ވޭތުވެދިޔަ މަދު އަހަރުތަކުގެ ތެރޭގައި އޯޓީޓީ ޕްލެޓްފޯމުތަކުގައި އެންމެ ބަލާ ހިތްވާ އުފެއްދުންތަކުގެ ލިސްޓުގެ ކުރީގައި އެންތޮލޮޖީ ހިމެނޭނެ އެވެ. އެންތޮލޮޖީ އަކީ މިހާރު އެއްވެސް މީހަކަށް އޮޅިފައި އޮންނާނެ ފޯމެޓެއް ނޫނެވެ. މިއީ އެއް ވާހަކައަށްވުރެއް ގިނަ ވާހަކައަށް ހަދާފައި ހުންނަ ކުރު ފިލްމުތަކެއް އެއްކޮށްލައިގެން އުފައްދާ ފިލްމުތަކެވެ. އެންތޮލޮޖީގައި އާންމު ގޮތެއްގައި ހިމެނެނީ ތިރީސް ނުވަތަ ސާޅީސް މިނެޓުގެ ހަތަރު ނުވަތަ ތިން ފިލްމެވެ. މީގެ ކުރިން އެންތޮލޮޖީ ވަނީ ތިއޭޓަރުގައިވެސް އަޅުވައިފަ އެވެ. އަދި ބްރޯޑްކާސްޓިން ބޭނުމަށްވެސް އުފެއްދި އެވެ.
މީގެ ކުރިން ފާހަގަކޮށްލެވުނު ބައެއް ހިންދީ އެންތޮލޮޖީގެ ތެރޭގައި ދަސް ކަހާނިޔާ، ބޮމްބޭ ޓޯކީޒް، ޑަރްނާ މަނާހޭ ހިމެނެ އެވެ. ސިނަމާގައި އެންތޮލޮޖީ އެޅުވި ދުވަސްވަރު މި ފޯމެޓަށް މާބޮޑު ކާމިޔާބެއް ލިބުނޭ ދަންނަވަން ދައްޗެވެ. އެހެންނަމަވެސް ވޭތުވެ ދިޔަ މަދު އަހަރުތަކުގެ ތެރޭގައި އޯޓީޓީ ޕްލެޓުފޯމުތަކަށް އެންތޮލޮޖީ އައެވެ. އެންމެ ޑިމާންޑު ބޮޑު ނެޓްފްލިކްސް އާއި އެމަޒޯން ޕްރައިމްގައި އެންތޮލޮޖީއަށް ބޮޑު ޑިމާންޑެއްވެސް އުފެދުނުކަން ފާހަގަކޮށްލެވެ އެވެ. އެގޮތުން މި ހިމަނާލަނީ ނެޓްފްލިކްސް އަދި އެމަޒޯން އިން ފާހަގަކޮށްލެވުނު އެންމެ މޮޅު ހަތް އެންތޮލޮޖީ އެވެ.
7- އަންކަހީ ކަހާނިޔާ
ނެޓްފްލިކްސްގައި އެންމެ ފަހުން ސްޓްރީމް ކުރަން ފެށި ހިންދީ އެންތޮލޮޖީ އަކީ "އަންކަހީ ކަހާނިޔާ" އެވެ. މިއީ ތިން ވާހަކައެއްގެ މައްޗަށް އުފައްދާފައިވާ ތިން ކުރު ފިލްމެއް އެއްކޮށްލައި ރިލީޒްކުރި އެންތޮލޮޖީ އެކެވެ. ތިން ކުރުފިލްމު ޑައިރެކްޓު ކުރީ ތިން ޑައިރެކްޓަރުންނެވެ. އެއީ އަޝްވިނީ އިޔާ ތިވާރީ، އަބީޝެކް ޗޯބޭ އަދި ސަކޭތު ޗޯދުރީ އެވެ. ފުރަތަމަ ފިލްމުގައި ލީޑް ރޯލުން ފެންނަނީ އަބީޝެކް ބެނާޖީ އެވެ. ދެވަނަ ފިލްމުގައި ޒޯޔާ ހުސައިންގެ އިތުރުން ކުނާލް ކަޕޫރު ލީޑް ރޯލުން ފެންނައިރު ތިންވަނަ ފިލްމުގައި ފެންނަނީ ރިންކޫ ރާޖްގުރޫ އާއި ދެލްޒާދު ހިވާލޭ އެވެ. މިއީ ތްރިލާ ޖޯންރާގެ އެންތޮލޮޖީ އެކެވެ. ފިލްމުގައި ޝައުގުވެރިވާ ގިނަ ކަންތައްތަކެއް ހިމެނޭއިރު، ސްކްރީންޕްލޭ ގެނަސްފައިވާ ގޮތް ވަރަށްވެސް މޮޅުކަން ކްރިޓީކްސްއިން ފާހަގަކުރެ އެވެ.
6- ފީލްސް ލައިކް އިޝްގް
މިއީ ހަ ކުރު ފިލްމެއްގެ މައްޗަށް އެކުލަވާލާފައިވާ އެންތޮލޮޖީ އެކެވެ. ލޯބީގެ ރީތި ވާހަކަތަކެއް ހިމެނޭ މި އެންތޮލޮޖީއަކީ ނެޓްފްލިކްސްގައި އެންމެ ޑިމާންޑު ބޮޑު އެއް އުފެއްދުންވެސް މެ އެވެ. އެންތޮލޮޖީގެ މުހިންމު ތަރިންގެ ތެރޭގައި ނީރަޖް މާދަވް، ޒޭން މޭރީ ހާން، ސަންޖީތާ ބައްޓަޗާރިއާ، ރާދިކާ މަދަން ފަދަ ތަރިން ހިމެނެ އެވެ. މީގެ އިތުރުންވެސް ގިނަ މޫނުތަކެއް އެންތޮލޮޖީން ފެނުނެވެ. އެންމެ މޮޅުކަމަށް ފާހަގަކުރެވުނު ތިން ކުރު ފިލްމަކީ "އިންޓަވިއު"، "ޝީ ލަވްސް މީ، ޝީ ލަވްސް މީ ނޮޓް" ގެ އިތުރުން "ދަ ޑޭޓް" އެވެ.
5- ގޯސްޓް ސްޓޯރީޒް
ނެޓްފްލިކްސްގައި ރިލީޒްކުރި "ގޯސްޓް ސްޓޯރީޒް" އަކީ އެންމެ ފާހަގަކޮށްލެވުނު އެއް އެއްތޮލޮޖީ އެވެ. މި އެންތޮލޮޖީގައި ހިމެނޭ ފިލްމުތައް ޑައިރެކްޓު ކޮށްފައިވަނީ އިންޑިއާގެ މަޝްހޫރު ބައެއް ޑައިރެކްޓަރުންނެވެ. އެގޮތުން ކަރަން ޖޯހަރު، ޒޯޔާ އަކްތަރު، އަނުރާގް ކަޝްޔަޕް ގެ އިތުރުން ދިބާކަރު ބެނާޖީ މިއިން ކޮންމެ ޑައިރެކްޓަރަކު ވަނީ އެއް ފިލްމު ޑައިރެކްޓު ކޮށްފަ އެވެ. ބިރުވެރި ޖޯންރާގެ ހަތަރު ވާހަކަވެސް ވަރަށް ފުރިހަމަ އެވެ. އެހެންނަމަވެސް ކަރަން އަދި ޒޯޔާގެ ކުރު ފިލްމުގެ ފެންވަރު ދަށްކަން ގިނަ ކްރިޓީކްސްއިން ފާހަގަކުރި އެވެ. އެންމެ މޮޅުކަމަށް ފާހަގަކުރެވުނު އަނުރާގުގެ ކުރު ފިލްމުން ބިރުވެރިކަން ހިތަށާއި ސިކުނޑިއަށް ވައްދައިދިނެވެ.
4- އަންޕޯޒްޑް
އެމަޒޯން ޕްރައިމް ގައި ސްޓްރީމް ކުރަމުންދާ "އަން ޕީޒްޑް އަކީ މުޅި ދުނިޔެ "ޕޯޒް" ވެފައި ވަނިކޮށް ރިލީޒްކުރި އެންތޮލޮޖީ އެކެވެ. އެއީ ކޮވިޑުގެ ސަބަބުން ލޮކްޑައުންއަކަށް ގޮސް އެންމެން ގޭގައި ތިބެން ޖެހިފައި އޮއްވާ ސްޓްރީމް ކުރަން ފެށި ސީރީޒް އެކެވެ. މި އެންތޮލޮޖީގައި ކިޔައިދިނީ އެކި އިގްތިސޯދީ އަދި އިޖުތިމާއީ ގިންތިއާއި މިންތީގެ މީހުންގެ ދިރިއުޅުމަށް ކޮވިޑުގެ ސަބަބުން ކުރި އަސަރުތަކެވެ. މި އެންތޮލޮޖީއަކީ ސީދާ ގޮތުން ގިނަ މީހުންނާއި ގުޅޭ އެންތޮލޮޖީ އެކެވެ. ހާއްސަކޮށް ކޮވިޑުގެ ސަބަބުން އެކި ދާއިރާތަކުގެ މީހުންގެ ވާހަކަ ގެނަސްދީފައި އޮތް ގޮތުން އެންތޮލޮޖީ ވަރަށް ބަލާހިތްވެ އެވެ.
3- ރޭ
މިއީ ނެޓްފްލިކްސްގައި ރިލީޒްކުރި އެންމެ މޮޅު ސައިކޮލޮޖިކަލް ތްރިލާ ޖޯންރާގެ އެންތޮލޮޖީ އެވެ. އިންޑިއާގައި ރިލީޒްކުރި ނޮވެލްތަކަކުން އެޑެޕްޓުކޮށްގެން އުފައްދާފައިވާ ކުރު ފިލްމުތަކުގައި ނޮވެލްއިން ކޮންމެވެސް ވަރެއްގެ ބަދަލުތަކެއް ވަނީ ގެނަސްފަ އެވެ. ހަތަރު ކުރު ފިލްމުގައި މަޝްހޫރު ބައެއް މޫނުތައް ފެނުނެވެ. އެގޮތުން މަނޯޖް ބޯޖްޕާއީ، ގަޖްރަޖް ރާއޯ، ހަރްޝްވަރުދަން ކަޕޫރުގެ އިތުރުން ރާދިކާ މަދަން ހިމެނުނެވެ. އެންމެ ތަފާތު އެއް ވާހަކައަކީ އެންމެ އުނދަގުލުން ނަގައިގަނެވުނު "ހަންގާމާހޭ ކިޔޫ ބަރޕާ" އެވެ. އެހެންނަމަވެސް އެންމެ ބަލައިލާ ހިތުން ބަލައިލެވުނު ކުރުފިލްމަކީ "ރޭ" އެވެ. "ރޭ" އަކީ އިންޑިއާގެ ބެސްޓް ސެލާގެ ގޮތުގައި ގިނަ ދުވަސްތަކެއް ވަންދެން އޮތް ނޮވެލް "ރޭ" އަށް ބިނާކޮށް އުފެއްދި ކުރު ފިލްމެކެވެ. އަނެއް ދެ ފިލްމުގެ ތެރެއިން ފުރަތަމަ ފިލްމުގައި ހޮލީވުޑް ފިލްމަކާއި އެއްގޮތް ކަންތައްތަކެއް ހުރިކަން ކްރިޓީކްސްއިން ފާހަގަ ކުރި އެވެ.
2- އަޖީބް ދާސްތާންސް
މިއީ ތަފާތު ލޯބީގެ ހަތަރު ވާހަކައެއް ކިޔައިދިން އެންތޮލޮޖީ އެކެވެ. މަޝްހޫރު ބައެއް ތަރިން އެންތޮލޮޖީން ފެނިގެން ދިޔަ އެވެ. ހަތަރު ފިލްމަކީވެސް އެއްވަރުގެ ޝައުގުވެރި އަދި މޮޅު ފިލްމެވެ. މަޝްހޫރު ތަރިންގެ އިތުރުން ފިލްމުގެ ވާހަކަތަކުންވެސް އެންތޮލޮޖީގެ ފެންވަރު މަތިކޮށްދިނެވެ. ނެޓްފްލިކްސްގައި އެންމެ ޑިމާންޑޮ އޮތް އެއް އެންތޮލޮޖީ އަކީވެސް މިއެވެ. ހަތަރު ފިލްމުގައިވެސް ކްލައިމެކްސްއިން މުޅި އޯޑިއެންސް ހައިރާން ކޮށްލުވަ އެވެ. އެންތޮލޮޖީގެ ނަމަކަށް "އަޖީބް" ކިޔުނީ އެހެންވެގެންނެވެ.
1- ލަސްޓް ސްޓޯރީޒް
މިއީ އެންމެ މޮޅު އަދި އެންމެ މަގުބޫލު އެންތޮލޮޖީ އެވެ. ނެޓްފްލިކްސްގައި އެންމެ ޑިމާންޑު ބޮޑު މި އެންތޮލޮޖީގެ ހަތަރު ކުރު ފިލްމު ޑައިރެކްޓު ކޮށްފައިވަނީ އަނުރާގް ކަޝްޔަޕް، ޒޯޔާ އަކްތަރު، ކަރަން ޖޯހަރުގެ އިތުރުން ދިބާކަރް ބެނާޖީ އެވެ. ކަރަންގެ ފިލްމުގައި ފެނުނީ ކިއާރާ އާދްވާނީ އަދި ވިކީ ކައުޝާލް އެވެ. ޒޯޔާގެ ފިލްމުގައި ބޫމީ ޕޭދްނޭކަރް ފެނިގެން ދިޔައިރު ދިބާކަރްގެ ފިލްމުގައި ދެނުނީ މަނީޝާ ކޮއިރަލާ، ޖައިދީޕް އަހްލާވަތު ގެ އިތުރުން ސަންޖޭ ކަޕޫރެވެ. އަދި އަނުރާގްގެ ފިލްމުގައި ރާދިކާ އާޕްތޭ އާއި އާކާޝް ތޯސާރް ފެނިގެން ދިޔަ އެވެ. މިހަތަރު ފިލްމަކީވެސް ޝައުގުވެރި ހަމަ އެހެންމެ އޮރިޖިނަލް ހަތަރު ފިލްމެވެ. ކްރިޓީކްސްއިން ފާހަގަކުރި އެންމެ މޮޅު އެންތޮލޮޖީ އަކީ "ލަސްޓް ސްޓޯރީޒް" އެވެ.
