ޑިޕާޓްމެންޓް އޮފް ޕަބްލިކް އެގްޒަމިނޭޝަން (ޑީޕީއީ) ގެ ސާވާއަށް ދިމާވި މައްސަލައަކާއި ގުޅިގެން ސެކަންޑްރީ ސްކޫލު ސެޓްފިކެޓް (އެސްއެސްސީ) އިމްތިހާނުގެ ނަތީޖާ ދޫކުރުން ފަސްކޮށްފި އެވެ.
ޑީޕީއީ އިން ކޮށްފައިވާ އިއުލާނެއްގައި ބުނެފައިވަނީ ސާވާއަށް ދިމާވި މައްސަލައަކާއި ގުޅިގެން އެތަނުގެ މަސައްކަތްތައް ވަގުތީ ގޮތުން މެދުކެނޑިފައިވާ ކަމަށެވެ. އެހެންކަމުން ދޫކުރަން ހަމަޖެހިފައިވާ އެސްއެސްސީ އިމްތިހާނުގެ ނަތީޖާ ދޫކުރުން ފަސްކޮށްފައިވާ ކަމަށް އެ ޑިޕާޓްމެންޓުން ވަނީ އިއުލާން ކޮށްފަ އެވެ.
ނަތީޖާތައް ދޫކުރާނެ ވަކި ތާރީހެއް އިއުލާންކޮށްފައެއް ނުވެ އެވެ. އެހެންނަމަވެސް ޑީޕީއީ އިން ބުނީ ތާރީހެއް އެނގޭނީ ސާވާގެ މައްސަލަ ހައްލުކުރެވުމުން އެކަމަށާއި ސާވާ ހައްލު ކުރުމުގެ މަސައްކަތް ކުރިއަށް ދާކަމަށެވެ.
އިއްޔެގެ ވަގުތެއްގައި ޑީޕީއީގެ ސިސްޓަމް ހައިޖެކް ކުރިކަމަށް އަޑު ފެތުރުނެވެ. މިކަމާއި ގުޅިގެން އެޑިއުކޭޝަން މިނިސްޓްރީން ބުނީ އިއްޔެގެ ވަގުތެއްގައި އެޓޭކެއް ކުރިމަތިވި ކަމަށެވެ. ކުރިމަތިވީ ރެންސަމްވެއާ އެޓޭކެއް ކަމަށްވެސް މިނިސްޓްރީން ބުންޏެވެ.
ރެންސަމްވެއާ އަކީ ކޮމްޕިއުޓަރުތަކުގައި ހުންނަ މައުލޫމާތުތައް ވަގަށް ނަގައި އެ މައުލޫމާތު ހިފެހެއްޓުމެވެ. އަދި ލީކު ކުރުމުގެ ބަދަލުގައި ވަކި އަދަދެއްގެ ފައިސާ ޑިމާންޑުކޮށް މައުލޫމާތު އަނބުރާ ދޫކުރަން އެފަދަ ހާލަތްތަކުގައި މަސައްކަތް ކުރެ އެވެ.
ޑީޕީއީގެ ސާވާތަކަށް އެޓޭކެއް ކުރިމަތިވުމާއިއެކު އެތަނުގެ އައިޓީ މުވައްޒަފުންގެ ސަމާލުކަމަށް އެކަން އައިސް އެކަމަށް ވަގުތުން ފިޔަވަޅު އަޅާފައިވާކަމަށް ބުންޏެވެ. އަދި މުހިންމު ފައިލްތައް ރައްކާކޮށްފައިވާކަމަށްވެސް އެޑިއުކޭޝަނުން ބުންޏެވެ.
