މައްސަލަތަކުގައި ދައުވާ ލިބޭ މީހުން ކުރާ ތުހުމަތުތަކާއި، ޓުވީޓުތަކަށް ރަސްމީކޮށް ކޮމެންޓުކޮށް ނޫޅޭ ކަމަށް ޕްރޮސެކިއުޓާ ޖެނެރަލް އޮފީހުން ބުނެފި އެވެ.
ޖިންސީ ފުރައްސާރައިގެ ތުހުމަތު ކުރެވި އެމައްސަލައިގެ ޝަރީއަތް ފަށާފައިވަނިކޮށް އިނގިރޭސިވިލާތަށް ވަޑައިގެން، އެތަނުގައި ހުންނަވައި ކުރީގެ ޓޫރިޒަމް މިނިސްޓަރު އަލީ ވަހީދު ވަނީ ޕީޖީ ހުސައިން ޝަމީމަށް އެމްއެމްޕީއާރުސީ ހިޔާނާތުގެ ތުހުމަތުތަކެއް ކޮށްފަ އެވެ. އެގޮތުން ހިޔާނާތުގެ ލިސްޓު ފެށޭނީ ޝަމީމާއި ހަމައިން ކަމަށް އަލީ ވަހީދު ވިދާޅުވި އެވެ.
މިކަމަށް ބަހެއް ހޯދާލުމަށް ޕީޖީ އޮފީހުގެ މީޑިއާ ގްރޫޕުގައި ދެންނެވުމުން އެ އޮފީހުގެ މީޑިއާ އޮފިޝަލް ވިދާޅުވީ އަލީ ވަހީދުގެ ޓުވީޓުގައި ވިދާޅުވާން އުޅެފައި އޮތީ ހަގީގަތާއި ހިލާފު ވާހަކައެއް ކަމަށެވެ. އެހެންނަމަވެސް އެފަދަ ޓުވީޓުތަކަށް ރަސްމީކޮށް ޕީޖީ އޮފީހުން ކޮމެންޓުކޮށް ނޫޅޭކަމަށް އޮފިޝަލް ވިދާޅުވި އެވެ.
އަލީ ވަހީދު ވަނީ އެމްއެމްޕީއާރުސީ ހިޔާނާތާއި ގުޅިގެން ޕީޖީ އޮފީހުން ކުރީގެ ރައީސް އަބްދުﷲ ޔާމީންގެ މައްޗަށް އެތައް ދައުވާތަކެއް އުފުލާފައިވާތީ އެކަން އެގޮތަށް ނުކުރެވޭނެ ކަމަށްވެސް ވިދާޅުވެފަ އެވެ. އޭނާ ވިދާޅުވީ ރައީސް ޔާމީން މިނިވަންކުރަންޖެހޭ ކަމަށެވެ.
ޕީޖީ ޝަމީމަށް ވަރަށް ބޮޑަށް ފާޑުވިދާޅުވެ އަލީ ވަހީދު ވަނީ ވެންޓިލޭޓަރު ވައްކަމާއި ގުޅިގެން ދައުވާ އުފުލަން ދެކޮޅު ހަދައި އުންސުރު ހަމަނުވާކަމަށް ވިދާޅުވުމުން އެކަންވެސް ފާހަގަކުރައްވައިފަ އެވެ.
