﷲ ރާބިއު އާއި މަހްމޫދު ސަލީމް އާއި ހަވާލުކޮށްފައިވާ ކަމަށް ވަނީ އަޑު ފެތުރިފަ އެވެ. މައުލޫފު ވަނީ އެކަމާއި ގުޅިގެންވެސް ފާޑު ވިދާޅުވެފަ އެވެ.
މަހުލޫފުގެ މައްޗަށް ތުހުމަތު ކުރަނީ ކުރީ ސަރުކާރުން އެސްއީޒެޑު ބިލް ފާސްކުރިއިރު ރިޝްވަތުގެ ގޮތުގައި ޑޮލަރު ނެންގެވި މައްސަލައިގަ އެވެ. އޭނާ ވިދާޅުވަނީ އެފައިސާއަކީ ޑޮލަރުގެ މުއާމަލާތަކަށް ނެންގެވި ފައިސާ ކަމަށެވެ. އެހެންނަމަވެސް އެފައިސާ ނެންގެވީ އޭރު މަހުލޫފު މަޖިލިސް މެމްބަރެއްގެ ގޮތުގައި ހުންނަވައިގެން ރިޝްވަތުގެ ގޮތުގައިކަން ތަހުގީގަށް ވަނީ ހޯދިފަ އެވެ.
މަހުލުފު ވިދާޅުވާ ގޮތުގައި އޭނާގެ މައްސަލައަށް ނުފޫޒު ފޯރުވަމުންދަނީ ސިޔާސީ ބައެކެވެ. އަދި އެއީ ޒާތީ ކަމެއް ކަމަށާއި ދައުވާ ކޮށް ކޯޓުގައި މައްސަލަ ކުރިއަށް ދާއިރު އޭނާ ދައްކަވާ ހުރިހާ ވާހަކައެއް ސާބިތު ވާނެ ކަމަށްވެސް ވިދާޅުވި އެވެ.
"އަޅުގަނޑު މިވާހަކަ ރައީސްއަށްވެސް ރަސްމީކޮށް ދަންނަވާނަން. މަގާމުން ވަކި ކުރުމަކީ ރައިސުލްޖުމްހޫރިއްޔާއަށް ގާނޫނު އަސާސީއިން މަތިކޮށްފައިވާ ބާރެއްކަމުން ގޮތެއް ނިންމަވާނީ ރައީސް"
- މިނިސްޓަރު މަހުލޫފު
މަހުލޫފުގެ މައްޗަށް ދައުވާ ކުރަން ފޮނުވުމާއިއެކު ރައީސް އިބްރާހިމް މުހައްމަދު ސޯލިހު ވަނީ އޭނާ މަގާމުން ސަސްޕެންޑު ކޮށްފަ އެވެ. މުސާރަ ހިނގާ ގޮތަށް މަހުލުފު ސަސްޕެންޝަންގައި ހުންނަވާތާ މިހާރު ދެ މަސްދުވަސް ވީ އެވެ.
