ރަސްމީ ދަތުރުފުޅެއްގައި، މާލެ ސިޓީގެ މޭޔަރު ޑރ. މުހައްމަދު މުއިއްޒު ރޭ ތުރުކީއަށް ފުރާވަޑައިގެންފި އެވެ.
މާލެ ސިޓީ ކައުންސިލުން ބުނީ މުއިއްޒުގެ މި ދަތުރުފުޅުގެ މަގްސަދަކީ ތުރުކީގެ ސިޓީތަކުގެ މޭޔަރުންނާއި ބައްދަލުކުރައްވައި އެ ސިޓީތަކާއި ގުޅުން ބަދަހިކުރުން ކަމަށެވެ. އަދި މާލެ ސިޓީއާއި ގުޅުންހުރި އެކި ކަންކަމަށް އެހީތެރިކަން ހޯދޭނެ މަގުފަހިކުރުމަށްވެސް މުއިއްޒުގެ މި ދަތުރުފުޅުގައި މަސައްކަތް ކުރައްވާނެ ސިޓީ ކައުންސިލުން ބުންޏެވެ.
މާލެ ސިޓީގެ ތަރައްގީގެ ގިނަ ކަންކަން މުއިއްޒުގެ މޭޔަރުކަމުގެ ދަށުގައި ދަނީ ބަދަލުކޮށް، ދުވެލި ހަލުވި ކުރަމުންނެވެ. އެގޮތުން މާލެ ސިޓީގެ އެކި އަވަށްތަކުގެ ރައްޔިތުންނާއިއެމު މުއިއްޒު ގެންދަވަނީ ސިލްސިލާ ބައްދަލުވުންތަކެއްވެސް ބާއްވަމުންނެވެ.
މި ބައްދަލުވުންތަކުގައި މާލެ ސިޓީގެ ތަރައްގީގެ އެކި ކަންކަމާއި ގުޅިގެން ރައްޔިތުންގެ ހިޔާލު ގެންދަނީ ހޯދަމުންނެވެ. އަދި ސިޓީ ކައުންސިލްގެ ކަންކަން ރައްޔިތުންގެ ހިޔާލާއި އެއްގޮތަށް ކުރިއަށް ގެންދިޔުމުގެ އިތުރުން ރައްޔިތުން ބޭނުންވާ ކަންކަން ސަރުކާރަށް ހުށަހެޅުމުގެ މަސައްކަތްވެސް މުއިއްޒު ގެންދަވަނީ ކުރައްވަމުންނެވެ.
