ރާއްޖޭގައި ބޮމެއް ގޮއްވާލައި ސުންނާފަތި ކޮށްލާނެ ކަމުގެ އިންޒާރު ދިން މައްސަލައެއް ބަލަން ފަށާފައިވާކަމަށް ފުލުހުން ބުނެފި އެވެ.
ފުލުހުން ބުނީ ބޮމެއް ގޮއްވާލާނެ ކަމަށް ބުނެ އިންޒާރުދީ، ލިޔުމެއް ލިޔެފައިވާ މައްސަލައެއް ފުލުހުންގެ ސަމާލުކަމަށް އައިސްފައިވާ ކަމަށެވެ.
މި އިންޒާރު ލިޔެފައިވަނީ މާލޭގައި ހުންނަ ނޫރު މިސްކިތުގެ ތަނބެއްގަ އެވެ. އެ ލިޔުމުގައި ބުނެފައިވަނީ ރާއްޖޭގައި ގަދަވާނީ "ބަންގާޅީން" ކަމަށާއި އެމީހުން ބޭނުން ގޮތެއް ހަދާނެކަމަށެވެ. އެ ލިޔުން ލިޔެފައިވަނީ ދިވެހި ބަހުންނެވެ.
ލިޔުމުގައި އިތުރަށް ބުނީ ވަރަށް އަވަހަށް ރާއްޖޭގައި ބޮމެއް ގޮއްވާލާނެ ކަމަށެވެ. އަދި މުޅި ގައުމު ސުންނާފަތި ކޮށްލާނެ ކަމަށެވެ.
މިމައްސަލައިގައި ބަލަންޖެހޭ ކަންކަން މިހާރު ބަލަން ފަށާފައިވާކަމަށް ފުލުހުން ބުނެ އެވެ.
ބޮން ގޮއްވުމާއި މީހުން މެރުމަށް އިންޒާރު ދިނުމަކީ ޓެރަރިޒަމްގެ އަމަލެކެވެ. މިފަދަ ފަރާތްތައް ހޯދައި ފުލުހުން ދަނީ އެމީހުންނާއިމެދު ފިޔަވަޅު އަޅަމުންނެވެ.
