ކްރިމިނަލް ކޯޓަށާއި ތިން މެޖިސްޓްރޭޓު ކޯޓަކަށް ފަނޑިޔާރުން އައްޔަނުކޮށްފި އެވެ.
އެގޮތުން ޖުޑިޝަލް ސާވިސް ކޮމިޝަން (ޖޭއެސްސީ) އިން ވަނީ ކްރިމިނަލް ކޯޓަށް ދެ ފަނޑިޔާރުން އައްޔަންކޮށްފަ އެވެ. އެއީ އދ. މާމިނގިލި، ފްރީޕާކު އަލީ ނަދީމް އާއި ހ. އަސްރަފީވިލާ އިސްމާއިލް ޝަފީއު އެވެ. މި ދެ ފަނޑިޔާރުން އިއްޔެ ވަނީ މަގާމުގެ ހުވާ ކޮށްފަ އެވެ.
މީގެ އިތުރުން ޖޭއެސްސީން ބ. އޭދަފުށީ މެޖިސްޓްރޭޓް ކޯޓަށްވެސް ވަނީ ފަނޑިޔާރުން އައްޔަންކޮށްފަ އެވެ. އެކޯޓަށް އައްޔަންކުރީ ދ. ދަރަވަންދޫ ކުރިކީލަގެ މަރިޔަމް އިފްހާމް ނާޝިދު އެވެ.
ގއ. ކޮލަމާފުށި މެޖިސްޓްރޭޓް ކޯޓަށް އައްޔަނުކުރީ ގއ. މާމެންދޫ، މައިސަން، ވިޝާހް ވަޖީ އެވެ. އަދި ޏ. ފުވައްމުލަކު މެޖިސްޓްރޭޓް ކޯޓަށް ހަމަޖެއްސީ ގއ. ގެމަނަފުށި، މިސްކިތްދޮށުގެ، އަބްދުއްސަލާމް އެވެ. މި ފަނޑިޔާރުންވެސް މަގާމުގެ ހުވާ ކުރެއްވީ އިއްޔެ އެވެ.
މީގެ ތެރެއިން އަލީ ނަދީމް ވަނީ މިސްރުގެ އަޒްހަރު ޔުނިވާސިޓީއިން ޝަރީއާވަލްގާނޫނުގެ ޑިގްރީ ހާސިލްކުރައްވާފަ އެވެ. އަދި ޕްރޮސިކިއުޓާ ޖެނެރަލް އޮފީހުގެ ޕްރޮސިކުޓަރެއްގެ މަގާމުގައި ދެ އަހަރަށްވުރެ ދިގު މުއްދަތަކަށް ހިދުމަތް ކުރައްވާފަ އެވެ.
އިސްމާއީލް ޝަފީއު ވަނީ ޔޫކޭގެ ކާޑިފް ޔުނިވާސިޓީއިން ބެޗެލާސް އޮފް ލޯ ހާސިލްކުރައްވާފަ އެވެ. އަދި ޕްރޮސެކިއުޓާރ ޖެނެރަލް އޮފީހުގެ ޕްރޮސިކުޓަރެއްގެ މަގާމުގައި ދެ އަހަރަށްވުރެ ދިގު މުއްދަތަކަށް ހިދުމަތް ކުރެއްވުމުގެ އިތުރުން އަމިއްލަ ލޯ ފާމް ތަކުގައިވެސް ވަކީލެއްގެ ހައިސިއްޔަތުން ޝަފީއު މަސައްކަތް ކުރައްވާފައިވެ އެވެ.
މަރްޔަމް އިފްހާމް ނާޝިދު ވަނީ ކުއްލިއްޔަތުލް ދިރާސާތިލް އިސްލާމިއްޔާއިން ޝަރީއަތާއި ގާނޫނުން ބެޗްލާ ޑިގްރީ ވިތް އޮނާސް ހާސިލްކުރައްވާފަ އެވެ. އަދި ބ.އޭދަފުށީ މެޖިސްޓްރޭޓް ކޯޓުގެ ލީގަލް އެސިސްޓެންޓުގެ މަގާމުގައި ހަ އަހަރަށްވުރެ ދިގު މުއްދަތަކަށް ހިދުމަތް ކުރައްވާފަ އެވެ.
އަބްދުއްސަލާމް ވަނީ އިސްލާމިކް ޔުނިވާސިޓީ އޮފް މޯލްޑިވްސްއިން ބެޗްލާ އޮފް ޝަރީއާ އެންޑް ލޯ ވިތް އޮނާސް ހާސިލްކުރައްވާފައެވެ. ހައިކޯޓުގެ ލީގަލް އޮފިސަރގެ މަގާމުގައި ހަތަރު އަހަރަށްވުރެ ދިގު މުއްދަތަކަށް ހިދުމަތް ކުރައްވާފައިވެ އެވެ.
ވިޝާހް ވަޖީދު އަކީ ގއ.ދާންދޫ މެޖިސްޓްރޭޓް ކޯޓުގެ ލީގަލް އެސިސްޓެންޓެއްގެ މަގާމުގައި އެއް އަހަރާއި ހަތް މަސް ދުވަހުގެ މުއްދަތަކަށް ހި ދުމަތް ކުރައްވާފައިވާ ބޭފުޅެކެވެ. ތައުލީމު ހާސިލްކުރެއްވީ ރާއްޖޭގެ އިސްލާމިކް ޔުނިވާސިޓީއިން ބެޗްލާ އޮފް ޝަރީއާ އެންޑް ލޯއިންނެވެ.
