ރާއްޖޭގައި ބޮމެއް ގޮއްވާލައި ސުންނާފަތިކޮށްލާނެ ކަމަށް ބުނެ އިންޒާރުދިން މައްސަލަ ތަހުގީގުކޮށް އެކަމުގައި ޝާމިލުވާ ފަރާތްތަކާއިމެދު ފިޔަވަޅު އެޅުމަށް މޯލްޑިވިއަން ޑިމޮކްރެޓިކް ޕާޓީ، އެމްޑީޕީން ގޮވާލައިފި އެވެ.
މާލޭގައި ހުންނަ ނޫރު މިސްކިތުގެ ތަނބެއްގައި ވަނީ ރާއްޖޭގައި ގަދަވާނީ "ބަންގާޅީން" ކަމަށާއި ބޮމެއް ގޮއްވާލައި ރާއްޖެ ސުންނާފަތިކޮށްލާނެކަމަށް ލިޔެފަ އެވެ. މިކަމުގެ ރިޕޯޓު ފުލުހުންނަށް ލިބި އެކަން ތަހުގީގު ކުރަމުންދާކަމަށް ފުލުހުންވެސް ވަނީ ބުނެފަ އެވެ.
މިކަމަށް އިޝާރާތްކޮށް އެމްޑީޕީން މިރޭ ނެރުނު ބަޔާނެއްގައި ބުނީ ބޮން ގޮންވާނެކަމުގެ އިންޒާރު ސީރިއަސްކޮށް ނަގައި ސަލާމަތީ ބާރުތަކުން ވަގުތުން ވަގުތަށް ފިޔަވަޅު އެޅުމަށް ގޮވާލާ ކަމަށެވެ. މެއި މަހުގެ 6 ވަނަ ދުވަހު ބޮން ގޮއްވާލައި ދިން ޓެރަރިސްޓު ހަމަލާއަށް މާ ގިނަ ދުވަހެއް ނުވަނީ އަނެއްކާވެސް ޓެރަރިސްޓު ހަމަލާއެއްގެ އިންޒާރު ދޭން ނޫރު މިސްކިތް ބޭނުންކޮށްފައިވާކަން އެމްޑީޕީން ފާހަގަކޮށްފައިވެ އެވެ. އަދި ބުނީ މިސްކިތަކީ ހުރުމަތްތެރި ތަނަކަށް ވާއިރު އެފަދަ އިންޒާރެއް މިސްކިތް މެދުވެރިކޮށް ދޭނީ ސީދާ އެނިޔަތުގައި އެކަން ރާވާ ތަންފީޒު ކުރުމަށް މަސައްކަތް ކުރަމުންދާ ޓެރަރިސްޓުން ކަމުގައި ގަބޫލުކުރަން ޖެހޭ ކަމަށެވެ.
"މިކަމުންވެސް އިތުރަށް ހާމަވެގެންދަނީ މި ރާއްޖޭގައި ހަރުކަށި ފިކުރު ފުޅާވެ ގޮސް ރައްޔިތުންނަށާއި މުޅި ގައުމަށް ޓެރަރިޒަމުގެ ނުރައްކާ އޮތް މިންވަރެވެ"
- އެމްޑީޕީގެ ބަޔާން
މީގެ އިތުރުން އެމްޑީޕީން ބުނީ މަރުތަކާ ބެހޭ ރިޔާސީ ކޮމިޝަނުގެ ތަޙްޤީޤް ރިޕޯރޓްގައި، ބައެއް މިސްކިތްތަކުގައި، އޭގެ ތެރޭގައި ނޫރު މިސްކިތް ހިމެނޭގޮތުން، ހަރުކަށި ފިކުރުގެ ބައެއް ލީޑަރުން އެމީހުންނާ ގުޅުން އޮންނަ ބޭރުގެ ޓެރަރިސްޓް ޖަމާޢަތްތަކާ ގުޅިގެން އެ އެމީހުންގެ ފިކުރު ކުރިއަރުވައި އޮޕަރޭޝަންތައް ހިންގާކަން ފާހަގަކޮށްފައިވާއިރު، ހަމަ އެ މިސްކިތުގައިި މި ފަދަ ޓެރަރިސްޓް އިންޒާރެއް ލިޔެފައިވުމަކީ ސަލާމަތީ ޚިދުމަތްތަކުން އެއަށް ފަހު ވެސް ސާވެލެންސްކޮށް އެކަންތައް ރަނގަޅަށް ނުބެލިވާކަމަށް ތުޙުމަތުކުރުމުގެ ޖާގަ އޮތްކަމެއް ކަމުގައި ދެކޭ ކަމަށެވެ.
އަދި މި މިންވަރުގެ ޓެރަރިޒަމުގެ ނުރައްކާ އޮތްއިރު ވެސް ކުއްލިނުރައްކަލުގެ ޙާލަތު އިޢުލާނުކޮށް ވަގުތުން ވަގުތަށް އަޅަންޖެހޭ ފިޔަވަޅެއް އޮތްކަމަށް ނުދެކެވިވާކަމީ އެމްޑީޕީން ކަންބޮޑުވާ ކަމެއްކަމަށް ބުންޏެވެ.
"އެހެން ކަމުން ޓެރަރިޒަމުގެ ނުރައްކާތަކާމެދު އަޅަންޖެހޭ ފިޔަވަޅުތައް އެޅުއްވުމުގައި އިތުރަށް ސަމާލުވެވަޑައިގެން ވަގުތުން ވަގުތަށް އަޅުއްވަންޖެހޭ ފިޔަވަޅުތައް އެޅުއްވުމަށް ސަލާމަތީ ޚިދުމަތްތަކަށާއި ސަރުކާރަށް އިލްތިމާސްކުރަމެވެ."
- އެމްޑީޕީގެ ބަޔާން
ރާއްޖޭގައި ހަރުކަށި ފިކުރުގެ މީހުން އިތުރުވެ ޓެރަރިޒަމްގެ ނުރައްކާ ބޮޑުވަމުން ދާތީ ރާއްޖޭގައި ކުއްލި ނުރައްކަލުގެ ހާލަތު އިއުލާންކޮށް ގިނަ ބަޔަކު ހައްޔަރު ކުރަން މީގެ ކުރިންވެސް އެމްޑީޕީގެ ރައީސް މުހައްމަދު ނަޝީދު ވަނީ ގޮވާލައްވައިފަ އެވެ. އެހެންނަމަވެސް އެފަދަ ހާލަތެއް ރާއްޖޭގައި ނެތްކަމަށް ސަރުކާރުން ދެކެ އެވެ.
