ދިރާސީ އާ އަހަރު މިއަދު ފެށުނު ނަމަވެސް ހދ. ހިރިމަރަރޫ ސްކޫލުގައި ކިޔަވާ އެއްވެސް ދަރިވަރަކު މިއަދު އެ ސްކޫލަށް ހާޒިރެއް ނުވި އެވެ.
މައުލޫމާތު ލިބިފައިވާ ގޮތުގައި ހިރިމަރަދޫ ސްކޫލަށް ދަރިވަރުން ނުފޮނުވާން ނިންމީ އެކުދިންގެ ބެލެނިވެރިންނެވެ.
އެރަށުން މީހަކު "ހަމައެމްވީ" އަށް ކިޔައިދިން ގޮތުގައި ސްކޫލުގައި ގިނަ މައްސަލަތަކެއް އެބަ ހުއްޓެވެ. އެގޮތުން ރަށުގައި ތިބޭ ބޭރު ޓީޗަރުންނަކީ ސްކޫލުގެ ކަންކަމުގައި މާ ބޮޑަށް މަސްއޫލުވެ އުޅޭ ބައެއް ނޫންކަމަށް އޭނާ ބުންޏެވެ.
ހިރިމަރަދޫ ސްކޫލުގައި ހުންނަނީ އިންޑިއާ ޕްރިންސިޕަލެކެވެ. ސްކޫލު ހިންގުމުގައި އޭނާގެ ފަރުވާ ކުޑަކަން ފާހަގަކޮށް އޭނާ ބުނީ އެސްކޫލަށް ދިވެހި ޕްރިންސިޕަލަކު ބޭނުންވާ ކަމަށެވެ. ވޭތުވެ ދިޔަ 8 އަހަރު މި ޝަކުވާ ބެލެނިވެރިން ކުރަމުން އަންނައިރު އެއްވެސްކަމެއް ހައްލުވެފައެއް ނުވެ އެވެ.
މިއަދު ދިރާސީ އަހަރު ފެށިގެން ދިޔައިރު ދަރިވަރުންނަށް ޓައިމް ޓޭބަލެއްވެސް ހަދާފައި ނުވާކަމަށް ވެއެވެ. އަނެއްކޮޅުން ފޮތްތައް ހަމަނުވާއިރު ކުދިންނަށް ދީފައިވަނީ ކުރިން ބޭނުންކޮށްފައިހުރި ބާ ފޮތްތައް ކަމަށްވެސް އޭނާ ކިޔައިދިނެވެ.
ސްކޫލުގައި މިވަގުތު ހުރި މައްސަލަތައް ހައްލު ނުވަނީސް ދަރިވަރުން ސްކޫލަށް ނުފޮނުވާން ބެލެނިވެރިން ވަނީ ނިންމައިފަ އެވެ. އެރަށުގައި ތިބި ގިނަ ބިދޭސީ ޓީޗަރުން ތިބީވެސް ކަރަންޓީނުގަ އެވެ.
