އަންނަ ސެޕްޓެމްބަރު މަހުން ފެށިގެން އެމެރިކާ ސިފައިންނަށް ކޮވިޑް-19 ވެކްސިން ޖެހުން މަޖުބޫރު ކުރަން އެގައުމުގެ ސަރުކާރުން ނިންމައިފި އެވެ.
ރައީސް ޖޯ ބައިޑެން ސޮއިކުރައްވައި ވައިޓް ހައުސްއިން އިއްޔެ ނެރުނު ބަޔާނެއްގައި ބުނީ އެމެރިކާ ސިފައިންނަށް ވެކްސިން ޖަހަން މަޖުބޫރު ކުރުވުމުގެ އެންމެ ބޮޑު ބޭނުމަކީ އެމީހުންގެ އާއިލާއަށް ރައްކާތެރިކަން ކަށަވަރުކޮށްދިނުން ކަމަށެވެ. އަދި ވެކްސިން ފުރިހަމަ ކުރުމުން ދުނިޔޭގެ ކޮންމެ ހިސާބެއްގައި ކޮންމެ އޮޕަރޭޝަނަކަށްވެސް ތައްޔާރުވާނެ ކަމަށް ބައިޑެން ވިދާޅުވި އެވެ.
"މިހާރު ފެތުރެމުންދާ ޑެލްޓާ ވޭރިއެންޓުގެ ސަބަބުން ވެކްސިން ނުޖަހާ އާބާދީއަށް ނުރައްކާ އޮތްއިރު ކޮވިޑާއި ދެކޮޅަށް ކުރާ ހަނގުރާމައަށް ހުރަސް އެޅޭަކަން ބޭނުމެއް ނޫން"
- ރައީސް ޖޯ ބައިޑެން
އަންނަ ސެޕްޓެމްބަރު މަހުން ފެށިގެން އެމެރިކާ ސިފައިންގެ ތެރެއިން ވެކްސިން ނުޖަހާ 750،000 އަށްވުރެއް ގިނަ ސިފައިންނަށް ވެކްސިން ޖަހަން މަޖުބޫރު ވާނެ އެވެ. ޑިފެންސް ޑިޕާޓަމެންޓުން ބުނީ އަންނަ މަހުގެ މެދުތެރެއާއި ހަމައަށް ދާއިރު ހުރިހާ ސިފައިންވެސް ވެކްސިން ފުރިހަމަކުރަން ޖެހޭނެ ކަމަށެވެ.
އެމެރިކާ ސިފައިންގެ ދެބައިކުޅަ އެއްބައި މިހާރުވެސް ވަނީ ވެކްސިން ޖަހައިފަ އެވެ. އެންމެ ބޮޑު އިންސައްތައެއް ވެކްސިން ޖެހީ ކަނޑުމަތީގެ ސިފައިންގެ ތެރެއިންނެވެ. އެމެރިކާގައި ވެކްސިން ޖެހޭ އާބާދީގެ 60 އިންސައްތަ ވަނީ ދެޑޯޒް ފުރިހަމަކޮށްފަ އެވެ.
ކޮވިޑް-19 ގެ ބަލިމަޑުކަމުގައި އެގައުމުން ވަނީ ގިނަ ބަޔަކު މަރުވެފަ އެވެ. ދުނިޔޭގެ ނިސްބަތުން އެންމެ ގިނަ މީހުން މަރުވި އެއް ގައުމަކީވެސް އެމެރިކާ އެވެ. އެހެންނަމަވެސް މަރުވި މީހުންގެ ތެރޭގައި ސިފައިންގެ އަދަދު ވަރަށް މަދެވެ.
