އެމްއެމްޕީއާރުސީ ބޮޑު ހިޔާނާތުގައި ދައުލަތުން ވަގަށް ނެގި ފައިސާ ދައުރުކުރި އަމިއްލަ ކުންފުނި، އެސްއޯއެފްއާއެކު، ރައީސް އިބްރާހިމް މުހައްމަދު ސޯލިހުގެ ސަރުކާރުން އެއްބަސްވުމެއް ހަދާފައިވާކަމަށް ކްރިމިނަލް ކޯޓުގެ ކުރީގެ އިސް ގާޒީ އަހުމަދު ހައިލަމް ވިދާޅުވެއްޖެ އެވެ.
ކުރީގެ ރައީސް އަބްދުﷲ ޔާމީންގެ މައްޗަށް ކޮށްފައިވާ 5 އަހަރުގެ ޖަލު ހުކުމް އިސްތިއުނާފު ކުރުމަށް ސުޕްރީމް ކޯޓުގައި ކުރިއަށް ގެންދިޔަ ޝަރީއަތުގެ މަޖިލީހުގެ އެންމެ ފަހުގެ އަޑުއެހުމުގައި ދައުލަތުން ވަނީ އެމްއެމްޕީއާރުސީ މައްސަލައިގައި އެސްއޯއެފްގެ މައްޗަށް އެއްވެސް ދައުވާއެއް ނުކުރަން ދައުލަތުން ނިންމާފައިވާކަމަށް ޕީޖީ އޮފީހުން ބުނެފަ އެވެ. ދައުލަތުގެ ޕްރޮސެކިއުޓަރު ވިދާޅުވީ އާންމު މަސްލަހަތު އޮތީ އެސްއޯއެފްގެ އެއްބާރުލުން ހޯދައި ދައުލަތުން ގެއްލުނު ފައިސާ އަނބުރާ ހޯދުމުގައި ކަމަށެވެ.
އެހެންނަމަވެސް އޭގެ 24 ގަޑިއިރު ފަހުން ޕީޖީ އޮފީހުން ވަނީ އެއީ ޕްރޮސެކިއުޓަރު ވިދާޅުވި ގޮތުން އެރި އޮޅުމެއް ކަމަށާއި އެސްއޯއެފްގެ މައްޗަށް ދައުވާ ނުކުރަން ނިންމީ ރައީސް ޔާމީންގެ މައްސަލައިގައި ކަމަށް ވިދާޅުވެފަ އެވެ. އަދި އެމްއެމްޕީއާރުސީއާއި ގުޅުންހުރި އެހެން މައްސަލަތަކުގައި އެކަށީގެންވާ މިންވަރަށް ހެކި ލިބިއްޖެނަމަ އެސްއޯއެފަށްވެސް ދައުވާ ކުރާނެ ކަމަށް ޕީޖީ އޮފީހުން ފަހުން ބުންޏެވެ.
މިވާހަކަތަކަށް އިޝާރާތްކޮށް ހައިލަމް ވިދާޅުވީ ދައުލަތުން ހެދީ ކަނޑައެޅިގެން ދޮގެއް ކަމަށެވެ. އެގޮތުން މިސަރުކާރުގައި ޕީޖީގެ މަގާމުގައި އައިޝަތު ބިޝާމް ހުންނަވައި އެސްއޯއެފްއާއިއެކު "އިމިއުނިޓީ ފްރޮމް ޕްރޮސެކިއުޝަން" ގެ ނަމުގައި އެއްބަސްވުމެއް ހަދާފައިވާކަމަށް ހައިލަމް ވިދާޅުވި އެވެ. އެހެންކަމުން ދައުލަތުން ބޭނުންވިޔަސް އެމްއެމްޕީއާރުސީގެ އެއްވެސް މައްސަލައެއްގައި އެސްއޯއެފްގެ ވެރިއެއްގެ މައްޗަށް ދައުވާ ނުކުރެވޭނެކަމަށް އޭނާ ވިދާޅުވި އެވެ.
މި އެއްބަސްވުން ހެދުމުގައި ބިޝާމާއިއެކު އޭޖީ ރިއްފަތާއި ފުލުހުންގެ އިސް ބޭފުޅުން ހަރަކާތްތެރިވި ކަމަށާއި އެކަމަށްޓަކައި އިނގިރޭސިވިލާތަށްވެސް ވަޑައިގެންނެވިކަމަށް ހައިލަމް ވިދާޅުވި އެވެ. އެމްއެމްޕީއާރުސީ ވަގު ފައިސާ ބެހުމުގައި އިސް ރޯލެއް އަދާކުރިކަމަށް ތުހުމަތު ކުރެވޭ އޮއިއްޓެގެ ވަކީލުގެ ގޮތުގައި އެއްބަސްވުމުގައި ސޮއިކުރީ މިހާރުގެ ޕީޖީ ހުސައިން ޝަމީމް ކަމަށްވެސް ހައިލަމް ވަނީ ވިދާޅުވެފަ އެވެ.
ޕީޖީ ޝަމީމަކީ މީގެ ކުރިން އެމްއެމްޕީއާރުސީ ހިޔާނާތުގައި އެންމެ އިސްކޮށް ހަރަކާތްތެރިވި ފަރާތްތަކުގެ ވަކީލުކަން ކޮށްދީފައިވާ ފަރާތެކެވެ. އެހެންކަމުން ޝަމީމަށްވެސް އެމްއެމްޕީއާރުސީ ހިޔާނާތުގެ ފައިސާއިން މަންފާ ލިބިފައިވާކަމުގެ ތުހުމަތު ކުރެވެ އެވެ.
އެމްއެމްޕީއާރުސީ ހިޔާނާތާއި ގުޅިގެން އެސްއޯއެފްގެ މައްޗަށް ދައުވާ ނުކުރަން ދައުލަތުން ނިންމިކަމަށް ސުޕްރީމް ކޯޓުގެ ފަނޑިޔާރުންގެ ކުރިމަތީގައި ޕީޖީ އޮފީހުގެ ޕްރޮސެކިއުޓަރުން ވިދާޅުވިއިރު، ފަނޑިޔާރުން ވަނީ ތަކުރާރުކޮށް އެސްއޯއެފްއާއި ގުޅުންހުރި ސުވާލު ދައުލަތާއި ކުރައްވައިފަ އެވެ. ސުވާލު ތަކުރާރު ކުރެއްވުމުންވެސް ޕީޖީން ދެއްވީ އެއް ޖަވާބެކެވެ. މި އަޑުއެހުން ވަގުތުން ދުރަށް ދައްކަމުން ދިޔަނަމަވެސް ޕީޖީން ފަހުން ވަނީ އެއީ ޕްރޮސެކިއުޓަރު ވިދާޅުވާން އުޅުއްވި ބަހުގެ މުޅި މާނަ އޮޅުވާލުން ކަމަށް ވިދާޅުވެފަ އެވެ.
އެމްއެމްޕީއާރުސީ ހިޔާނާތާއި ގުޅިގެން ސިޔާސީ ވަކި ވަކި ފަރާތްތަކަށް ދައުލަތުން ދައުވާ ކުރަމުން ދާއިރު އަނެއްބައި ފަރާތްތަކުގެ އެއްބާރުލުން ބޭނުންވާކަމަށް ބުނެ އެމީހުންގެ މައްޗަށް ދައުވާ ނުކުރަން ދަނީ ނިންމަމުންނެވެ. އަދި އެއީ ދައުލަތުން ގެއްލުނު ފައިސާ ހޯދަން ކަމަށްވެސް ދައުލަތުން ބުނެ އެވެ. ރައީސް ސޯލިހުގެ ވެރިކަމަށް 3 އަހަރު ވެގެން ދިޔައިރުވެސް އެމްއެމްޕީއާރުސީ ހިޔާނާތުގައި ދައުލަތުން ގެއްލުނު އެއްވެސް ފައިސާއެއް އަނބުރާ ހޯދިފައި ނުވާކަން ފާހަގަކޮށްލެވެ އެވެ.
