ދިވެހި ދައުލަތުން ވިއްކި ސުކޫކުގެ އަގު 500 މިލިއަން ޑޮލަރަށް އަރައިފި އެވެ.
އެގޮތުން އެންމެ ފަހުން ވިއްކާފައިވަނީ 2 ސެޕްޓެމްބަރު 2021 ގައެވެ. މިއާއި އެކު މިއަހަރު ތެރޭ އެކަނި ވިއްކި ސުކޫކުގެ އަދަދު މިވަނީ 500 މިލިއަން ޑޮލަރަށް އަރާފައެވެ. މީގެ ކުރިން މިއަހަރުގެ މާޗު މަސް ތެރޭ 200 މިލިއަން ޑޮލަރު އަދި އޭޕްރިލްގައި 100 މިލިއަން ޑޮލަރުގެ ސުކޫކު ވަނީ ވިއްކާފައެވެ. ސެޕްޓެމްބަރުގައި ވިއްކި ސުކޫކުވެސް މެޗުއަރ ވާނީ 2026 ވަނަ އަހަރުގައެވެ. އަދި މި ސުކޫކު ވިއްކާފައިވަނީ 10.5 އިންސައްތައިގެ ފައިދާ އަނބުރާ ގަންނަ ފަރާތަށް ދޭންޖެހޭ ގޮތަށެވެ.
ސުކޫކަކީ އިސްލާމީ ޝަރީއަތާއި އެއްގޮތަށް ވިއްކޭ މާލީ އިންސްޓްރޫމެންޓެކެވެ. މިއީ ސީދާ ލޯނެއް ނޫން ކަމުގައިވިއަސް ދަރަނީގެ ބާވަތެކެވެ.
މިއަހަރު ކުރީ ކޮޅު ވިއްކި ސުކޫކުތައް ވިއްކުމުގައި ސަރުކާރުން ބޭނުން ކޮށްފައިވަނީ ދަރުމަވަންތަ ހޮސްޕިޓަލެވެ. އަދި މިފަހުން ވިއްކި 200 މިލިއަން ޑޮލަރުގެ ސުކޫކު ވިއްކުމުގައި ހަރުމުދަލެއްގެ ގޮތުގައި ބޭނުން ކުރީ ވެލާނާ ބިލްޑިން އާއި މާލޭގެ އެހެނިހެނެއް ބައެއް ބިންތަކެވެ.
މިފަހުން ވިއްކި 200 މިލިއަން ޑޮލަރުގެ ސުކޫކުން ލިބޭ ފައިސާ ބޭނުންކުރާނީ ކޮން ގޮތަކަށް ކަމެއް ސަރުކާރުން ހާމައެއް ނުކުރެ އެވެ.
ސަރުކާރުން ސުކޫކު ވިއްކާފައިވަނީ "މޯލްޑިވްސް ސުކޫކް އިޝުއަންސް ލިމިޓެޑް" ގެ ނަމުގައި ސްޕެޝަލް ޕާޕޯސް ވެހިކަލް (އެސްވީޕީ) އުފައްދައިގެން އެ ކުންފުނި މެދުވެރިކޮށެވެ. އެ ކުންފުނި ރެޖިސްޓަރ ކޮށްފައިވަނީ ކޭމެން އައިލޭންޑްސްގައެވެ. މިއީ ސީދާ ސުކޫކު ވިއްކުމަށް އުފައްދާ ވަކި ޤާނޫނީ ހައިސިއްޔަތެއް ލިބިދޭ ކުންފުންޏެކެވެ.
ސަރުކާރުން ނެރެފައިވާ ދައުލަތުގެ މެދުރާސްތާގެ ދަރަނީގެ ސްޓްރެޓެޖީގައި ވާގޮތުން މިއަހަރު ނިމޭއިރު ދައުލަތުގެ ޖުމްލަ ދަރަނި ހުންނާނީ 79 ބިލިއަން ރުފިޔާގަ އެވެ.
