ސަރުކާރު އޮފީސްތަކުގައި މަސައްކަތް ކުރާ ސިވިލް ސާވިސް މުވައްޒަފުންނަށް ކޮވިޑް-19 ގެ ސަބަބުން ދިނުން ހުއްޓައިލި އެލެވެންސްތައް އަލުން ދޭން ފެށޭނީ 2023 ގައި ކަމަށް ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެ އެވެ.
ރައްޔިތުންގެ މަޖިލީހުގެ ވެލިދޫ ދާއިރާގެ މެންބަރު މުޙައްމަދު ޢަބްދުﷲ ޝަފީޤު ލިޔުމުން ޖަވާބުދެއްވާ ގޮތަށް ކުރެއްވި ސުވާލަކަށް އަމީރު ސިޓީއަކުން ފޮނުއްވި ޖަވާބުގައި ވިދާޅުވެފައިވަނީ ސިވިލް ސާވިސް މުވައްޒަފުންގެ މުސާރަ ކުރިން ހުރި މިންވަރަށް ގެނެވޭނީ ދައުލަތުގެ އާމްދަނީ ކުރިން ހުރި ވަރަށް އިއާދަވުމުން ކަމަށެވެ.
ދައުލަތުގެ އާމްދަނީ އަލުން އިއާދަވާނެކަމަށް ބެލެވޭ ދުވަހަކާއި ގުޅޭގޮތުން އަމީރު ވިދާޅުވީ ކޮވިޑުގެ ހާލަތު އައުމުގެ ކުރިން ދައުލަތަށް އާމްދަނީ ލިބެމުން ދިޔަ މިންވަރަށް އާމްދަނީ ލިބޭނެ ކަމަށް ؛ލަފާކުރެވެނީ 2023 ވަނަ އަހަރުގެ ތެރޭގައި ކަމަށެވެ. އެހެންކަމުން އާމްދަނީއަށް އައި އުނިކަން އަލުން އިއާދަނުކޮށް މި މުއްދަތުގައި ދަމަހައްޓާނެ ކަމަށް މިނިސްޓަރު އަމީރު ވިދާޅުވި އެވެ.
ސިވިލް ސާވިސް މުވައްޒަފުންނަށް ދިނުން މެދުކަނޑާލާފައިވަނީ ސެޓްފިކެޓު އެލެވެންސާއި ޕާފޯމެންސް އެލެވެންސެވެ.
ސިވިލް ސާވިސް މުވައްޒަފުންގެ މުސާރައިގެ މައްސަލައިގައި ދާދި ފަހުން ވަނީ ހިމޭން އިހުތިޖާޖަކަށްވެސް ނިކުމެފަ އެވެ. ގިނަ އަދަދެއްގެ މުވައްޒަފުން ބައިވެރިވި އެ އިހުތިޖާޖުގައި ބައެއް އޮފީސްތަކުގެ ހިދުމަތްވެސް މެދުކެނޑުނެވެ.
ފަހުން ސިވިލް ސާވިސް ކޮމިޝަނުން ވަނީ އެފަދަ އިހުތިޖާޖުތަކުގައި ބައިވެރިނުވުމަށް ގޮވާލައިފަ އެވެ.
