ޖަލުތަކާއި ފުލުހުންގެ ތެރޭގައި ހުރި މައްސަލަތައް ހައްލު ކުރެވޭނީ ސަރުކާރު ހިންގާ މައި ޕާޓީ، އެމްޑީޕީއަށް ނިސްބަތްވާ ހޯމް މިނިސްޓަރަކު ހުރެގެންކަމަށް ރައްޔިތުންގެ މަޖިލީހުގެ މަކުނުދޫ ދާއިރާގެ މެމްބަރު މުހައްމަދު ރާއީ ވިދާޅުވެއްޖެ އެވެ.
ކޯލިޝަނެއްގެ ތެރެއިން ރައީސް އިބްރާހިމް މުހައްމަދު ސޯލިހު ވެރިކަމަށް ވަޑައިގެންނެވިއިރު، ކެބިނެޓުގެ މަގާމުތައް ވަނީ ހަތަރު ޕާޓީއެއްގެ މެމްބަރުން ހިމެނޭހެން ބަހާލައިފަ އެވެ. އެގޮތުން ހޯމް މިނިސްޓަރުގެ މަގާމުގައި ހުންނެވީ އަދާލަތު ޕާޓީގެ ރައީސް ޝެއިހް އިމްރާން އަބްދުﷲ އެވެ. މިސަރުކާރު އައިތާ މާ ގިނަ ދުވަހެއް ނުވެ އެމްޑީޕީގެ ބައެއް ބޭފުޅުން ވަނީ އިމްރާން އެ މަގާމުގައި ހުންނަވާތީ ކަންބޮޑުވުން ފާޅުކޮށްފަ އެވެ.
ހުޅުމާލެ ޖަލުގައި ހުރި ގައިދީއަކު ކުއްލިގޮތަކަށް ނިޔާވުމާއި ގުޅިގެން މަޖިލީހަށް ހުށަހެޅި މައްސަލައިގައި ވާހަކަ ދައްކަވަމުން މެމްބަރު ރާއީ ވިދާޅުވީ ކުރީގެ ރައީސް އަބްދުﷲ ޔާމީންގެ ވެރިކަމުގައި ފުލުހުންގެ ތެރޭގައާއި ޖަލުތަކުގައި ހުރި ބައެއް މައްސަލަތަކެއް ހައްލުވެފައިވާކަމަށް ގަބޫލު ކުރައްވާ ކަމަށެވެ. އެހެންނަމަވެސް އެންމެ އެކަށީގެންވާ ހައްލެއް އެމައްސަލަތަކަށް އައިސްފައި ނުވާކަމަށާއި އަވަސް ހައްލެއް ގެންނަން ބޭނުންވަނީ އެމްޑީޕީއަށް ނިސްބަތްވާ ހޯމް މިނިސްޓަރެއް ކަމަށް ރާއީ ވިދާޅުވި އެވެ.
ސްޕީޑުގެ ލަސްކަން ފާހަގަކުރައްވަމުން ރާއީ ވިދާޅުވީ އެމްޑީޕީގެ ހޯމް މިނިސްޓަރެއް ހުންނެވިނަމަ މައްސަލަތަކަށް ހައްލު ލިބޭލެއް އަވަސްވާނެ ކަމަށެވެ. އެހެންކަމުން އެމްޑީޕީގެ ހޯމް މިނިސްޓަރެއް ހުންނަތަން ދެކެން ބޭނުންވެލައްވާ ކަމަށްވެސް ރާއީ ވިދާޅުވި އެވެ.
ކުރީގެ ރައީސް މުހައްމަދު ނަޝީދުގެ ވެރިކަން ބަގާވާތަކުން ވައްޓައިލިކަމަށް އެމްޑީޕީން ތުހުމަތު ކުރާއިރު އެޕާޓީން ދެކެނީ އެކަމުގައި އެންމެ އިސްކޮށް ހުންނެވީ އިމްރާން ކަމަށެވެ. އެހެންކަމުން އެމްޑީޕީގެ މެމްބަރުން ގެންދަވަނީ އިމްރާން އާއި ދެކޮޅަށް ވާހަކަ ދައްކަވަމުންނެވެ. ފުލުހުންގެ މުއައްސަސާއާއި ކަރެކްޝަންސް ފަދަ މުހިންމު ގިނަ މުއައްސަސާތަކެއް އިމްރާންގެ ބާރުގެ ދަށުގައި އޮތްއިރު އެމްޑީޕީން ދެކެނީ މިފަދަ މުހިންމު މުއައްސަސާއެއްގައި އިމްރާން ފަދަ ބޭފުޅަކު ހުންނަވައިގެން ނުވާނެ ކަމަށެވެ.
އެމްޑީޕީގެ އެތެރޭގައި ބައިބައިވުންތަކާއިއެކު މިހާރު އިމްރާނާއި ދެކޮޅަށް ވާހަކަ ދައްކަވަނީ ރައީސް ނަޝީދުގެ ފެކްޝަންގެ މެމްބަރުންނެވެ. ރައީސް ސޯލިހުގެ ފެކްޝަންގެ މެމްބަރުން ވަނީ މީގެ ކުރިން އިމްރާންގެ އިތުބާރު ނެތްކަމުގެ ވޯޓުގައިވެސް އިމްރާނާއި އެއްކޮޅަށް ވޯޓު ދެއްވައިފަ އެވެ.
