މަނީ ލޯންޑަރިންގެ ކުށްސާބިތުވެ ޖަލު ހުކުމް ތަންފީޒު ކުރައްވަމުން ގެންދަވާ ކުރީގެ ރައީސް އަބްދުﷲ ޔާމީންގެ ފަރާތުން 22 އިސްތިއުނާފީ ނުކުތާއެއް ސުޕްރީމް ކޯޓަށް ހުށައަޅުއްވައިފި އެވެ.
ރައީސް ޔާމީންގެ މައްޗަށް ކޮށްފައިވަނީ އެމްއެމްޕީއާރުސީގެ ހިޔާނާތުގައި ހިމެނޭ ވޮޑަމުލާ ކުށްޔަށް ދޫކޮށްގެން ދައުލަތަށް ލިބެންޖެހޭ ފައިސާގެ ތެރެއިން އެއް މިލިއަން ޑޮލަރު އަމިއްލަފުޅު އެކައުންޓަށް ޖަމާކޮށް، އެފައިސާއިން މަނީ ލޯންޑަރ ކުރެއްވި މައްސަލައިގެ ހުކުމެވެ. އެމައްސަލައިގައި ރައީސް ޔާމީން ފަސް އަހަރު ދުވަހުގެ މުއްދަތަށް ޖަލަށް ލުމާއެކު 5،000،000.00 (ފަސް މިލިއަން) އެމެރިކާ ޑޮލަރުން ވަނީ ޖޫރިމަނާ ކޮށްފަ އެވެ.
މިއަދު ސުޕްރީމް ކޯޓުގައި އެމައްސަލައިގެ އިސްތިއުނާފު ފަށާފައިވާ އިރު އިސްތިއުނާފީ 22 ނުކުތާ ހުށައެޅުއްވީ އެމަނިކުފާނުގެ ގާނޫނީ ވަކީލު އަބްދުﷲ ސިޔާޒެވެ.
ރައީސް ޔާމީންގެ ފަރާތްޕުޅުން ހުށައެޅުއްވި 22 އިސްތިއުނާފީ ނުކުތާގެ ޚުލާސާ:
- ޖިނާއީ އިޖުރާއަތުގެ ގާނޫނުގެ 76 ވަނަ މާއްދާ (ސުވާލު ނުކުރާ ކުށެއްގެ މައްޗަށް ކުށް ސާބިތު ކުރުން ) އާ ޚިލާފުވިކަމަށް،
- ޖިނާއީ އިޖުރާއަތުގެ ގާނޫނުގެ 82 ވަނަ މާއްދާގެ ބ. އާއި ޚިލާފުކަމަށް. އެއީ ކުށުގެ ތުހުމަތުގައި މީހާ ކުރި އަމަލާއި، ކުށް ކުރި ތަނާއި ތަފްސީލު ހާމަކޮށްފައިނުވާ ބާތިލު ދައުވާއަކުން ކުށް ސާބިތުކޮށްފައިވާކަން،
- ޖިނާއީ އިޖުރާއަތުގެ ގާނޫނުގެ 82 ވަނަ މާއްދާ އާއި ޚިލާފު ކަމަށް. އެއީ ދައުލަތުން ކުރާ ދައުވާއަކީ ކޮބައިކަން ސާފުކޮށްދީފައި ނުވާކަން،
- އިބްތިދާއީ މަރުޙަލާ ކުރިއަށް ގެންގޮސްފައިވަނީ ދައުވާއާ ގުޅޭ ބައެއް ލިއެކިއުންތައް ޙަވާލު ނުކޮށްކަން،
- ގާނޫނުލް އުގޫބާތުގެ 22 ވަނަ މާއްދާއާ ޚިލާފަށްކަން،
- ގާނޫނުލް އުގޫބާތުގެ 106 ވަނަ މާއްދާއާ ޚިލާފުކަމަށް. އެއީ ޖިނާއީ އިޖުރާއަތުގެ ޤާނޫނާ ޚިލާފަށް އިބްތިދާއީ މަރުޙަލާއާއި ޝަރީއަތުގެ މަރުޙަލާ އެއްކޮށް ގެންދިއުމާއި، ތާވަލެއް އެކުލަވާލާފައިނުވުން
- ގާނޫނުލް އުގޫބާތުގެ 10 ވަނަ މާއްދާއާ ޚިލާފު ކަމަށް. މައްސަލަ ޙަވާލު ކުރުމާއި، ތަނާޒުލުވުމާއި، ގުޅޭ އުސޫލާ ޚިލާފަށް އެކުލަވާލާފައިވާ މައްސަލައެއްކަން،
- ދައުލަތުގެ ހެކިން ދޮގު ހެކިބަސް ދީފައިވާކަން އަދި އެއީ ކުށުގެ ބައިވެރިންކަން،(އަދީބާއި ޒިޔަތު އަދި މުއައްވިޒުގެ ހެކިބަސް)
- ހެއްކާބެހޭ ގާނޫނުގެ 6 ވަނަ މާއްދާއާ ޚިލާފުވިކަމަށް ބުނެ ހުށައެޅި ނުކުތާ، އެގޮތުން ކިތާބީ ހެކި ވަޒަންކޮށް ތަހުގީގު ކޮށްފައިވަނީ ނުބައިކޮށްކަމަށް،
- އެކްސްކްރޯ އެގްރީމަންޓުގައި ސޮއި ކުރިއިރުވެސް އެއްބަސްވުމުގައި ބަޔާންކޮށްފައިވާ އެކައުންޓަށް ފައިސާ ވަދެފައިނުވާކަމަށާއި، އެކްސްކްރޯ އެއްބަސްވުމާ އެއްގޮތަށް އަމަލު ކުރުމުންވެސް،އެކަމާ ގުޅިގެން ހައިކޯޓުން ނިންމި ގޮތް ރަނގަޅު ނޫންކަން،
- ސިޔާސީ ޕާޓީތަކާއި ބެހޭ ޤާނޫނުގެ 40 ވަނަ މާއްދާއާއި، އިންތިޚާބުތަކާ ބެހޭ ޤާނޫނުގެ 68 ވަނަ މާއްދާ ނުބައިކޮށް ތަތުބީޤު ކޮށްފައިވާކަން،
- ޔާމީންގެ އެކައުންޓަށް ޖަމާވެފައިވަނީ ވޮޑަމުލާގެ ފައިސާ ކަން ސާބިތުވާން ނެތި އެ ފައިސާއަކީ އިކުއިޒިޝަން ކޮސްޓްގެ ފައިސާކަން ކަނޑަައަޅާފައިވާ ކަން،
- ދައުލަތުން ހެކި ހުށައެޅި ސަބަބު ނޫން ސަބަބުތައް ސާބިތު ކޮށްދޭން ހެކި ހުށައަޅާފަައިވާކަން،
- ދިފާއުން ހުށައެޅި ކިތާބީ ހެކިތަކުން ހާމަވާ ހަގީގަތްތައް ބަލައިގެންފައިނުވާކަން،
- ކުށް ސާބިތުވެފައިވަނީ ގޫނޫނުލް އުގޫބާތުގެ 28 ވަނަ މާއްދާއާ ޚިލާފަށް ކަމަށް،
- މަނީ ލޯންޑަރިންގެ ގާނޫނު ނުބައިކޮށް މާނަކޮށްފައިވާކަން.
- މަނީ ލޯންޑަރިން ޤާނޫނުގެ ކުށުގެ ތުހުމަތު ކުރެވޭ މީހާއަށް ގެއްލުންވާ ގޮތަށް ޤާނޫނު މާނަކޮށްފައިވާކަން، އިންސާނީ ޝަރަފާއި ހަމަހަމަކަމާއި މިނިވަންކަމުގެ އުސޫލުތަކާ ޚިލާފުކަން.
- މާނަ ކުރުމުގެ ހަމަތައް ބަޔާންކުރާ ޤާނޫނާ ޚިލާފަށް ތުހުމަތު ކުރެވޭ މީހާއަށް ގެއްލުންވާ ގޮތަށް މާނަކޮށްފައިވާކަން.
- ކްރިމިނަލް ކޯޓުންނާއި ހައިކޯޓުން ހެކި ވަޒަންކޮށްފައިވަނީ ސުޕްރީމް ކޯޓުގެ ކުރީގެ ގަޒިއްޔާއަކާ ޚިލާފަށްކަން ( އަބްދުﷲ ހަސަން ވ ސްޓޭޓް)،
- ހައިކޯޓުން މި މައްސަލަ ބެލީ ޝައްކުގެ މިންގަނޑުންކަމަށް އަދި ކްރިމިނަލް ކޯޓާއި ހައި ކޯޓުން މައްސަލަ ފައިސަލާ ކޮށްފައިވަނީ ގާނޫނުއަސާސީއާ ޚިލާފަށް ކަމަށް،
- އެމްއެމްއޭ ގާނޫނުގެ ދަށުން ހަދާފައިވާ މަނިޓަރީ ޤަވާއިދުގެ މާއްދާތަކާ ޚިލާފުކަން، އަދި
- މީހެއްގެ މައްޗަށް ފުރަތަމަ ކުށް ސާބިތުވާއިރު، ލުއި ޙުކުމެއް އިސްކުރުން އޮންނައިރު، ޖޫރިމަނާ އޮތީ އެންމެ ބޮޑު މިންގަނޑުންކަމަށް.
މި މައްސަލަ ބައްލަވާ ފަނޑިޔާރުންގެ މަޖިލީހުގައި ހިމެނިވަޑައިގަންނަވަނީ ފަނޑިޔާރު މަހާޒް ޢަލީ ޒާހިރާއި ފަނޑިޔާރު ޑރ. އަޒްމިރާލްދާ ޒާހިރާއި ފަނޑިޔާރު ޑރ. މުހައްމަދު އިބްރާހީމްއެވެ. މައްސަލައިގެ ރިޔާސަތު ބަލަހައްޓަވަނީ ފަނޑިޔާރު މަހާޒެވެ.
މި މައްސަލައިގެ ހުކުމް ކްރިމިނަލް ކޯޓުން ހުކުމްކުރީ 28 ނޮވެމްބަރު، 2019ގައެވެ. އެ މައްސަލަހައިކޯޓުގައި އިސްތިއުނާފްކުރި ނަމަވެސް މިދިޔަ ޖެނުއަރީ މަހުގެ 21 ވަނަ ދުވަހު ހައިކޯޓުން ވަނީ ކްރިމިނަލް ކޯޓުން ރައީސް ޔާމީންގެ މައްޗަށް ހުކުމް ކޮށްފައިވަނީ ރަނގަޅަށް ކަމަށް ބުނެ އެ ހުކުމް ދަމަހައްޓާފަ އެވެ.
