ރ. އަލިފުށީގައި އެއާޕޯޓެއް އެޅުމަށް އެމްޓީސީސީއާއި މިއަދު ހަވާލުކޮށް އެއްބަސްވުމުގައި ސޮއިކޮށްފި އެވެ.
ޕްލޭނިންގް އެންޑް ހައުސިންގް މިނިސްޓްރީގައި މިއަދު އޮތް ހާއްސަ ރަސްމިއްޔާތެއްގައި ސަރުކާރުގެ ފަރާތުން އެއްބަސްވުމުގައި ސޮއި ކުރެއްވީ ޕްލޭނިން މިނިސްޓްރީގެ ޑިރެކްޓާ ޖެނެރަލް ފާތިމަތު ޝާނާ ފާރޫގެވެ. އެމްޓިސީސީގެ ފަރާތުން އެއްބަސްވުމުގައި ސޮއި ކުރެއްވީ ސީއީއޯ އާދަމް އާޒިމް އެވެ.
އެއްބަސްވުމުގައި ވާގޮތުން އަލިފުށީ އެއާޕޯޓުގެ މަސައްކަތް 750 ދުވަހުގެ ތެރޭގައި ނިންމަންޖެހޭނެ އެވެ. އެއީ ގާތްގަނޑަކަށް ދެ އަހަރު ދުވަހެވެ. ތާރީހައް މަސައްކަތް ނިމިއްޖެނަމަ އެއާޕޯޓު ހުޅުވޭނީ ރައީސް އިބްރާހިމް މުހައްމަދު ސޯލިހުގެ ދައުރުގެ ފަހު ދުވަސްތަކުގަ އެވެ.
ރ.އަލިފުށި ބިންހިއްކުމާއި އެއަރޕޯޓް ތަރައްޤީކުރުމުގެ މަޝްރޫޢު ކުރިއަށް ގެންދިއުމަށް @MTCCPlc އާ ހަވާލުކޮށްފި.
451,615,528.48 ރުފިޔާ ހަރަދުކޮށްގެން މި މަޝްރޫޢު ކުރިއަށްގެންދިއުމަށް ހަވާލުކޮށްފައިވަނީ 750 ދުވަހުގެ ތެރޭގައި ނިންމުމަށް. pic.twitter.com/BCbUkinTb6
— Min.of National Planning, Housing & Infrastructure (@MoNPHImv) September 1, 2021
އަލިފުށީ އެއާޕޯޓު ތަރައްގީ ކުރުމުގެ މަޝްރޫއުގެ ދަށުން ބިން ހިއްކަން ޖެހޭނެ އެވެ. އެހެންކަމުން ޖުމްލަ މި މަޝްރޫއަށް ގާތްގަނޑަކަށް 451.6 މިލިއަން ހަރަދުވާނެ އެވެ.
އެއްބަސްވުމުގައިވާ ތާރީހައް މަސައްކަތް ނިންމައިލެވޭނެ ކަމަށް އެމްޓީސީސީގެ ސީއީއޯ އާޒިމް ވަނީ ވިދާޅުވެފަ އެވެ. ތަރައްގީ ގެނައުމަށް ސަރުކާރުން ކުރަމުންދާ މަސައްކަތުގައި ފުރިހަމަ އެއްބާރުލުން ދެއްވާނެ ކަމަށްވެސް އާޒިމް ވިދާޅުވި އެވެ.
އަލިފުށީގެ އިތުރުން މިސަރުކާރުން ވަނީ މ. މުލި، ބ. ތުޅާދޫ އަދި ފ. ބިލެއްފަހީގައިވެސް އެއާޕޯޓެއް ތަރައްގީކުރަން ނިންމައިފަ އެވެ. އެގޮތުން ކުރިއަށް އޮތް އަހަރުގެ ތެރޭގައި މި މަޝްރޫއުތައްވެސް ފަށާނެކަމަށް ސަރުކާރުން ބުނެ އެވެ.
